【直擊河國榮返家鄉】昆士蘭・Home中奇遇:黃金海岸4大必玩 @ Travel佳

旅遊

廣告

(Presented by Tourism and Events Queensland & Qantas)

「靚海鮮,巨到七彩每日食都食唔厭!」

「腳震震咁爬上大廈頂,欣賞風景你話幾咁正!」

睇過河國榮近排發布嘅〈Home中奇遇〉 MV,相信呢幾句歌詞,你點都唔會咁易忘記,咁究竟河生個Home有乜好玩?

今次我Travel佳就同河國榮一齊返「真 ‧ 家鄉」,河生就話識玩佢家鄉昆士蘭,梗係要去布里斯班同鄰近嘅黃金海岸雙城遊,由香港直航布里斯班瞓醒就到,落地可以即時租車、轉車南下黃金海岸,享受一年四季嘅陽光與海灘,仲有無數靚海鮮同動物零距離接觸,亦可以喺布里斯班捐窿捐罅。今次,我地就先去到黃金海岸講下有乜必玩!下集河生再帶大家去布里斯班繼續玩!

第一站 腳震震爬塔頂!睇盡黃金海岸360°全景

提起黃金海岸,第一時間就會諗起當地數十公里長嘅沙灘,要玩盡沙灘河國榮就話唔係「下海」,而係要「上山」,登上當地最高嘅Service Apartment Q1頂樓。不過,講緊嘅唔係大廈77樓同78樓嘅觀景台,而係室外嘅Skypoint Climb。

我哋就同河國榮參加咗全場90分鐘嘅Day Climb Tour,喺地下嘅preparation centre穿上安全裝備後就可以乘搭全澳洲最快嘅電梯上到77樓嘅觀景台,當然工作人員會將你身上嘅扣連上Skypoint Climb樓梯嘅安全鐵軌,就可以踏出室外沿住大廈頂架嘅樓梯一步步行上塔尖。

咪以為行樓梯就「冇料到」,成個Skypoint Climb最刺激嘅位就係fear of unexpected。當你一踏出室外之際,一面扶手另一面是300幾米下嘅地面,加上海旁迎面吹過來嘅強風,298級嘅樓梯之旅頓時變得出乎意料嘅可怕。雖然帶領我哋嘅Tour Guide表示身上扣緊我地嘅鐵扣可以承受4噸嘅重量,但一諗到叉錯腳或企唔穩嘅場面,仍然都會令人不寒而憟。

IMG_8956

沿住樓梯上到塔尖處有一個小型觀景台,喺呢度Tour Guide會講解黃金海岸嘅一啲資料,例如滿布運河嘅城市規劃原來係用嚟預防水浸等,參加者亦可以拍照留念。而河國榮就選擇咗向終極膽量挑戰,喺職員嘅指導下,將全身放鬆向大樓外傾,全身頓時就喪失所有支撐點,只剩下一條索帶連繫大樓,難怪大家見到video一幕,河國榮都嗌到失聲。鬼馬嘅河國榮仲整蠱我地拍攝團隊,趁我哋數一二三合照時,作勢將我哋推落樓,嚇到我哋捉到樓梯實一實。

IMG_9162

雖然,成個過程的確有啲驚嚇,但$300幾港紙就可以挑戰下膽量,欣賞成個黃金海岸方圓幾十公里嘅景色,相比企下室內嘅觀景層單純睇風景,實在好值得一試!

IMG_9290

Skypoint Climb
地址:Hamilton Avenue, Surfers Paradise, QLD 4217, Australia
營業時間:7:30am-8:30pm(周五及六營業至11pm)
電話:+61(0)7 5582 2700
費用:AUD$54 / HK324
網址:www.shop.skypoint.com.au

 

第二站 抱樹熊 + 餵袋鼠 澳洲國寶零距離接觸

一場來到澳洲,當然要同澳洲嘅兩大國寶樹熊同袋鼠零距離接觸,河國榮就話昆士蘭係全澳洲接觸動物最好嘅州分,呢度係澳洲少有可以手抱樹熊嘅州分,而動物園入面仲可以同大量當地獨有嘅動物零距離接觸,而嚟到黃金海岸就不可以錯過距離Surfer’s Paradise南面約半小時車程嘅Currumbin Wildlife Sanctuary!

整個Currumbin Wildlife Sanctuary佔地近2.5個維園,園內有超過50種澳洲各地嘅動物,稱作Sanctuary而非Zoo嘅原因係呢度係一個非一般嘅動物園,園內有一個動物醫院,亦會收養野外受傷嘅動物。佔地咁大,園內設有一條循環綫嘅鐵路,沿綫多個車站會停泊在不同動物品種嘅保育區內,方便大家遊玩。

IMG_9523

我哋首站當然係到樹熊園區參觀,Currumbin園內共收養54隻樹熊,一進入園區內就可以見到多棵尤加利樹幹上都有樹熊嘅蹤影。雖然樹熊嘅外貌相當討好,但實質卻非常懶惰,大部分嘅樹熊都係抱緊樹幹「唔願郁」。

IMG_9912

樹熊園中間有個抱抱樹熊區,參觀者可以排隊輪流同樹熊合照,而我哋同河國榮亦唔例外,原來樹熊抱上手一啲都唔輕,但感覺就軟腍腍咁,手抱嘅時候雙手要兜住樹熊pat pat,唔可以多手去摸佢塊臉,樹熊先會感覺自在。身為真澳洲人嘅河國榮就可能手勢太好,竟然喺河國榮嘅懷抱中瀨尿,令佢哭笑不得!

IMG_9609

睇完樹熊,Currumbin另一個不可錯過嘅當然係袋鼠園, 乘坐園內嘅火車就可以直達讓袋鼠自由活動嘅園區內,園區內分為兩個袋鼠活動區,分別係喺大草園生活嘅灰袋鼠區,另一個就係喺沙漠或乾罕地帶生活、體積較大嘅紅袋鼠區。

IMG_9655

我哋同河國榮就即場購買袋鼠糧餵飼袋鼠,聰明嘅袋鼠一見到手持糧食嘅參觀者就會立即變得活躍,更會連群結隊過來討食。由於河國榮係狗主嘅關係,身上嘅味道更加吸引到袋鼠們嘅留意,即場有十幾隻袋鼠過來包圍我哋。

IMG_9716

河國榮就提醒大家,餵袋鼠嘅時候千祈唔好諗出古惑整蠱佢哋引佢哋跳跳紮,否則佢哋會隨時出手搶晒你手上嘅食物㗎!大家只要乖乖地將食物放喺手上,就算小朋友亦唔需要擔心,可以同袋鼠零距離接觸。

IMG_9829

Currumbin Wildlife Sanctuary
地址:28 Tomewin Street, Currumbin QLD 4223, Australia
營業時間:8am-5pm
電話:+61(0)7 5534 1266
費用:成人 AUD$54 / HK$324
小童 AUD$39 / HK$234
網址:www.cws.org.au

第三站 澳洲最潮!惡搞 Cocktail 實驗室

返到去黃金海岸嘅中心點 Surfer’s Paradise,呢度集商場、餐廳、酒店於一身,唔少鋪頭都營業至深夜時分,喺澳洲實屬少見。行到攰,河國榮就推介大家去到Hilton Hotel嘅FIX Cocktail Bar飲番杯!

呢度嘅主廚Grant Collins and Keith Muchirawehondon喺澳洲名廚,更加創立咗悉尼嘅Zeta Bar,雲集全澳洲最知名嘅bar tender,專門創作古靈精怪嘅cocktail,而黃金海岸嘅FIX Cocktail Bar就係佢哋第二個cocktail實驗室,實踐佢哋「Cocktail not only drink」嘅法則!

IMG_0143

今次,我哋就叫咗3杯最signature嘅cocktail一次過品嘗,分別係Deconstructed Mojito(左,AUD$18 / HK$108)、British English Garden(中,AUD$21 / HK$126)同Fix Nitro Punch(右,AUD$55 / HKD$330)。呢3種cocktail單單係賣相同玩法已經令人覺得好過癮,好似Deconstructed Mojito,就由一粒mojito啫喱、Rum酒加入青檸嘅針筒,以及一杯梳打水構成,飲嘅時候先要食咗粒啫喱,再飲針筒入面嘅酒,最後將檸檬放入梳打水內一口飲完。口感係點?河國榮就話mojito味十足,口感仲夠晒funny添!

FIXbar

而我哋攝製隊就最鍾意另一個叫做Fix Nitro Punch嘅cocktail,單單係賣相已經夠晒誇張,用一個巨型嘅玻璃盤盛載,仲加入大量乾冰,上碟嘅時候全場煙霧灕漫,夠晒排場。而口味就更加特別,入面夾雜住唔同嘅水果,亦有gin酒、apple cider同蘋果汁,一碗碗咁飲好似食緊甜品咁,酸酸甜甜非常醒胃,不過酒精含量亦唔少,飲咗3碗已經wing wing地喇!

IMG_0135

FIX Cocktail Bar @ Hilton Surfer’s Paradise Gold Coast
地址:6 Orchid Ave, Surfers Paradise QLD 4217, Australia
電話:+61 (0) 7 5680 8121
營業時間:5pm – 深夜
網址:http://hiltonsurfersparadise.com.au/restaurants/fix-cocktail-bar/

第四站 勁擦!巨型海鮮食極唔厭

近海食海,嚟到黃金海岸當然亦唔可以錯過食海產啦!河國榮就話,澳洲嘅海鮮固然新鮮,更加份量十足。河國榮帶我哋去到距離Surfer’s Paradise 15分鐘車程以外嘅Aussie China Kitchen。呢間餐廳喺當地大有來頭,唔少香港名人嚟到澳洲都會專程幫襯,譚校長等人都係座上客。

河國榮特別鍾情香港,返到澳洲都唔例外,梗係要揀夠鑊氣嘅中式海鮮。一行入餐廳見到巨型魚缸已經嚇親大家,足足8斤重嘅皇帝蟹、比人臉更大嘅鮑魚、5斤重嘅巨型龍蝦,全部都係澳洲獨有嘅海產。不過,嚟到黃金海岸就唔可以錯過本地獨有嘅泥蟹,好多人都慕名嚟品嘗。

output_BxuTfB

我哋就揀咗薑泥蟹、清蒸泥蟹、荷蘭豆炒鮑片3味海鮮,唔食真係唔知原來黃金海岸嘅泥蟹係可以咁新鮮,滲透住陣陣嘅鮮味,肉質嫩滑又夠晒豐富,好似食蟹柳一樣咁方便!而鮑片就更加係爽口無比,份量亦相當十足,我哋7個人食都唔使就住就住。

seafood

嚟到澳洲,除咗海鮮以外亦當然唔可以錯過和牛,但咪以為一定要去西餐廳食,河國榮話中餐一樣可以食到。我哋就特別叫咗碟西蘭花炒和牛粒,牛肉外脆內軟不在話下,最正仲係咬落口時牛油滲出嚟嘅陣陣香味,真係一試難忘呀!

食完中餐,河國榮推介一定要試埋西式海鮮!河國榮喺昆士蘭嘅家鄉Gympie地處內陸,佢細個時唔係成日食到新鮮海產,講到兒時口味,始終走唔甩係fish and chips。喺Sea World對面嘅Peter’s Fish Market就係佢嘅推介,呢度有十幾種唔同嘅魚可以用嚟即炸fish and chips,坐喺室外對住海景食嘢,又係另一種滋味啦!

點玩最啱?澳航$5,170直航當地

今次河國榮返家鄉,就選搭咗澳洲航空(Qantas)嘅航班。澳航每日都有一班直航香港至布里斯班嘅航班,俾你可以一次過玩盡布里斯班同黃金海岸。即使乘坐經濟客位,每人都獨享30kg嘅寄艙行李配額,連飛機餐都有4款選擇,加上特大屏幕比你打機或睇戲,8個幾鐘嘅航程話咁快就過!而家澳航做緊$5,170直航當地嘅優惠,快啲上去訂票啦!

目的地 航班編號 航班時間
香港 – 布里斯本 QF98 20:00 – 06:50
布里斯本 – 香港 QF97 10:50 – 18:00

澳洲航空:www.qantas.com

昆士蘭旅遊資訊:www.queensland.com

 

有到日本旅遊前要了解的實用資料嗎?

日本是香港人最愛的兩大旅遊地點,去旅行前必看5大旅遊保險保障新冠肺炎的比較,另外為你推介日本10大好用電話卡,亦可參考日本8大Wifi蛋推介。當然亦要事先了解日本地區天氣、電壓、電源插頭、入境簽證要求及大使館電話

日本已開放自由行,有最新的旅遊景點推介嗎?

想要行程推薦的可以參考以下資訊:大阪自由行攻略富士山28大景點福岡自由行懶人包東京自駕遊路線