高官私房秘竇! 福記酒家搬新竇 |北角有咩好食|
廣告
數年前天后有間「福記」，主打福建私房菜，從不對外開放，若非資深老饕及幕後老闆的生意客戶，想食幾乎不可能。現在終於有機會踏足秘竇，事關他們已經移師 到北角，改名為「新福記」，將他們的私房菜公諸於世。大廚用了一年時間，走訪福建、廈門、福州等地拜師學藝，再於「福記」苦練三年，精通閩菜、粵菜。
矜貴的佛跳牆，用齊吉品鮑、日本遼參、金山勾翅、花膠、鹿筋等，湯底以雲腿、老雞、赤肉燉足十個鐘至起膠質，非常花時間。將新鮮雞起骨燉成湯汁，加入豬肚和建寧蓮子，煨兩個鐘而成的蓮子豬肚煨雞，賣相精緻，食落暖胃。經典的嫩餅菜、人手拆肉的桂花炒蟹肉，還有以火慢煎取代炸的蠔仔煎，統統都是心思之作。難怪在北角這個「小福建」贏盡口碑，更被譽為福建人的福臨門，一眾高官、名人、食家都是座上客，認真厲害！
1. 福建嫩餅菜 $268
薄如紙的嫩餅皮，放上海苔、甜花生末、芫荽和炒雜錦同食。嫩滑可口，調味不過鹹，又飽肚。
2. 招牌佛跳牆 $698/位
勾翅粗如針，花膠滑溜無比，加了花膠、鹿筋燉成的湯頭膠質極重，黏著嘴唇，醇厚而充滿鮮味。
3. 蓮子豬肚煨雞 $788（12位用）
豬肚和雞件砌成半球狀，雞肉嫩滑吸盡湯汁精華，豬肚軟而不韌，蓮子粉糯綿密。
4. 香炒桂花蟹 $328
蟹肉夠多又厚實，滲出蟹香，肉質甜嫩軟滑，配上爽口的葱白、馬蹄，層次分明。
5. 閩南煎蠔仔 $168
飽滿的石蠔混入番薯粉和大蒜再煎，蠔味突出，滑而多汁，食落不覺油膩和熱氣。
花生湯湯圓 $28/位
福建直送的花生浸過夜後煲兩個鐘而成，不甜膩，花生入口即溶，芝麻餡湯圓夠軟密。
新福記酒家
地址：北角渣華道3-5號永光閣1樓（顯示地圖）
營業時間：11am-10pm
電話：2566 5898
座位：54個
收費：午間私房菜每席最低消費$2,000、晚市私房菜最低消費$4,800
備註：須預先訂座
延伸閱讀：
唐樓優雅私房菜! 西灣河12間隱世街坊小店
$40送上門老火湯 午餐食鮑魚螺片飯 |觀塘有咩好食|
香港18區美食有甚麼推介？
新假期編輯已經為你整合了香港18區美食指，其中包括尖沙咀、旺角、銅鑼灣等……即睇更多詳情。
