路盲好幫手! Pokeguide 搭地鐵教你搵出口

Pokeguide 點樣用？

日日返工放工、搭慣搭熟的站，當然知道邊個車卡出最方便，但係當去d唔常去的港鐵站時，真係慳得一秒得一秒。只需要選擇目的地的站名、想去邊個出口，Pokeguide就會話你知點樣先最快，想搭扶手電梯又得，搭lift又得～

答四個問題立即分析

使用「Pokeguide」方法好簡單，只需要揀目標鐵路線、鐵路站、列車前往方向及出口，簡單嘅四條問題，手機App就會立即分析答案，顯示距離扶手電梯及電梯最近嘅車廂。大家跟住結果行去目的地，就唔需要再花咁多時間由車頭行去車尾、搵路、搵出口。喺地鐵繁忙時間，就可以快人一步到達出口！

銅鑼灣、鰂魚涌及紅磡站內設計都幾複雜，分分鐘行錯路、出錯閘，就已經行唔到去目標出口。平時一眾懶人已經好多嘢要諗，去慣去熟就可能識點行，如果要大家研究下地鐵站嘅地圖，就真係頭都大埋⋯⋯所以我地就立即同大家睇下呢幾條路線。

路線一：金鐘去銅鑼灣時代廣場Shopping

如果喺銅鑼灣站月台行錯方向，就有機會去唔到目標出口⋯⋯如果我哋喺金鐘去銅鑼灣，即係要搭港島線，往柴灣方向，去銅鑼灣A出口時代廣場。答完四個問題，就得出結果，要喺第8卡，由車頭數起第4道門，搭扶手電梯到達A出口。

路線二：油塘去鰂魚涌模範里見工

喺鰂魚涌轉車要行一段路，如果行錯就要再行多幾段路⋯⋯如果我哋喺油塘搭將軍澳線去鰂魚涌，有兩個方法可以快人一步到達模範里出口，喺第4卡，車頭數起第5道門；或者喺第5卡，車頭數起第1道門，就可以扶手電梯或電梯到達C出口。

路線三：沙田去紅館睇演唱會

去紅館睇演唱會，張飛咁貴，當然唔可以遲到啦。大家搭東鐵線去紅磡，就要喺第1卡，第5道門落門，搭扶手電梯直奔紅館！

iOS／Android手機用戶都可以下載「 Pokeguide 」手機App，呢個App真係好適合一眾遲到大王、懶人，相信大家用咗呢個App之後，就唔會用「搵唔到個出口」黎做遲到嘅藉口啦～
延伸閱讀：
跟住HEHE去旅行?! 主席長毛在波蘭有個約會
6款超梳乎蛋黃哥精品 OK有得換！