|旺角-掃食行動組|5大新出品街頭甜品小食
|旺角-掃食行動組|5大新出品街頭甜品小食

|旺角-掃食行動組|5大新出品街頭甜品小食

除左自助餐放蛇起底組,其實我地仲有掃食行動組!行動宗旨係:瘋狂掃食19區!
旺角人氣旺之餘,仲有好多街頭小食。今次掃食行動組就同大家去掃盡新推出的旺角街頭小食,有新穎罐頭湯包裝Mocktail、果味芳香芝士撻、香濃紫薯流心酥、綠茶心太軟班戟,仲有韓式炸熱狗。依家、立刻、馬上同你狂掃旺角街頭甜品小食,掃食行動,action!

1. 芝士多到湧出來!流心芝士酥皮撻

芝士撻相信大家都食到有啲厭,要得到一班為食鬼再次垂青,就要搞搞新意思。今次介紹的依然以芝士做餡料,不過,就以酥皮焗製。這款新品北海道芝士酥皮撻,剛出爐時的芝士酥皮撻,流心程度好誇!
一咬開,熱辣辣的芝士餡會馬上湧出來,記者在試食時都有點驚嘆此流心程度。除了流心芝士酥皮撻,還有加了藍莓和榴槤的果味芝士撻。鮮果的清新,解掉了芝士的膩感,芝士撻迷隨時可以食多幾件啊!


掃食Target 1:超級流心芝士酥皮撻

旺角_candyshake_酥皮撻
芝士酥皮撻 $18。
以北海道芝士做餡,芝味香濃亦帶點點芝士酸香味。
旺角_candyshake_流心酥皮撻
一定要趁熱食,芝士餡才會有強烈的流心效果!

掃食Target 2:清新果味芝士撻 ( 藍莓/ 榴槤 )

旺角_candyshake_芝士撻
果味芝士撻熱辣辣出爐,離遠都聞到陣陣榴槤香,喜歡榴槤人士實鍾意!
旺角_candyshake_榴槤撻
榴槤芝士撻 $25
以貓山王做餡,榴槤的清香配上芝士的濃郁,兩款重口味材料的配合出奇地夾。
旺角_candyshake_藍莓撻
藍莓芝士撻 $18
藍莓鮮甜,配上濃味芝士,能解掉芝士撻的膩感。

旺角_candyshake_門口

Candy Shake
地址:旺角登打士街55號(顯示地圖
營業時間:星期一至四及日:12:00–00:00;星期五、六:12:00–01:00
電話:2110 9822

2. 冬天小確幸!街頭飲暖笠笠忌廉粟米湯

響旺角街頭想買杯飲品唔難,不過好以台式飲品為主。想要新鮮感?介紹返位於染布房街的小店。入面有暖笠笠忌廉粟米湯,湯由店主自家煲製,忌廉味濃郁之餘,質感細滑Creamy,配上粒粒香甜粟米,最啱天氣凍時來一杯,個胃暖笠笠好幸福呢!
另有以罐頭鐵罐裝住的Mocktail,方便大家在街頭上飲之餘,仲幾型添!

掃食 Target 1:暖笠笠忌廉粟米湯
店主每日自家煲製,落足料!忌廉味夠香濃,配上粒粒香甜粟米,於天氣凍的時候飲返杯,個胃暖笠笠好幸福呢!

旺角_stcastle_忌廉粟米湯
忌廉粟米湯 $18。

掃食 Target 2:潮飲罐頭Mocktail

店主會以海南島椰漿、菲律賓菠蘿汁和牛奶做飲品的Base,椰味超香濃,配上菠蘿,酸甜得來又清新。

旺角_stcastle_椰林風光
椰林風光 $28。

掃食 Target 3:超夢幻藍色漸變荔枝Mocktail

以Lychee Virgin Spirit和Blue Bacardi Virgin調製,荔枝味非常濃郁,而且將其攪勻時,會有藍色漸變效果,賣相好夢幻。提提大家,飲的時候一定要攪勻底層的荔枝濃縮糖漿,飲落就唔會好甜。

旺角_stcastle_soho7
Soho7 $28。

旺角_stcastle_門口

St. Castle聖卡索
地址:旺角染布房街18號地舖(顯示地圖
營業時間:星期一至日:12:00-22:00

3. 香濃軟滑!紫薯芝士酥皮撻

想食甜品可以到甜品集中地-廣華街。轉角位置的CoffeeJobs,開店以來以窩夫甜品、咖啡飲品馳名。不過,芝士撻實在太盛行了,他們迎合熱潮推出了紫薯芝士酥皮撻。香濃自家製紫薯蓉,配上香脆酥皮,非常吸引。除了紫薯味,亦有忌廉芝士和蘋果味酥皮撻,大家又可以有多個甜品選擇。
掃食 Target 1:香濃紫薯芝士酥皮撻

旺角_coffeejobs_紫薯芝士撻
(前)紫薯芝士撻 $28。紫薯蓉每日自家製,味道濃而不膩,略嫌芝士味不夠突出;酥皮厚度適中,夠香脆。
(中)忌廉芝士撻 $28。有忌廉芝士的微酸,餡料夠軟滑。
(後)雪糕蘋果撻 $42。蘋果粒焗至軟硬適中;熱辣辣的蘋果撻配上凍冰冰雲呢拿雪糕,冷熱衝擊著味蕾,好刺激啊!

旺角_coffeejobs_門口

Coffee Jobs
地址:旺角廣華街3號百利達廣場地下3號舖 (顯示地圖
營業時間:星期一至二:12:00-01:00;星期三至日:09:00-01:00
電話:5411 9693

4. 超濃郁!綠茶流心班戟+綠茶梳乎厘

同樣位於廣華街的甜品店:Ocio,除了窩夫,最近推出了綠茶心太軟班戟和綠茶梳乎厘,兩款甜品都以台灣綠茶配上日本抹茶粉製作,味道濃郁又帶點抹茶微甘,實行挑戰每位綠茶迷的甜品胃!
掃食 Target 1:香濃芳郁綠茶心太軟班戟
班戟皮以台灣綠茶粉調製,包著日本抹茶醬,一切開時,濃郁又帶點微溫的抹茶醬慢慢流出來,再配埋自家製以台灣綠茶粉製作的雪糕,冰火交融,刺激味蕾。

旺角_ocio_綠茶班戟
綠茶心太軟班戟 $89。
旺角_ocio_綠茶pancake
濃郁日本抹茶醬,慢慢從班戟皮內流出來,微溫的感覺,吃起來好幸福呢。

掃食 Target 2:清香綠茶紅豆梳乎厘

先以抹茶粉混合在吉士醬中,再加入蛋白,放進焗爐焗10-15分鐘,再於梳乎厘面層放上台灣綠茶粉,微甘而不膩。

旺角_ocio_綠茶梳乎厘
綠茶紅豆梳乎厘 $108。

旺角_ocio_門口

Ocio
地址:旺角煙廠街33號朗廷軒地下B舖(顯示地圖
營業時間:星期一至日:12:00-00:30
電話:2886 8903

5. Oppa坐鎮!為你炮製韓式炸熱狗!

想食韓式街頭小食,可以去呢間位於旺角花園街的韓式小吃店。紅白店面襯托下,加上韓文店名-뽀끼,韓味十足。細看店內,會有韓國Oppa老闆為你炮製韓式街頭小食。當中,有韓式酸甜炸熱狗、比炸雞更吸引的醬烤雞,仲有飽肚之選炸醬麵,店內九成材料由韓國直送,味道正宗,夠惹味!
掃食 Target 1:韓式炸熱狗
店員會先以麵包包住腸仔,再加入薯仔粒後拿去炸,炸好後於砂糖上碌兩碌,最後加上茄汁來吃。一口咬下,先是茄汁的酸味,之後是砂糖的甜味,再加上炸薯仔麵包及腸仔的口感,酸酸甜甜湧入味蕾。

旺角_bbokki_熱狗
韓式炸熱狗 $25。

掃食 Target 2:比炸雞好味的醬烤雞

醬烤雞製法比較簡單,先以炸雞方式處理雞肉件,之後加入自家製的醬汁炒大約1分鐘,完成品的味道很濃烈,甜甜的醬汁包裹著鮮嫩炸雞,好惹味。

旺角_bbokki_雞
醬烤雞 $38。

Target 3:秘製醬汁!惹味炸醬麵

炸醬麵醬汁是自家秘製的,撈勻麵條後又香又甜,麵條亦算彈牙,不過切記一定要趁熱食,放涼後味道及口感都會不同。

旺角_bbokki_炸醬麵
炸醬麵 $38。

旺角_bbokki_門口

新假期食玩報料:[email protected]
歡迎Instagram / facebook 使用#weekendhk 報料,資料一經選中會為你公告天下!
想最快接收第一手的旅遊飲食資訊?Easy
1.
先分別讚好「新假期周刊」及「新假期Jetso 」兩個Facebook專頁
2.
在「讚好」按鈕下揀選「搶先看」,搞掂!
see first

最新吃喝玩樂資訊