|18區掃食|深水埗8大惹味店芝士雞髀保齡球

Q: 香港18區美食有甚麼推介？

新假期編輯已經為你整合了香港18區美食指，其中包括尖沙咀、旺角、銅鑼灣等 ......即睇更多詳情。

Feb 18 2016

深水埗超多好嘢食，今次發現超邪惡嘅芝士x生炸雞髀x炒飯農夫包，芝士fans mark低去啦，仲有韓式年糕炸雞杯、極平車仔麵、食唔停口嘅黑椒牛肉漢堡，唔講咁多，即刻帶你食盡深水埗！

西九Food Court 年糕炸雞x小丸子

Food Court內的食肆，大部份都係連鎖店，西九龍呢個就有啲唔同，好多特色小店，今次小編精選咗兩間抵食小店，如果你想食韓式正宗炸雞，嚟呢間！小店雖由韓國人主理，但店主都識聽同講少少廣東話！炸雞即叫即做，將雞髀肉去骨後先炸一次，然後再加入韓辣味、醬油味或甜辣味醬汁再作二次翻炸，件件外脆肉嫩，可選擇大、中、小三個分量，價錢由$33-$75，幾抵食!炸雞杯更會多送兩件韓式年糕，煙煙韌韌，滿足！不過想食就要早少少去，賣晒就無，通常6-7點就會收舖嫁啦！

醬油味炸雞(小)$33 小份量都炸雞都有8-10件，女仔嚟講夠埋飽肚嫁啦！重送多兩件年糕添！

皇帝雞

地址:深水埗欽州街37號西九龍中心8樓美食廣場8F-17號舖(顯示地圖)
電話:從缺
營業時間:12nn-6pm

章魚小丸子曾經hit到喺超市都有得買，不過呢幾年買少見少，仲越賣越貴，估唔到呢度又有！$20/9粒，新西蘭章魚粒夠爽口，外皮脆卜卜，一啲都唔油膩，配埋燒汁、沙津醬同紫菜，簡直超抵食！另外，小店亦瀰漫著陣陣牛油香氣，原來亦兼賣比利時窩夫，用上足料麵粉、澳紐牛油同奶品製作，口感厚實，不會滿口空氣感，有多款醬料作topping，一定要趁熱食啊！

比利時窩夫$10 窩夫用上澳紐牛油及德國酵母粉製作，非常香脆，一定要趁熱吃！配埋足料黃梅果醬，酸酸甜甜幾滋味。

French Corner

地址:深水埗欽州街37號西九龍中心8樓美食廣場8F13號舖(顯示地圖)
電話:2430 9892
營業時間:12nn-8pm

堅好食！港式黑椒牛肉漢堡

十個行經呢間港式小食店嘅，十一個都會俾佢陣肉香味吸引，然後順手入去買個包食。所有包款都是即叫即製，牛肉、雞扒都係即煎，俾啲耐性等陣啦，成日有人龍嫁！招牌必食黑椒牛肉漢堡，手打牛肉牛肉味超香濃，食落黑椒味慢慢慘出，更惹味！另外雞扒飽亦係一定要食之選，塊雞扒厚度十足，肉質好滑，配埋千島醬，無得輸！！！真係咁好味！如果夜少少7:30後去，仲有燉湯賣添！每日都唔同嫁！

黑椒牛肉漢堡 $15 黑椒牛肉焦香滿溢，未食濟聞經已超滿足！一咬落去肉味香濃，停唔到口！

雞扒飽(千島醬) $15 唔講咁多，雞扒飽一啲都唔輸蝕，你睇嚿雞扒幾厚就知，千島醬仲要多到瀉出嚟，好想encore食多個！！！

添福小食

地址:深水埗長沙灣道80-82號文海樓地下A1舖(顯示地圖)
電話:91969823(whatsapp)
營業時間:星期一至六: 12nn-12mn，星期日休息

$40有找 6餸車仔麵連豆漿

呢間專賣車仔麵同港式小食的店子，開咗4個月已經成為街坊同學生食堂。老闆娘Gigi每朝八點就返舖頭準備，店內車仔麵四款醬汁沙嗲、辣汁、大辣咖喱同特辣麻辣都喺自己整，大部份車仔麵餸都自己買同炆煮，無味精，食落就更滋味啦。Gigi每次自己去吃車仔麵時都非常貪心，每樣餸都想試下，而佢覺得食麵一定要飲嘢，所以招牌車仔麵套餐包6款餸咁多，仲送杯細豆漿，都只不過是$38，難怪咁多街坊都成日去食！

6餸自選車仔麵(送細豆漿) $38 滷水雞翼、長洲大魚旦、豬腸、蠔油冬菇、秘製牛腩同咖喱翼尖配油麵，大碗夾抵食，記住加埋Gigi自製的辣菜甫，少少辣，好味！

自選6餸蝦子撈麵(送細豆漿) $41 麵底加上蝦子，配以糖心籮蔔、豬紅、豬皮、咖喱螺肉、麻辣豬耳同酸甜齋，籮蔔夠大件，而且夠香甜，必食！

白雲豬手 $9/2件雖然食車仔麵都可以點白雲豬手，但唔少人都會叫多2件食，非常爽口，陣陣醋味好開胃！

小排檔懷舊車仔麵

地址:深水埗福榮街172號地舖 (顯示地圖)
電話:56641990
營業時間:星期一至六: 10:30am-8pm，星期日及公眾假期休息

芝士迷注意芝士雞髀保齡球

未入餐廳門口就已經感受到呢間冰室的懷舊氣息，入到去牆上面有好多懷舊海報，好有Feel！不過嘢食並唔係頹頹哋嘅碟頭飯，店主Mike將傳統菜式加少少新意，更配合香港人嘅口味，例如將舊舊哋嘅農夫包，塞入炒飯，再加入芝士芝士芝士，配多隻生炸大雞髀，呢個芝味保齡球未食都已經夠吸引！就連飲品都寧舍唔同，招牌波波冰鎮奶茶棄用普通冰塊，用自家奶茶製成冰波，唔會淡味之餘更有影相位，啱晒後生仔相機食先！

芝士焗生炸雞髀保齡球 $68 超巨大!農夫包上放咗隻巨形炸雞髀，賣相一流，即叫即整，都要等15分鐘嫁，不過超值得！

芝士醬混合了五種芝士製作，芝味好豐富！不過雖然芝士醬係俾我地蘸農夫包食，但唔少客人都會將芝士醬蘸雞髀食囉(好邪惡!!!)。

農夫包內有個炒飯，用咗Parmesan芝士汁，確保你每啖都食到芝士！包蓋都唔馬虎，搽咗芝士同鹹蛋王，一定要食埋啊！

芝士豬頸肉撈一丁 $48 另一受歡迎之作，同樣用5款芝士汁炮製，芝味好濃郁，配埋芝士牛油厚多士，飽晒。

原味波波冰鎮奶茶 $24 飲品都超得恴，唔喺用普通冰塊，用自家奶茶整成嘅波波冰塊，就算冰融都唔會溝淡茶味，好醒目！

老鳳冰室(良記餐廳)

地址:深水埗基隆街216號地舖(顯示地圖)
電話:2660 8136
營業時間:7am-10pm

台灣feel甜品店　漫畫任睇

甜品舖通常都拿拿臨食完就俾人趕走，不過呢間翻新咗嘅甜品舖就唔同啦，入到去好似去咗台灣cafe咁，燈光頗喑，播著台灣流行歌曲，仲有好多漫畫俾你任睇，最啱悠閒地喺到hea過一日。甜品賣相好精緻，而且都幾平，心太軟$40都唔使，仲有少見嘅香蕉味，另仲有雪花冰、窩夫同拿破侖等都喺三四十蚊，甜品嚟講好抵食喎！