【18區掃食】東華嘉年華前後 九龍城 平食米芝蓮串燒
【18區掃食】東華嘉年華前後 九龍城 平食米芝蓮串燒

【18區掃食】東華嘉年華前後 九龍城 平食米芝蓮串燒

東華慈善嘉年華啱啱於啟德機場開幕,你去咗未先?但力戰機動遊戲的同時,當然要食嘢打底或者玩完補充體力!場內食價錢貴又選擇少,不如轉場近近地去 九龍城 搵食。唔好以為又係食泰菜,其實 九龍城 區內仲有好多抵食的餐廳小店,當中更有挑機之作,等我一次過話你知。

1. 免排隊 免受氣 慢歎慢揀 澳牛2.0

港式滑蛋常餐的代表,你梗會諗起佐敦澳洲牛奶公司的「光速餐」、燥底侍應,以及門外長長的人龍。今次在 九龍城 發現這間茶餐廳,門口格仔玻璃、店內餐牌似足澳牛,就連常餐上枱,賣相亦有99%相似!係咪抄襲,你講!

A4
食開澳牛的朋友,係咪覺得個餐牌好熟口面呢?

原來老闆是佐敦澳牛的兒子,經家父首肯,低調在 九龍城 自立門戶,炒蛋是澳牛秘方+自家改良,聽聞蛋漿除了結合多種雞蛋,以及最少用上300隻蛋之外,其他一律無可奉告,極神秘。而且和澳牛不同的是,這裡可以讓你揀餸配麵,除了經典叉燒湯意,更可轉為腸仔、餐肉,連轉出前一丁都唔駛加錢,正!

沙嗲牛肉絕非罐頭沙嗲牛,而是本地鮮牛肉再加沙嗲醬煮成,香濃微辣,還帶有花生粒,非常惹味,配埋爽口煙韌的出前一丁麻油麵,勁滿足!

A5
特餐 $49

另外午餐及晚市更有碟頭飯和煲仔飯,令客人有更多飽肚選擇,炭火叉燒炒蛋飯更是必食之選。

a
滑蛋葱花叉燒飯(連餐飲)$48

每日新鮮運到的半肥瘦叉燒,軟熟不韌,配合水嫩滑溜的炒蛋,蛋香極濃;葱花和洋葱更添上甜味,記住配埋甜豉油,瞬間K.O.整碟飯。

環境亦無澳牛般迫狹,侍應唔會對你黑面,又唔使食完雞咁腳趕住走,最重要是:不用排隊!簡直加爆分,無理由唔去。

A3
店內的餐桌座位都跟足澳牛,勝在可以慢慢坐,8、90年代的睇報紙歎茶光景,就此重現。

A2

聯發茶餐廳

地址: 九龍城 侯王道2-4號地下1號舖(顯示地圖
電話:2718 8832
營業時間:7am – 10:30pm
備註:不設加一、只收現金

2. 老店隔離挑機 痴線價滷水四寶飯

九龍城 除了出名泰菜和野生捕獲發哥之外,還是潮州食品的天下。潮州魚蛋、魚飯、臘味、雜貨,還有潮州菜老店「樂口福」。最近旁邊竟然開了一間潮州滷水店,擺明公然挑機。

夠膽在老店旁邊插旗,到底有咩咁厲害?原來就靠一個超級抵食的滷水四寶飯,一個飯盒內有齊滷水鵝片、豆腐、腎片及牛腱,再加例湯及汽水,價錢只是$32!在今時今日午餐埋單最少$50的時代而言,直程平到笑。

CHIU2
滷水四寶飯(鵝片、腎片、牛腱、豆腐)$32

質素都唔差,店內滲著濃郁香甜的滷水味,聞到已經流口水。鵝片啖啖肉,肥瘦適中;牛腱、腎片滷到入晒味,唔會一味死鹹,還有陣陣花椒、八角的香味。例湯同樣足料,有冬瓜、豬骨的湯料,飲落清甜,無味精湯的口渴感,抵讚。店前還有各款滷味可以買走,滷水鵝腸、鵝頭、鵝頸,送酒一流。店內由老闆一人主理,樣樣親力親為,仲會細心額外用保鮮紙包著外賣盒,以防漏汁,撐小店而言,的確食得過。

CHIU1

潮滷

地址: 九龍城 候王道1號地舖(顯示地圖
營業時間:11am – 11pm

3. 米芝蓮都Like 平價串燒黃飯

識食的你點會唔知2016年的米芝蓮新增了街頭小食推介?其中一間榜上有名的就是 九龍城 這間蘭英印尼小食。主打沙嗲串燒、黃薑飯、印尼炒飯及巴東牛肉等的平民印尼小食。其自家製的沙嗲醬是精粹所在,夠濃稠,連埋花生緊緊黏附在串燒上,好大嘅誘惑呀!

想一次過食晒這裡的招牌菜,嗌個串燒黃飯就啱晒。大大碟、熱辣辣的黃薑飯色澤靚,飯香而粒粒分明;再可以任揀兩串串燒,推介爽滑油香的豬頸肉,以及彈牙軟綿的花枝丸,三者結合勁滋味,價錢亦唔貴,埋單$30食到飽飽。

LY2
串燒黃飯(豬頸肉、花枝丸)$33

嫌唔夠喉仲可以追加串燒,每款串燒都只是$5 – $14,你平時喺旺角、深水埗「四個喜」食一串都唔止呢個價。

LY1
印尼串燒 (左起:雞肉$11、火雞腎$11、蟹子包$13、牛肉$11)

堂食環境雖然要坐後巷,但米芝蓮評審們都坐完再大力推介,唔係唔去朝聖打個卡呀嘛?

LY3

蘭英印尼小食

地址: 九龍城 福佬村道92-94號(顯示地圖
營業時間:11am – 12mn
備註:只收現金

4. 膽固醇警報 小店流心三蛋煙肉堡

啲人成日問「有雞先?定有蛋先?」,計我話Why not both? 九龍城 這間小店的招牌菜就是多款百變的雞蛋料理和烤雞,簡直是雞蛋迷的福音!
話明係雞蛋料理,當然會有常見的Egg Benedict、奄列,但最特別的是這個招牌蛋堡壘!用煙肉好似城牆一樣圍住三隻雞蛋,以焗爐焗成半熟狀態,三隻蛋黃脹卜卜,用叉輕輕一拮,迅即變成蛋黃浴池。用來蘸薯條或自家製香草麵包,幸福得來又邪惡到爆!食厭All day breakfast用呢個來做Weekend brunch都唔錯。

CE8
招牌蛋堡壘 $72

CE3

另外仲有澳洲有機烤雞,有齊1/4隻、半隻、全隻三個size,咁就可以同honey食半隻;一大班friend開心全隻烤雞,夠晒flexible!烤雞用上簡單的海鹽、黑椒調味,食時蘸上自家製的牛骨燒汁,皮脆Juicy的雞肉即刻變得更美味。在英國及澳洲食過N字頭烤雞而念念不忘的小記表示,這個可以止住癮先。

CE6
香汁烤雞(半隻) $125
CE2
紅磚牆的設計,很有外國小店的風格,牆身的雞仔裝飾亦很貼題。

CE1

Chicken n Egg

地址: 九龍城 打鼓嶺道79號地下(顯示地圖
電話:9383 5742
營業時間:12nn – 3pm; 6pm-9pm(星期一及星期三至五)
10am – 3pm; 6pm – 9pm(星期六至日及公眾假期),逢星期二休息
備註:設加一、只收現金

5. 韓風吹入 輕盈炸雞下午茶餐

九龍城 這個美食地域,無論是泰國菜、中菜,甚至清真菜,都總會講得出幾間。唯獨近年橫行香港的韓國菜,在這區竟然少之有少。近期終於有韓風登陸 九龍城 ,繼炑八韓烤之外,最新有這間Uncle Padak,和西環店一樣,主打韓式炸雞等的料理。

坊間大部份韓式炸雞都有一個通病,就是:太大碟!兩個人食唔晒之餘,亦試唔到其他菜式,非常可惜。這間炸雞店就推出的炸雞下午茶餐,包括原味無骨炸雞件、醬油炸雞翼、韓式飯糰及沙律。份量輕怡,無咁罪疚之餘,仲可以追加其他食物,一舉兩得。炸雞難得地唔油膩,最起碼唔會成嘴油,食完都唔覺得涸喉,內裡的雞肉不會炸到變乾柴,還帶有肉汁,抵讚。價錢頗經濟,整個Set連飲品只是$53,以韓式炸雞而言,算抵食。

KR3
韓式炸雞下午茶(連飲品) $53
KR2
聽著店內的K-Pop食炸雞是基本動作吧!

KR1

Uncle Padak

地址: 九龍城 福佬村道19號地舖(顯示地圖
電話:23822938
營業時間:12nn – 10:30pm
下午茶供應時間:2pm – 5:30pm
備註:設加一

6. 懷舊焦香石磨豆花

講起 九龍城 豆花,大部份人都會想起那間「公」字頭,可是同區仍有另一間老字號,實力足以挑機名店。所講的就是這間義香豆腐食品,多年來自家製豆腐、豆花和豆漿,足足50年。
來這裡吃豆腐花,識食一定係食熱豆腐花,除了夠新鮮熱辣之外,食落還會有一陣Smoky的味道,別以為是老貓燒鬚煮燶豆花,其實那是他們以明火石磨磨豆產生的微焦香,更是坊間豆花絕少會有的味道,非常特別。而且每啖都散發濃厚豆香,輕而軟,直滑入喉嚨,是古早味的豆花。提提你,熱豆花會定時出爐,來到記住問清楚老闆娘(聽聞幾有性格),有得食先入座呀。

BEAN5
熱豆花 $8
BEAN4
寫到咁清楚,記住唔好再誤會店內的豆花喇。

除了熱豆花,煎釀豆腐也是必食之選。厚厚的豆腐很綿密,魚肉有很重的鯪魚味,絕非坊間粉多過魚的貨色,即煎又熱又香脆,好食!

BEAN1
煎釀豆腐 $10/三件

店內三寶之一的豆漿,同樣有焦香味,而且好抵飲,$13就已經有接近700mL,大枝更近乎1.25L,同場更有黑豆漿可選,啱晒各位要養顏的Ladies!

BEAN6
無糖豆漿(細) $13

BEAN3

義香豆腐食品

地址: 九龍城 衙前塱道74號地下(顯示地圖
電話:2382 5006
營業時間:11am – 8pm
備註:不設加一、只收現金

7. 奇趣味道雪糕+精緻小甜點

俾三秒時間你,講出 九龍城 區一間蛋糕名店,你的最後答案係咪T字頭?我都知佢多人認識,但區內仍有很多默默努力、值得支持的甜品小店。今次這間Le Fournil,就專賣得意味道的Gelato雪糕,有意大利黑醋、羅勒、無花果、香檳等的口味,以及的骰精緻的Mini-cake。

Gelato由雪糕店I-scream供貨出品,在眾多獨特口味之中,首推意大利黑醋,食落酸酸甜甜,味道和Froyo乳酪非常近似,幼滑中帶沙沙質感,很難忘,唔知用來蘸麵包又會點呢?另外的無花果味也值得一試,混入了大量無花果肉及果籽,食時有粒粒的爽脆口感,味道初時像士多啤梨,慢慢演化成清甜如蜜糖的味道,頗難忘。

LF3
意大利黑醋雪糕(單球)$30
LF4
無花果雪糕(單球)$30

店內更設有餅櫃,入面放滿自家餅房每日鮮製的Mini-cake,餅房多年來以出品至酒店、餐廳為主,這間是他們第一間零售店。件件精緻,睇到有選擇困難!熱門推介有法式檸檬撻和好有Frozen風格的椰林飄香,前者牛油撻底酥香鬆脆,檸檬醬清新醒胃;後者內含椰絲、奶凍,椰子味超出,夏威夷風出晒嚟。

LF2
(左)椰林飄香 $40、(右)法式檸檬撻 $38
LF1
有隻巨型熊仔在門口笑住等你,作為女仔,好難唔被吸引行入去囉。

Le Fournil

地址: 九龍城 福佬村道49號A號舖(顯示地圖
電話:2718 0755
營業時間:11am – 9pm
備註:不設加一、收現金、信用卡、八達通

延伸閱讀

撐小店!有麝自然香 請你們先喝湯|黃大仙食乜好|

|抵食餐廳錄|邪惡拉芝豬肋骨!佐敦8大高CP值餐廳(上)

最新吃喝玩樂資訊