$100任食醬油蟹!!! 韓國地膽美食推介(上)
$100任食醬油蟹!!! 韓國地膽美食推介(上)

$100任食醬油蟹!!! 韓國地膽美食推介(上)

韓圜低處未算低,個個都想趁住假期去返轉,掃貨濕平之餘,仲要食勻今期首爾潮食。不過韓妹韓仔太花心,唔新鮮唔鍾意,前一陣子仲興梗的詹姆士芝士排骨,今日只係淨得遊客會去朝聖,換畫速度快過換囝囝。究竟今期韓國人食緊咩?就由一班韓國地膽帶路,推介心水餐廳,食勻最平,最好味的韓食!

地膽

掃街小食篇

香港地鍾意趕絕小販、小店,不過韓國小食檔就開到成行成市,遊客去到必定掃返一圈!街邊檔和小店仲會不時變變新花樣,一於由地膽介紹今期掃街之選!

人人爭住手臂伸延

Mozzarella 漢堡

拉芝度:★★★★★

近年韓國餐桌出場率最高的潮食,必定要數芝士!韓國人對芝士的瘋狂程度,由去年頭大熱的「詹姆士芝士排骨」,燒到今年都依然繼續「拉芝」!韓國快餐店Lotteria 去年底推出一款全新的水牛芝士漢堡,一開賣就憑住強勁的拉芝長度成為網絡熱話!漢堡標榜採用 99.9 % 全天然芝士,加上即叫即製,柯打之後要等約15分鐘,打開只見兩塊炸薯餅,原來其中一塊是薯仔皮釀入水牛芝士,輕易一拉,就做到拉芝效果,記者現場實測拉到30cm!不過,媽咪教落唔好玩食物,因為冷卻的芝士特別難入口,反而趁熱食,薯仔皮脆卜卜,加上芝士質感輕軟濃味,好感動!拉芝漢堡非期間限定產品,之後去開韓國都繼續有得食!

最新吃喝玩樂資訊