姚焯菲親解棄港大科大赴美升學真相 揭留學紐西蘭遇追求者 卻因1事冇發展

19歲的決心！姚焯菲棄港大科大遠赴NYU

Chantel坦言考慮了一段日子才決定赴美國繼續升學，她說：「兩年前去紐西蘭係無忐忑嘅，因為係被迫嘅！但去完之後，又覺得係好好嘅成長機會，學識獨立，每次返嚟工作都好開心。」Chantel於紐西蘭高中成績驕人，登上學校頂尖學生榜獲Top Scholars榮譽，被揭IB文憑試考獲40分或以上成績獲封「學霸」。對於消息指本地港大及科大均已取錄她，她說：「係！」至於為可不入讀本土名校，她說這次不關父母事，「佢哋反而想我留響香港，近返啲屋企。好坦白，我都考慮過，差啲就留返響度。但認真諗咗好耐，不斷同屋企人商量，因為香港無呢個課程，我真係好想讀Music Business。想知呢行點運作，又有law、音樂製作同巿場學，呢一行我想知嘅嘢都有得讀，對將來好有用。」Chantel指父母這回選擇尊重她長大後的決定，至於公司TVB必然反對，她說：「哈！又唔好咁講，反對聲音一定有，我相信你都會愕然，但有啲嘢我認為啱嘅就要去做！」

姚焯菲留學紐西蘭曾拒絕追求者

不為名利沖昏頭腦外，Chantel亦不擔心娛樂圈或粉絲善忘。她承諾一如過去兩年離港，未來四年赴美讀大學，一有休假就會回港全心投入工作及出歌。Chantel自認專注力強，在紐西蘭兩年曾為免影響學業而拒絕追求者，「係有追求者出現，對方唔係咁直接示愛，但我哋不斷有傾偈，會感覺到。但我唔係咁想回應對方，就係因為讀書嘅關係，我唔想有任何因素影響我認為最重要嘅讀書。當我好想做好音樂同讀書嘅時候，我會不顧一切做好，會怕其他嘢影響到，好自然會push away。」

姚焯菲30歲前不急愛 專注音樂與未來

快19歲的Chantel指自己未算有過一段真正男女朋友關係，「試過好細個拖吓手，但唔算係一段關係。」談到理想對象的條件及對戀愛憧憬，她說：「條件係唔可以細過我，細個會夢想好後生廿歲頭就結婚，但得返幾年要重新諗過，希望30歲啦！」

這次回港先後跟多位圈中男神，包括張天賦、Tiger@MIRROR及周嘉洛合作，問Chantel哪一位是她的理想對象，她說：「哈！佢哋都未必係我理想類型，但每個人都有佢嘅charm。首先MC佢唱歌真係非常好聽，好值得欣賞；Tiger係比較靜嘅人，我鍾意啲人唔會太嘈，呢方面佢都幾好；周嘉洛就好嘈，但佢好搞笑好幽默，我幾鍾意同佢講笑，佢會搞好多爛gag，令到拍《愛回家》成個氛圍好好。」她重申入行後，父母都沒有禁止她拍拖，「爹哋媽咪無特別反對，佢哋知我目標，或者再大啲，我仍然係呢個諗法，到時或者會擔心我無拖拍，哈哈！」