飲食鐳台打出名堂@Dining娜
而家的確多咗女仔學泰拳，我都有個姐妹開始接觸，志在做運動出下汗。我本身對泰拳認識唔多，但佢近排就推薦咗嗰地方，仲話食得又「打得」，咁神奇？原來係一位香港拳王杜恆霖（Bryan）開嘅餐廳。呢度格局似「拳館」，真身竟然係「菜館」！Bryan打完泰拳鐳台，今年打埋上飲食鐳台，開咗呢間拳王泰國餐廳，聽講仲入圍今年「全港必吃食店」選舉，梗係要會一會佢。
食住泰菜睇打拳
Bryan喺2006年榮獲香港拳王兼香港十大傑出運動員，仲代表香港挑戰過好多國際賽事，拎過2屆WMC洲際拳王、WMC I-1亞洲拳王、IFMA世界賽51公斤級冠軍、香港51公斤級泰拳拳王、力保健搏擊之夜冠軍、WBC世界拳擊理事會國際冠軍……真係好打得好man，唔怪得阿C妹係咁讚啦！
Bryan決定轉戰飲食界，一方面想試試唔同嘅領域，另一方面想用一個「平易近人」嘅方式推廣泰拳，所以呢間拳王泰國餐廳裝修都下咗唔少工夫，務求令食客感覺好似置身鐳台上歎美食。
泰fusion創意美味 只此一家
好喇，講到明呢度係「菜館」唔係「拳館」，重點當然係食！Bryan因為打拳，住過曼谷同布吉等地，食過好多唔同style嘅泰菜，為咗重現正宗味道，特別搵咗位泰國大廚主理，希望可以用傳統泰菜打好根基，加入創意，「打」造出專屬拳王泰國餐廳嘅menu。
用新鮮肉蟹人手拆肉，釀入去大大粒荔枝裡面，然後淋上秘製醬汁，甜中帶鮮，而且粒粒多汁，呢款招牌菜幾乎9成食客都會點！
成9吋長嘅大頭蝦，隻隻重成100克，口感彈牙又爽甜，用秘製咖喱汁煮過，味道充滿層次，上檯時再點起火焰，賣相夠晒吸睛。
用新鮮雞製作，蒸煮後用冰水浸，肉質更加嫩滑，最後就用10幾種材料熬製嘅白鹵水浸到入味，工夫真係唔少㗎！
原個椰皇先整好燉蛋，再灑糖用火槍製成脆面，廚師仲特別用咖啡糖，甜得嚟更有層次。
大大隻肉蟹，加入彈牙豬頸肉原爐烹調，調味比較簡單，製成品熱辣辣又原汁原味。
香脆春卷皮夾住手打蝦膠，薄薄一塊入口，脆得嚟又爽口，送酒一流。
餐廳主場 泰拳活動上場
用泰拳做主題，當然唔只裝修同食物要夠feel，Bryan希望可以喺呢個主場，陸續舉行一啲泰拳相關活動，好似賽事轉播同分享會咁，希望可以凝聚到一個力量，一齊推廣泰拳！
香港18區美食有甚麼推介？
新假期編輯已經為你整合了香港18區美食指，其中包括尖沙咀、旺角、銅鑼灣等……即睇更多詳情。
