【自助餐放蛇起底組】 $128深宵放題 椰子雞煲火鍋食足4粒鐘

麻辣雞煲食得多,椰子雞煲你又食過未?今次就帶大家去深水埗食宵夜,10:30pm入座,雞煲+打邊爐食到凌晨3am,食足4.5小時,都只不過收$128,咁抵玩!喺邊先?立即去片!

任食前菜 冷熱盤質素ok

椰子雞煲有兩款,想食濃味啲可以揀海南椰子雞煲,想食清甜啲可以揀椰青椰子雞煲。(其實除咗椰子雞煲,呢度仲有重慶麻辣雞煲和烤魚揀。)

雞煲未到,去自助區最取無食前菜,過下口癮先。有近10款冷熱盤,冷盤有蒜泥白肉、鹵水豬耳絲同手拍青瓜等,熱盤就有咖喱魚蛋、鹹菜豬肚、沙薑雞腳同炸春卷。蒜泥白肉有辣汁同蒜泥喺旁邊,自己食幾多加幾多,不過就幾塊肉痴埋一嚿,逼你一連食幾嚿。咖喱魚蛋豬皮索晒咖喱汁,辣辣地好食,魚蛋已經進入腍嘅狀態,扣分。鹹菜豬肚爽口,但同沙薑雞腳一樣,都唔夠入味。

01
今次要試下濃汁惹味嘅海南椰子雞煲!
A2
有5樣冷盤,有蒜泥白肉同手拍青瓜等。
A3
熱盤有咖喱魚蛋、鹹菜豬肚、沙薑雞腳同炸春卷。
07
蒜泥白肉好多嚿肉痴埋晒,用夾係分唔開佢哋囉。
03
逼人食咁大嚿。
A10
鹹菜豬肚同沙薑雞腳都唔夠入味。
A4
咖喱魚蛋咖喱汁辣辣地,豬皮好爽口而且索晒啲汁,不過魚蛋已經有啲腍。
02
飲品任飲,有汽水同啤酒。

越耐越甜雞又滑 狂食牛豬羊回本

等咗15分鐘,雞煲終於上枱,雖然唔似重慶麻辣雞煲一上枱就勁惹味勁開胃,但也有陣陣椰香飄散。雞肉唔嚡,好嫩滑,椰漿都入味,食頭嗰嚿可能覺得一般般,不過呢個雞煲越食越甜,煲到尾啲雞肉都無韌,keep住滑,抵讚,想勁encore食多煲!兩個人有半隻雞,不過雞件都比較多骨少肉,份量僅僅夠,想啖啖肉就難啲啦!

A7
椰子雞煲啲雞好滑,而且越食越甜,雞肉充滿椰漿味,好正!!!
A9
可惜呢,雞肉骨多,肉比較少,想啖啖肉有啲難度。

食完雞煲就加湯打邊爐,邊爐料喺落紙仔order,有77款,肉類除咗牛、豬外,仲有羊肉,另外有花膠、牛骨髓、雜丸、自製雲吞同餃,海鮮就少啲,可主攻肉類回本。肥牛有肩胛肥牛,脂肪比較少,食落好有咬口,而且吸埋湯底椰漿味,牛肉味中帶陣陣香甜,好正!豬就用黑豚肉片,食落完全唔韌,羊肉好有彈性,頭兩啖有羊膻味,三款肉都唔錯。溫馨提示,所有肉片都切到好薄,夾起小心佢爛,淥太耐小心會韌!

08
有成77款打邊爐料,肉類、牛骨髓、雜丸等等都有,係海鮮類少啲。
A12
肥牛用肩胛肥牛,脂肪少啲。
A11
仲有黑豚肉片(右),同埋羊肉喎!

火鍋配料滿意 雀巢雪糕任食

牛骨髓好滑,似食緊腸粉,無雪味;花膠好重膠質感,食得過!台式芝士蛋未見過喎,仲以為會好似港式芝士丸咁爆漿,但原來唔喺,有芝士粒粒喺入面,食落口感QQ得嚟有芝士味慢慢爆下爆下,好似食緊爆炸糖咁,幾得意!自製雲吞同餃類都唔錯,菜肉雲吞皮有少少厚,木耳水餃超正,入面仲有紅蘿蔔粒、豬肉,超爆餡,好好食!!

04
牛骨髓同花膠都唔錯,前者滑似腸粉,後者膠質感超重,記住要食!
05
台式芝士蛋有粒粒芝士喺入面,食嗰陣彈下彈下好得意!
A13
自製菜肉雲吞同木耳水餃都唔錯,但如果菜肉雲吞嗰皮薄會好啲
06
兩個都超爆餡
09
甜品有巢雪糕任食。

 

總結:雖然前菜味道一般,但主菜椰子雞煲有驚喜!超級香甜好好食,而且邊爐料選擇多+質素唔錯。環境坐得舒服,就算爆場,都好闊落,hea幾粒鐘無問題,而且$128仲要唔收加一,食足4粒半鐘,超抵玩,所以今次都值得俾高分!

總分:8.5/10

A14
樓底勁高,環境闊落。

A15

A1

滿堂紅雞煲烤魚特式火鍋

地址: 深水埗青山道29-33號永勝大廈地下(顯示地圖)
電話: 2618 0888
營業時間:1pm-12mn
收費: 晚上10:30pm後入座:$128
星期五、六、假期前夕每位加$10
用餐時間:10:30pm-3am
備註:不收加一

延伸閱讀:

|18區掃食|深水埗8大惹味店 芝士雞髀保齡球

【自助餐放蛇起底組】旺角$158任食 芝士x部隊鍋

最新吃喝玩樂資訊