【自助餐放蛇起底組】九龍灣工業區 $118任食繁忙蒸氣鍋

出去食蒸氣鍋,閒閒地都要三四百蚊先落到樓啦,今次我哋嚟到九龍灣工業區,呢間茶記最近租埋樓上,開自助蒸氣鍋,$118可以食足兩個鐘,唔收加一,究竟伏唔伏呢?立即去片!

一定要訂枱! 蒸氣鍋 海鮮配料全自助

最早17:30就可以上去食啦 ,附近嘅上班族放工就可以過嚟食啦!小編個日去到,自助蒸氣鍋先推出咗2日,但店員話俾我哋知已經好多人訂咗枱啦,所以想食最好打去book枱先,免得有排等。

所有配料、醬料、飲品都係自助,食得蒸氣鍋當然要海鮮啦,都有好幾款俾你揀,例如蜆、東風螺、花甲、脆鯇、馬頭魚等,仲有其他生肉片、雜丸、餃子、菜同麵等等,望落都整齊新鮮。

Q2
海鮮類
Q3
海鮮類+肉類
Q4
雜丸、腸、菜餃~
Q0
蔬菜、菇類、麵等
Q6
汽水任飲,可惜無啤酒~

靚海鮮要聽叫咪 排隊拎超繁忙

餐紙上面有寫部分食材要蒸幾耐,如果唔清楚嘅都可以問下店員,佢哋會答到你要蒸幾耐。不過就只得大枱有計時器,4人細枱就要自己計時啦。同埋問過店員會唔會可唔可以整個粥底係下面,不過佢哋就話無米~Q8

Q15
蜆要蒸4-5分鐘就已經開晒口,鮮嫩無沙,洗得好乾淨。
Q20
東風螺有陣怪怪嘅味……
Q17花甲
花甲蒸4分鐘,一啲沙都無,而且好鮮甜,貝類都唔錯喎,可以喪encore!

除咗出面自助嘅海鮮,仲會成日叫咪廣播,可以出去排隊拎啲更精緻嘅海鮮,例如海蝦、花蟹、青龍蝦、象拔蚌、扇貝等,不過真係要一聽到叫咪就好衝出去啦,條隊好長!同埋如果你一開始就俾派去餐廳入啲嘅位置,對你衝出去排隊真係好不利,所以如果一入座有得揀嘅就坐出面少少、近自助區嘅座位會著數啲!同埋佢每隔十幾分鐘就要叫咪,失驚無神,啲嘢食食到一半就要衝出去,都幾攰嫁,同埋只係會一人一件咁派,想食多啲可能就要排多幾轉。

Q18
小編個位比較入,雖然聽到叫咪已經即刻衝出去,但已經好多人啦!
Q14
海蝦要等叫咪,一人拎一隻,好大隻+彈牙,不過食一隻好唔滿足!

如果你唔想排隊,可以好似小編咁,因為攝影師拎著勁大部相機係到拍嘢,店員就自己拎咗幾碟海碟送俾我哋拍,有2人份量嘅花蟹、青龍蝦、象拔蚌、扇貝。

Q9
2人份量嘅花蟹、青龍蝦、象拔蚌、扇貝
Q12
唔知蒸幾耐可以問店員,象拔蚌就要蒸大約5分鐘,食落好彈牙,不過如果再鮮甜啲會更好。
Q19
花蟹如果自己出去拎得1-2隻蟹腳咋,份量好少!
Q11
兩隻扇貝size差好遠啊!拎到咩就要睇你好唔好運啦!食落都鮮嘅,仲可以自己去配料到加啲蒜蓉,如果有埋粉絲就perfect啦!
Q10
青龍蝦最正,肉質爽彈,勁滿足!

總結:

雖然海鮮選擇都ok,而且味道唔錯,但係精緻少少啲海鮮都要隨時留意有無廣播,次次都要衝出去排隊,有啲攰囉,而且無得好好享受食嘢嘅過程,出面自助區花甲、蜆等等等咗好耐都無refill,要扣分!服務店員都未太上手,做嘢有啲慢但態度都好好啲。不過$118呢個價錢又唔收加一,又真係幾抵食嘅,大家如果想去食就記住要book枱啦!

總分:7/10

Q7
環境似屋村酒樓,記住有得揀要坐出啲啊!

Q1

禮記美食中心

地址: 九龍灣常悅道13號瑞興中心1樓(顯示地圖)
電話:3188 0244
自助蒸氣鍋供應時間: 星期一至日,5:30pm-10:30pm
收費: 成人:$118、小童:$75
用餐時間:入座時間起計2小時
備註:不收加一

延伸閱讀:

【自助餐放蛇起底組】$188日式放題 自助甜品區+送生蠔

【自助餐放蛇起底組】沙田酒店Tea Buffet!$78任食紫薯朱古力甜品

最新吃喝玩樂資訊