索馬里海盜絕跡?!?! 全靠一位日本人
「消滅」海盜的來龍去脈
木村清貴為大型壽司連鎖店老闆，所以都會定期去漁市場進行競投。但係，佢慢慢發現店內所使用嘅高級吞拿魚品種－「黃鰭吞拿」越標越貴，查訪之下，先發現原來「黃鰭吞拿」嘅漁場就位於索馬里外海，亦即係當年海盜最猖狂嘅地方，而亦因為咁而令到漁船怕被搶劫，而令到「黃鰭吞拿」供應量愈化愈少，個價因此推到愈來愈高！
於是，佢就把心一橫，同海盜們進行談判！講到呢度，記者已經覺得佢係個神人！木村清發現，海盜們都係因為生活艱難，為咗要維持生計先要向漁船進行搶劫。後來，佢就提議，海盜們可以到外海灣捕捉吞拿魚嚟搵錢養家，靠雙手而令自己同屋企人更有尊嚴地生活！其後，木村清亦為張羅幫助佢哋成事、「改邪歸正」嘅方案。木村清將旗下嘅漁船借畀海盜們，同時，亦向佢地傳輸捕魚技術、安裝凍倉，更加協助索馬里盟IOTC （Indian Ocean Tuna Commission）令佢哋可以成功向外銷售吞拿魚。
木村清後來更同海盜們達成協議，保證全數收購所捕獲嘅吞拿，以確保佢哋嘅收入。縱然，木村清表示，呢門同海盜們合作嘅生意一直維持虧損狀態，佢亦願意做，原因亦只有一個，就係：「做生意唔能夠只顧眼前利益，亦唔能夠只顧賺錢」。木村清呢一舉除咗可以拯救索馬里海灣同班海盜之外，仲可以帶返啲高級黃鰭吞拿返嚟畀我哋享用，真係抵索馬里鄰國吉布當向佢頒贈勳獎，記者都好想多謝你呀！
木村清同索馬里海盜嘅故事真係有血有淚，仲誇張過電影《加勒比海盜》！
木村清究竟有咩來頭？
木村清為被譽為日本第一連鎖壽司店－壽司三味嘅老闆，由1979年起已開始以「木村商店」之名，開發及製造各式各樣嘅便當、壽司素材，其後加入銷售。於2001年4月於築地場外市場更開設「壽司三味總店」，其後亦於日本各地開設共63間分店，非常受日本人歡迎！
雖然大家都話同樣咁出名嘅大和壽司若然值100分，壽味三味就值95分，但見到老闆咁賣力幫海盜、又成功幫大家爭取返黃鰭吞拿魚返嚟，大家下次去日本旅行，都不妨一試呢間咁由呢個有情有義老闆所開嘅壽司店！
壽司三味
總店地址：東京都中央區築地 4-11-9（顯示地圖）
開放時間：24小時營業，年中無休
日本其他地區分店：http://www.kiyomura.co.jp.t.sv.hp.transer.com/shops/search/
延伸閱讀：
