炸雞配啤酒! 新宿 KFC 都有
廣告
之前講過大阪有間KFC有90分鐘任食放題，而東京嘅新宿KFC亦都搞搞新意思。新宿區的高田馬場分店經過裝修，將會喺4月1日以新姿態營業，打造一個以“CASUAL×FASHION×POP”作為設計理念的新式肯德基。值得留意嘅係，呢間分店由早上7點至下午5點會以咖啡店模式營業，售賣各種炸雞、甜品及咖啡，而下午5點後嘅晚餐時段，就會大變身！售賣不同雞肉美食及各種酒精飲料。
店內裝修走復古風
眼看店外有白色磚牆，店內色調比較復古，棕色系與白色磚牆配合，帶來強烈對比。四周亦有多個黑板，寫滿店鋪資訊，天花板更有粉筆畫。而餐廳枱凳就以木紋裝飾為主，店內仲有一個Bar枱，客人就可以坐喺Bar枱點嘢飲。整間鋪頭感覺都好年輕，同一般KFC嘅快餐形象完全唔同。
而且，店內設有電源插座，畀客人為手機充電或電腦使用，好貼心～
唔同時段 唔同餐牌
呢一間分店營業時間分為四個時段，7am-10am係Morning時段；10am-2pm係Lunch時段；2pm-5pm係Cafe時段；5pm開始到收鋪就係Bar時段。不同時段所賣嘅食物飲品亦有小小分別。
Lunch及Cafe時段主食除咗炸雞，仲會主打雞肉沙律及是日精選蛋糕，蛋糕味道有牛乳芝麻蛋糕、雙層芝士蛋糕等等。飲品就特別提供黑咖啡、伯爵紅茶及大吉嶺茶等等。
午後時段菜單大檢閱！
而Bar時段嘅Menu就十分有驚喜，真係估唔到可以喺度可以食到呢啲美食！
40多款酒精飲品 任你揀
大家都知道韓風吹起一個食炸雞配啤酒熱潮，而家喺呢間分店都有得一邊食啖家鄉雞，飲啖啤酒～其實，呢度提供超過40種酒精飲品，包括生啤、手工啤酒、雞尾酒、紅酒、白酒及1款特製碳酸啤酒等等。
要為大家推介嘅一定係呢款叫High Ball嘅特製碳酸啤酒，由KFC同Suntory啤酒廠一同研發，將秘制香料灑入啤酒，就立刻有泡泡冒出！
