《 美國隊長3 :英雄內戰 》俾你10個入場的理由 |光影星評@周優王
《 美國隊長3 :英雄內戰 》俾你10個入場的理由 |光影星評@周優王

《 美國隊長3 :英雄內戰 》俾你10個入場的理由 |光影星評@周優王

《 美國隊長3 :英雄內戰 》呢齣大片,個人認為叫《鐵甲奇俠4》又得、《復仇者聯盟3》都得!剩睇牌面Marvel十幾個超級英雄聚首互片都夠睇頭(《蝙蝠俠對超人:正義曙光》真係為之汗顏)!更重要的,是此片為「Marvel電影宇宙」的第三階段揭開序幕,往後還有多個超級英雄以獨立又或聯群結隊姿態登場,唔睇開頭,點理解之後發展?這齣打頭陣的作品,有多個笑位、動作場面、浪漫場口教人驚喜,精選的其中10個,必有成為你入場的理由!(注意:含輕量劇透)

1) 蜘蛛仔發圍

廿年前Marvel經營唔掂,將「親生仔」蜘蛛俠的電影版權賣俾Sony,到今日Marvel終可分享版權讓他在眾復仇者中登場,今次其文戲武鬥戲份夾埋都超過二十分鐘架!演蜘蛛俠的Tom Holland只19歲,學生造型與披上蜘蛛俠戰衣的模樣兼備,小鮮肉卜卜脆!相對兩位前輩Tobey Maguire及Andrew Garfield,他更能演活蜘蛛俠口多多及冇有怕的性格。戲中他更可制服蟻俠、美國隊長、寒冬戰士等,果真拳怕少壯!

01
蜘蛛俠在Ironman叔叔「威迫利誘」下加入其陣營。

02

Tom Holland將於明年Marvel的《Spider-Man: Homecoming》擔正儆惡懲奸。

03
Tom Holland曾於《海嘯奇蹟》中飾演Naomi Watts的長子。

2)富貴黑豹

蜘蛛俠光芒四射,但也沒掩蓋另一新登場角色──黑豹。這個原名為鐵查拉的瓦坎達(虛構的非洲國家)王子,今次為報父仇而涉及這場英雄內戰。既然是王子,學麥玲玲話齋,佢一生大富大貴衣食無憂是必然,更重要的是其國擁有大量汎合金這種超貴金屬(冇錯!美國隊長個盾就是用這種原料製成),鐵查拉將這原料化身其黑豹戰衣,更是刀槍不入,並有助速度和力量的提升!

04
黑豹今次死纏寒冬戰士不放,點解?自己入戲院睇。

05

演黑豹的Chadwick Boseman年近四十但名氣不大,2018年由他孭重飛的《黑豹》可能是其事業轉捩點。

3)蟻俠體形變化無限

去年蟻俠初登場,今年迅即加入戰事,投身美國隊長陣營。佢縮細戰鬥時,可鑽入Ironman身體搞破壞,又可將黑寡婦(當然不會走進其衣衫內咁衰格)舞到跎跎轉。又正因有皮姆粒子之助,佢既可縮細自己,又可變成幾十呎高,成班英雄睇到目定口呆,由Ant-Man變成Giant-Man,打起上嚟甚具日本那些超人打怪獸特攝片之風,堅好笑!

06
漫畫版中蟻俠變巨的模樣。

07

Lego兩個月前推出的《Civil War》系列,已劇透蟻俠亦會變巨。

08
蟻俠同飛隼及鷹眼幾夾得埋,甚至可與鷹眼合作擔任其「箭頭」!

4)隊長春情

美國隊長對感情事一向魯鈍,在《美國隊長2》跟黑寡婦咀咀只為避人耳目毫不浪漫,而於該集登場的Agent 13(Emily VanCamp飾)今次佔戲多了,多次幫助美國隊長搵料脫險境,最終可一嘗與這靚肌英雄接吻滋味,阿隊長紅都面晒又笑晒!喂!你點對得住你的愛人Peggy Carter!

09

Agent 13與美國隊長一左一右,企喺中間的黑寡婦十足電燈膽咁。

10
漫畫版中美國隊長與Agent 13咀咀更肉緊。

5)隊長又晒肌

又關美國隊長事。寒冬戰士諗住駕直昇機逃走,美國隊長一手捉着直昇機,一手拉住天台欄杆不放,因此雙臂手瓜起伏不定似喺度健身,男女觀眾都看得哇哇聲!

 美國隊長3

正常人若作此舉,肯定係想自殺兼分屍!

6)Ironman重遇舊愛

Ironman被Pepper Potts飛慘慘豬,但當佢搵蜘蛛俠幫手時可能會有段新感情!說的是今次飾演蜘蛛俠的嬸嬸Marisa Tomei曾與Ironman羅拔唐尼在九十年代合作不只一次,1994年兩人在《Only You》一片更演情侶。在《英雄內戰》中Ironman跟這位嬸嬸談得十分投契,十足再續前緣咁!

12
在《卓別靈傳》中羅拔唐尼飾演差利,Marisa Tomei飾演默片女星Mabel Normand。

13

《Only You》中羅拔唐尼與Marisa Tomei確屬郎才女貌。

7)最強一對成愛侶

若論Ironman和美國隊長陣營中功力最強者,非紅女巫和幻視莫屬。兩人異能可說是能穿越一切控制他人。漫畫迷都知這一對會成為夫婦,而戲中一場兩人研究烹飪的戲份已滲出一點情味,女觀眾buy呀!

14
話就話今次處於敵對陣營,但紅女巫和幻視相鬥始終會留手。

8)發展近乎生死鬥

美國隊長與Ironman一向愛鬥咀,但都算係理性之人,英雄內戰中大家只因政見不同才出手,最終大家都估到唔會搞到你死我亡吧!不過事情發展至末段,竟有另一事致兩大英雄仇恨升級,達至有你無我階段,點解?原來同Ironman個老豆Howard Stark有關。乜嘢原因?入戲院睇啦!

15
Ironman以一敵二,跟美國隊長和寒冬戰士打到爆缸。

9)戲肉以IMAX格式呈現

要想睇清晰度極高的《英雄內戰》,大家都會選擇到IMAX影院吧。當中一場英雄機場大混戰,正以IMAX格式畫面呈現,四方銀幕內盡見流麗動作與持技,爽呀!

16

大畫面見超過十個英雄開拖,諗起都興奮!

10)兩隻彩蛋奉上

相對《蝙蝠俠對超人:正義曙光》變咗「孤寒戰士」冇彩蛋俾你睇,Marvel的電影則十分慷慨,兩隻彩蛋於片尾字幕的中段和末段送上,為黑豹及蜘蛛俠未來的電影造勢,唔趕時間的話梗係留低睇埋啦!

17
18

兩大英雄將會在「Marvel電影宇宙」的第三階段陸續獨立登場。

最新吃喝玩樂資訊