求婚
求婚

旅行 求婚 必勝法! 愈老土愈鍾意?@杜遊珍

博客

廣告

阿珍最近有Wedding Planner朋友D 做做下轉行做求婚策劃師,全因港人呢期追求求婚的霎時浪漫,反而結婚擺酒都係為應酬屋企喎,仲話旅行求婚必定成功,未試過失敗,因港女會覺得計劃行程已經夠煩,仲咁有心思plan 求婚先最Surprise!

6千起跳 最愛首爾墾丁

朋友D 話海外求婚套餐的最低消費為6千幾蚊,包度橋、場地聯絡、泡泡機、投影機等和專人駐場監督,機票同攝影師就要另計。而港人的求婚熱選地是首爾和墾丁,仲話有埋泡泡同播放二人愛情故事的韓劇情節最多人受落𠻹!佢就試過幫個客人豪花4萬買40隻鬆弛熊到台灣求婚,女仔入到酒店房見到個畫面已經喊住講「I Do!」。想自己搞?都得,朋友D 就提醒要查清楚當地拍攝有無手續要搞,如在首爾塔影求婚,就要入紙申請,否則被人趕扯,絕對無癮。

高空求婚 各處航空各處例 

阿珍都聽過出名服務周到的航空公關講,試過幫個印度客在A380求婚,布置頭等包廂的床位兼送上香檳加紮花,又夾晒計呃女友話upgrade 佢去頭等,咁配合,鬼咩,畀咗兩張頭等艙機票錢嘛!相比起本土航空的求婚服務,只得機師同空姐的簽名賀卡,蛋糕香檳要加錢另購。而魚翅航空更唔鼓勵你求婚,話驚騷擾其他客人,態度簡直差天共地喎!如果想搞,事前真係要問清問楚呀!

低調的法式浪漫

女友唔鍾意咁高調?法國「SnapLove 」狗仔隊就啱晒!可以安排跟蹤拍拖、偷拍求婚過程,成功時攝影師先會走出來影多幾張,成個服務盛惠€400/HK$3,426,包保無群眾壓力,又可留住溫馨一刻。
延伸閱讀:

#RIPKA 港龍圓寂的4個感想 @杜遊珍
機上食好西! 自備飛機餐貼士@杜遊珍