【自助餐放蛇起底組】Asahi+梅酒任飲! $188周末蒸鍋刺身放題

熱話

廣告

天氣暖番少少,食日式放題又凍咗少少,今次呢間有蒸氣鍋,啱哂乍暖還寒嘅天氣。星期六、日都只係$188,仲有酒類飲品任飲,抵!即刻試吓有無伏。

蒸氣鍋等足16分鐘 海鮮帶腥肉質差

放題總係分唔同入座時段劃分價錢,今次2小時放題由5:30入座,講明食到7:30就要交枱,食物上得慢啲,都食得趕趕哋。點知入座後,個蒸氣鍋等咗16分鐘先上枱。

落單都係剔紙仔,一本過揭哂前菜、刺身、夀司及天婦羅等等食物,而蒸氣鍋就有另一張紙填,牛肉及雞肉等基本肉類,而海鮮就有帆立貝及蜆,蔬菜就有小棠菜、鮮冬菇及南瓜。

肉類來到見到個樣都知唔多對路,牛肉一夾,一片厚、一片薄到爛咗,豬肉唔係豬腩片,真係豬肉片,得雞肉個樣最對路。蒸完出來,結果符合外觀推測,牛肉、豬肉都係堅嚡口。Sorry,我真係食唔落,吞唔到。

帆立貝及蜆都係好細隻,自己去街市買,應該都會大隻過佢,睇落都唔係新鮮貨。果然,食落係有陣腥味。唔……落番提供韓式辣醬及蒜蓉等,每樣加啲味,都應放入到口,但標榜日式蒸氣鍋呢,感覺韓風多啲,還是沾芥末吧。

 

刺身壽司新鮮 但說好的鵝肝呢?

刺身都算正路,來得啱數又快手,三文魚厚切又肥美,油甘魚脂肪分佈得ok,但雕魚就無咩味,腥腥哋。甜蝦蝦殼黐住啲蝦肉,帶子size唔大,但成隻完整,無再慳皮薄切,食落都甜美,算係咁啦。

受歡迎嘅吞拿魚無得揀刺身,淨係可以叫壽司,不過見到真身時,睇來師傅刀功麻麻哋,切到啲肉好霉。其他卷物算係符合圖片說明,要芒果有芒果,要芝士有芝士,但最期待的鵝肝帶子卷,說好的鵝肝呢?一定係消失於無形之中,卷中只剩孤獨的青瓜。

串燒店開到成行成市就知道好受歡迎,放題必食之一,點知又失望了。牛舌用鹽、黑椒調味,但肉質嚡,肉汁少。豬腩片,諗住有豬腩肥位無死錯人,點知瘦肉位嚡到起渣。以為雞翼實無死啦?點知都係dry。得燒蝦比較可取,燒得個殼脆卜卜,但肉質都係燒過火。

轉戰海鮮類,燒蠔望落調味重手,殼大蠔肉細,少少腥,調味救番。燒帆立貝重口味,食落味道正常,但竟然有沙。

超值回本 任飲酒精飲品

最回本係任飲啤酒、清酒及梅酒,啤酒仲要堅係Asahi,唔係雜牌啤酒。超市買六罐都要近$50,出街飲更無幾十蚊都飲唔到,飲多兩罐,再包埋食一餐,都算幾抵。清酒及梅酒都無伏,清酒襯刺身、壽司一流,梅酒偏甜,啱哂絲打,怕醉仲可以加冰飲。唔飲酒?飲品選擇都幾多,連果汁先生都有,仲有清熱飲品,食完天婦羅、串燒飲夠下火。

失望!雪糕得雀巢芝麻味及雲呢拿味

有啲放題都會有靚牌雪糕食,但限一人食一個,呢度就得雀巢,唯有當回憶童年味道啦。好在有雪米糍食,無咁失望。其他甜品仲有奶凍同日式果凍,個樣都唔日式,似港式雜果啫喱,味道與想像都一樣,甜甜哋,無驚喜。

總結:環境方面,梳化位及卡位多,旺區來講算闊落,但蒸氣鍋佔枱面唔少空間,不時無位放食物。食物算快手上枱,但串燒太乾身,上枱已唔夠熱,蒸氣鍋食材又唔新鮮,係得刺身、壽司及天婦羅唔錯。勝在有酒精飲品任飲,酒鬼飲多幾罐都抵番,不過明明限時兩個鐘,但侍應在半個鐘前,已經來收錢同last order,要扣分。

總分:6.5/10

築地番本日式放題

地址: 旺角通菜街1A-J號威達商業大廈Deli 2 一樓B室(顯示地圖)
電話:2336 8350
$188晚市放題供應時間: 星期六及日:5:30pm-7:30pm
收費: 成人:$188
備註:收加一

 

延伸閱讀:

【18區掃食】太子直擊 爆膏蟹皇飯+肥厚菜甫蛋pizza

|18區掃食|深水埗8大惹味店 芝士雞髀保齡球