蝙蝠俠對超人
蝙蝠俠對超人

《蝙蝠俠對超人》竟然有8個趣?! 大奇趣位逐個數 |光影星評@周優王

熱話

廣告

千呼萬喚,21世紀終可首次見證蝙蝠俠與超人同台較量(當然他們真正敵人是對家Marvel的一眾復仇者)!不過《蝙蝠俠對超人:正義曙光》原計劃去年推出,搞搞下變咗喺今年非暑假檔期上映,唔通冇信心?看了,戲並不如想像中差,當中不乏搶眼位,但「恥笑」位亦不缺,立刻同各位一數當中精華!(注意:內含劇透)

1. 首先出場竟然係……《保衛奇俠》?

唔係蝙蝠俠,亦非超人或神奇女俠,而是《保衛奇俠》中嗜血又鹹濕的笑面俠!雖然大家都屬DC Comics,但保衛奇俠會咁快踩過界?其實係講緊飾演笑面俠的演員Jeffrey Dean Morgan。今次佢飾演英雄或惡魔,而是蝙蝠俠兒時(即布斯韋恩)的父親湯瑪士韋恩,即係話這位黑夜之神的童年陰影又再呈現,又即係講Jeffrey Dean Morgan一出場就瓜柴,冇得留低!

2. 羅賓呢?得返套戰衣

又講蝙蝠俠父母遇害!悶唔悶啲?未必,呢齣《BvS》唔會詳細講布斯韋恩成俠經過(否則成套戲要用4小時都唔夠講),而係從佢跟管家阿發的對話中,已知佢已經從事黑夜之神工作有二十年,加上一見到羅賓的戰衣,大家會知道這位蝙蝠俠的拍檔早已出事,為公義、為私仇,今集的蝙蝠俠對壞人自然更暴戾,殺人冇手軟(之前基斯頓比爾飾演的蝙蝠俠也顯得太婦人之仁了),就連超人都話接受唔到佢呢種行徑喎!

3. 管家如軍師

基斯杜化路蘭執導的《蝙蝠俠》三部曲,都有個摩根費曼飾演的武器專家為蝙蝠俠作戰略顧問;今次這輯全新的蝙蝠俠,就由金像影帝謝洛美艾朗斯飾演的管家阿發「一腳踢」,照顧其起居飲食唔在講,仲要喺蝙蝠俠的基地操控所有器材助少爺深入敵陣,坐喺度一樣咁型!唔知呢位管家會否因為咁可有兩份人工?

4. 肉色搶眼

超人戰衣如上齣《超人:鋼鐵英雄》一樣,藍得嚟灰灰沉沉,蝙蝠俠的一套更加唔在講。好在多咗一位神奇女俠!當她以古董買家黛安娜普林斯這身份登場時,便有露背晚裝示人,到要以亞馬遜女戰士模樣作戰時,露肩露臂露腿更教人眼前一亮。戰鬥時用劍用盾用繩索用手鐲,攻守兼備,把兩位大男人英雄的鋒芒也稍稍掩蓋!

5. 正義聯盟瞬間登場

入場前已知除上述兩男一女孭重飛外,聽說還有閃電俠、潛水俠及Cyborg陸續登場,當然心中所想他們僅客串而已,而事實上影片亦「符合商品說明條例」,每人僅出場十秒八秒,而且只限在電腦資料夾中現身。想睇多啲,要待未來幾年佢哋各自的獨立電影及《正義聯盟》了!

6. 凡人點可以贏超人?

好多人都有疑問,超人分分鐘一隻手指可篤爆地球,蝙蝠俠點勁都只係人一個,點同佢鬥?不過大家亦迅即估到,只要手執其家鄉的氪氣石,細路仔都可以戰勝超人。片中蝙蝠俠正搶得LexCorp藏有的氪氣石,將之以氣體、固體等形態再加陷阱對付超人,結果兩人對戰時有超過一半時間是蝙蝠俠佔上風,狂揼超人兼替他劃大花臉添!

7. 這個媽媽真鬼馬

好嘞!兩大英雄終成同盟分頭行事,蝙蝠俠的任務就係去救被僱傭兵脅持的超人養母Martha Kent,最終梗係搞掂成班嘍囉救出人質,呢位正義朋友即安慰伯母話:「我係你個仔的朋友,嚟救你的!」阿簡太笑住回應:「我知,你同佢都係穿斗篷嘛!」唔知係簡太嚇到痴咗還是幽蝙蝠俠一默!

8. 有髮冇髮都睇唔慣

最後當然要講講反派、超人宿敵雷克斯路瑟,今次由謝西艾辛堡飾演這個瘋子,把口唔停再加長曲髮,漫畫迷唔知睇唔睇得慣。但當然佢最終都會以禿頭模樣示人,但頭尖尖的他又教一些影迷不能瞬間接受。總之今日的漫畫迷、影迷都係難服侍囉!

最重要資訊:唔使等彩蛋

薩克薛達的電影片長真係唔超過兩個鐘唔安樂!今次《蝙蝠俠對超人:正義曙光》片長更達157分鐘,好多觀眾諗住睇埋片末credit等彩蛋,但周優王可以話俾大家知,此!片!冇!彩!蛋!如果大家睇夜場又趕車返屋企的話,自己執生啦!

睇完戲肚餓可以食:

周末輕鬆歎茶!! 10大寧靜CAFE推介 |葵涌工廈食玩王

港式包進化! 全港4大菠蘿包漢堡大比拼 |Food Battle|