【18區掃食】荃灣商場掃區2.0 平價鰻魚飯+$10三球雪糕
【18區掃食】荃灣商場掃區2.0 平價鰻魚飯+$10三球雪糕

【18區掃食】荃灣商場掃區2.0 平價鰻魚飯+$10三球雪糕

荃灣 真係一個人傑地靈嘅好地方,各式餐廳比比皆是,人地諗唔到食乜係因為無得揀,荃灣 人諗唔到食乜係因為太多好野唔知點揀!所以淨係掃一次邊掃得晒啊,今次再帶大家翻兜荃灣,去到昌寧同昌安呢兩個商場,嚟個荃灣美食第二彈!

撰文、攝影: 很想很想食玩訓

Zakka風文青咖啡店 歎All Day Breakfast

估唔到舊式商場都有間咁文青feel 嘅Café,位置隱蔽,旺中帶靜,夾住喺美甲舖中間,唔細心留意就會錯過!店內以木傢俱為主,食物選擇寫咗喺手繪黑板上,仲有好多小物裝飾,好Zakka風。環境靚之餘食物都好有水準,啱晒文青打卡,喺度食返個All Day Breakfast, 感覺好寫意啊!

A2
法蘭西吐司餐$68
西多上面有個糖霜太陽,睇見就開心。食落外層鬆脆內層柔軟,中間果醬微微酸甜,令成件事無咁Heavy,唔會食到成口油。炒蛋半生熟,口感軟滑,想濃味啲 啲,可加黑椒、鹽同胡椒,増添香味。連腸仔都有刻簡單花紋,好有誠意。薯角炸得金香脆口,煙肉不會太鹹,不過略嫌有少少乾。整體幾高分!
A3
橙與鴨批Pizza$65
見到呢個咁騎呢嘅配搭,心諗邊會有人想食?但係佢再一次證明凡事唔係絕對嘅!煙鴨胸味道濃得嚟唔會太鹹,焗完都仲好juicy。香橙嘅酸味啱啱好,平衡咗其他重口味嘅材料。另外裏面仲有芝士,提子乾同橙皮絲,連埋隨碟附上嘅羅勒葉食更香。咁新奇好味,點都要試下!
A4
芝士拉到少少絲
A1
香蕉朱古力蜂蜜pancake鐵塔
三層高嘅 Pancake 塔,淨係賣相已經令小編有幸福嘅感覺!每層都有好多好多Cream同好多好多香蕉,好好味!Pancake雖然薄薄哋,但睇落軟綿綿,瞄準中間狠狠切落 去,令每塊Pancake都有雪糕包圍食落仲爽!上面仲有杏仁碎,核桃碎同脆米,令口感更豐富。
A5
黑牛特飲$38
除咗平時嘅可樂同朱古力雪糕外,呢間店嘅黑牛仲加左Cream同可可脆粒,令到成杯飲品更有層次。朱古力雪糕味道濃郁,但將所有嘢Mix埋之後,可樂的酸味反而太出。
A7
凍抹茶牛奶$32(跟餐加$14)
抹茶味濃,但奶味更濃,味道微甜,加咗Cream之後口感更Rich。攪勻咗先再飲味道更好。

A8 A6

A9

小灶子

地址:荃灣西樓腳路202-216號荃昌中心昌寧商場一樓6號舖(顯示地圖)
營業時間: 星期一12pm-9:30pm, 星期六日及公眾假期10am-9:30pm, 星期二休息
電話:6732 6515

荃灣街坊推介 煎蛋吉列豬+鰻魚飯燒汁任加

由日本人主理嘅和式料理快餐店,午市晚市一樣爆場。話明係快餐,所以上菜速度夠嗮快,眨下眼就有得食,啱曬小編呢啲心急人!如果識日文仲可同老闆吹下水(其實老闆都識講廣東話)!茶記feel嘅日本野感覺好新鮮。呢度食物價錢十分親民,性價比高,吸引咗唔少學生哥捧場。

C1
吉列豬扒冷蕎麥麵+煎蛋$33(煎蛋+$2)
豬扒幾香脆,煎蛋就係太陽蛋嚟,蛋黃配上豬扒口感不錯。冷蕎麥麵配另上嘅冷麵汁味道不俗,只賣$33,抵食!
C5
腩肉+九州豬骨拉麵 $35
唔好畀佢平凡外表呃到, 腩肉非常好味,腍到入口即化!而且肥而不膩,塊豬皮仲好重膠質!連小編減緊肥都忍唔住食咗兩塊,返去又要跑返幾公里還債。
C6
豬腩肉萬歲!
C7
鰻魚飯$58
蒲燒鰻魚差唔多有成隻手掌咁大塊,仲有濃濃燒鰻汁無限任加,引死人喇!鰻魚控嘅心靈又被觸動了。鰻魚燒得好嫩滑,珍珠米軟得嚟粒粒散開,幾有咬口,好好味!
C8
任落唔嬲!
C3
照燒雞排$20
外皮搽醬油燒到卜卜脆!鹹鹹甜甜帶點焦香,超正!雞扒嫩滑又多汁,無得輸!認真,雞皮係靈魂,一定要連皮食!
C4
好大塊!

C9 C10

和食快餐

地址:荃灣西樓角路188號荃昌中心昌寧商場地下23號舖(顯示地圖)
營業時間: 11am~9:30pm
電話:2413 0678

懷舊辦館 10蚊3球低脂雪糕

估唔到荃灣仲有呢類舊式辦館。裏面有賣廿幾款口味嘅雪糕同粒粒糯米糍,價錢都返到廿幾年前咁,雪糕10蚊就有3球!亦有賣懷舊零食、明星精品、貼紙同卡通填色簿。連懷舊醃製涼果,如九製陳皮、檸檬、相思梅都有,好vintage。以前細個總有一間喺咗近,宜家真係買少見少喇。

E9
有成20幾款雪糕~
E8
超抵食!!!$15有5球~$10有3球,學生仲要減$1!!!
E2
低脂雪糕$10三球,番薯+豆腐+藍珠果(藍珠果+$1)
豆腐雪糕味道好真實,好似食緊真豆腐咁濃味。番薯雪糕微甜,但好香番薯味。藍珠果雪糕其實即係藍莓雪糕,裏面有藍莓果肉,食落有啲似藍莓味吹波糖。$10三球抵到無朋友。
E1
彩針可以自己落
E3
迷你三層糯米糍$10(5粒)

E4

E5
朱古力雪糕糯米糍外皮柔軟煙韌,朱古力餡好滑溜啊!
E6
綠茶雪糕糯米糍外皮相對較厚,不過綠茶味幾重,中間係紅豆餡。
E7
雲呢嗱雪糕糯米糍,裏面係士多啤梨果醬餡,雪凍咗有少少沙冰嘅口感。
E12
各款涼果~
E13
仲有啲好耐無見過嘅零食~
E10
舊式雜貨零食店少不了有偶像精品賣~
E11
仲有卡通貼紙簿~填色簿~

E14

蜜糖星星

地址:荃灣西樓腳路202-216號荃昌中心昌寧商場一樓24號B舖(顯示地圖)
營業時間: 2pm-9pm
電話:3580 0229

飲靚啡食好Cake

呢間Café裝修精緻,設有露天茶座,悠閒舒適,感覺好relax!Lunch hour過嚟歇一歇,放鬆下都唔錯。每日仲提供好多自家製蛋糕,任君選擇。客人每買一杯咖啡可以儲一個印花,儲滿十個可以換一杯$25或以嘅下飲品,驚自己大頭蝦唔見印花卡?可以將印花卡寄存係Café,下次要用先搵返出嚟,好窩心啊!餐廳仲會不時舉辦咖啡工作坊,推廣咖啡文化,如拿鐵拉花工作坊及咖啡烘培工作坊等。店內亦有售自家烘培嘅咖啡旅行裝,無時間參加工作坊,都可以買包嚟試下。

D5
吞拿魚沙律蛋配多士$30
擺設十分吸引,多士香草味好濃,沙律就有橄欖油同醋調味,味道不錯。咁豐富都只係$30炸!!好啱下午茶嘆番下。

 

D3
玫瑰焦糖窩夫$52
窩夫上面有雲呢嗱雪糕同玫瑰乾花瓣,窩夫連花瓣一齊食,會有少少花香Mix落蛋味度,感覺幾得意。雲呢嗱雪糕好Smooth,奶味同雲呢嗱味一樣咁濃,窩夫夾埋雪糕食,唔會太甜。
D4
豆腐桂花蛋糕$28
面層係透明桂花啫喱,下層係豆腐芝士。一食落口最出係芝士味,然後會食到少少桂花香,到最後食完個口會有陣濃濃嘅豆腐味。口味好清新,成件食曬都唔覺膩!餅底唔會太油太實,同樣值得一讚。
D6
紅桑子益力多芝士蛋糕$28
成個Cake 係慕斯蛋糕質地,一拎埋嚟震騰騰,好QQ。紅桑子上層酸酸甜甜,食落好有空氣感,入口即化;下層Cheese底濃密幼滑,好Smooth。上層酸甜,下層香滑,Match得嚟夠清新,隱約食到輕輕嘅益力多乳酸味。
D9
朱古力流心鬆餅$35
雖則個樣似心太軟,其實佢係鬆餅。鬆餅少少流心,不過裏面嘅朱古力就未完全焗溶,鬆餅質地鬆散,食落有好多一粒粒喺口裏面,口感有待改善,麻麻哋。
D2
焦糖鮮奶咖啡$28
見到個靚靚拉花就笑咗出嚟,鮮奶打得好滑,奶味好重,雖然加咗焦糖漿,但都飲到咖啡的微苦,分量控制得幾好。
D1
荔枝桂圓紅棗茶$28
味道清甜,一入口先有荔枝味,然後桂圓味先慢慢滲出嚟,配cheese cake可以解膩。建議浸一陣先飲會更香,感覺養生。

D10

D7D12

D8D11

咖啡賞館

地址:荃灣西樓腳路188號荃昌中心昌寧商場地下66A舖(顯示地圖)
營業時間: 11am-11pm
電話:6821 0145

完全唔Dry素食店

年輕一輩,可能覺得食素剩係得健康嘅菜菜菜,無肉落肚好Dry,但今時今日食素都可以好惹味香口。呢間素食店提供多款素食小食俾客人選擇,其中不乏煎炸烹調的脆口料理。每日更有不加味精的老火靚湯。食肉獸不妨搵日轉轉口味!提提大家店舖逢星期日休息,不過如果星期日撞正農曆初一或十五就照常營業,改為星期六休息,唔好摸門釘啦!

B2
招牌雲吞+素鱈魚扒+招牌香菇豬扒上海麵$33
雲吞係紅蘿蔔、木耳同冬菇餡料,一咬落去超香冬菇味,木耳爽脆。香菇豬扒咬落去同樣好重香菇味,感覺幾juicy,口感好似漢堡扒。素鱈魚扒口感似魚片,有少少豆味,感覺幾似食緊真魚。上海麵偏腍,食落幾滑。
B3
炸鰻魚$22
炸鰻魚其實係一層層嘅腐皮卷起再落鑊炸,外層脆口,最難得嘅係腐皮內層炸完都仲咁嫩口滑嘟嘟,喜出望外。

B4

B1
椰子五指毛桃湯$12
成碗湯都好足料,有椰子、五指毛桃、玉米、甘筍、馬蹄… …未飲已經散發出陣陣椰子味,湯頭好清甜,完全無加味精,飲完成個人都好滋潤。
B5
炸雲吞$22
炸雲吞餡料與招牌雲吞大同小異,皮有少少厚但炸得幾脆,感覺有少少似食緊梳打餅,味道較清淡,蘸喼汁更好味。$22有8粒幾抵食。

B6

B7
傳統秘制素鴨$22
炸腐皮上面撒上椒鹽,好有鹹香風味,內層軟嫩,不過有少少油。

B8

B9

天恩健康素食

地址:荃灣號荃昌中心昌安商場1樓45及62號舖(顯示地圖)
營業時間: 11:30am-9pm, 逢星期日休息(初一及十五照常營業)
電話:2499 6381

最新吃喝玩樂資訊