東華嘉年華試玩報告！4大機動遊戲有幾抵玩？
1. 全球首次登場！360度陀飛輪（$120）
陀飛輪係2015年瑞士最新研製嘅機動遊戲，由3個四方框組成，向不同方向環迴立體式轉動，睇見到暈暈哋。
刺激度：★★★★☆
離心力十足，鍾意玩機動遊戲嘅朋友相信會滿意，而且有幾秒慢動作倒吊於半空，都幾刺激！
抵玩度：★★☆☆☆
玩嘅時間都幾短，只係兩分鐘左右，但係就索價$120，雖然係全球首部，但係都略嫌有d貴。
評語：比想象中輕鬆，因為唔會撞嚟撞去，所以享受離心力嘅同時又唔會撞到好辛苦，抵讚！不過3個四方框睇嚟只係外型上嘅噱頭，因為實際上外面兩個四方框對刺激度並無影響，極其量都只係會令玩家眼花花暈陀陀。
2. 全球最高！27層樓跳樓機（$100）
相信鍾意玩機動遊戲嘅大家都一定玩過跳樓機，今次呢部係全球最高，有成80米，一定要試！連畏高嘅記者都膽粗粗玩咗次，你唔係唔挑戰呀？
刺激度：★★★★★
話晒全球最高跳樓機，當然有返咁上下離心力，想唔刺激都難！
抵玩度：★★★★☆
同主題公園嘅跳樓機唔同，呢個只會向下衝一次，唔會反覆上落，所以記住要好好珍惜嗰幾秒。不過$100玩一次世界級嘅跳樓機，都唔算太貴。
評語：由於有成80米，所以升上最高處都花咗一段時間，如果夠膽嘅，都可以趁機欣賞吓維港風光。另外，跳樓機嘅安全帶將玩家固定得好實，感覺好安全，抵讚。不過同時亦因為太實，所以即使向下衝嘅時候都唔會成個飛起，好似硬係爭咁d，冇咁刺激咁。
3.旋轉版海盜船！超級搖滾（$50）
呢部超級搖滾最高處有成30米咁高，而且一路搖仲會一路轉，每次望到嘅角度都唔同，有時可以望住對面車卡嘅玩家，有時又可以望住附近嘅景色，都幾過癮。
刺激度：★★★★☆
搖到最高嘅時間仲高過水平線，如果轉到啱角度嘅話，仲會好似成個人向下衝咁！而且最重要嘅係，雖然轉嚟轉去，但係由於座位唔會高速自轉，所以絕對唔辛苦唔暈。
抵玩度：★★★★★★
$50呢個價錢本身已經好吸引，玩完仲要發現咁好玩，大家都話玩兩次都抵呀！
評語：一睇呢部機動遊戲嘅外型，以為佢又係好似「洗衣機」咁轉到頭都暈埋，玩完實想嘔，點先玩落先發現唔暈不特止，仲好刺激，就好似一部識轉嘅海盜船咁，個個都話仲好玩過陀飛輪！
4. 6層高波浪滑梯！滑唔滑到㗎？（$40）
呢條舊年美國超級碗期間熱爆嘅波浪滑梯，玩家可以坐喺特製毛氈上面滑落嚟。滑梯人人都玩過，但係6層高嘅你又玩過未？
刺激度：★☆☆☆☆
記者試玩嘅時候，咁啱落咗幾分鐘毛毛雨，令滑梯表面有水點，所以毛氈完全唔滑，幾乎零刺激。
抵玩度：★★☆☆☆
本來$40喺嘉年華已經算係比較平價嘅選擇，不過太受天氣影響，萬一畀咗錢又滑得唔順利，就真係幾唔抵。
評語：雖然記者玩得不太順利，但係較早前稍為好天嘅時候，目測玩家們普遍順利滑落，睇落都幾好玩幾刺激，所以大家記住睇清楚天氣先決定玩唔玩。
Mandy短評
目前已經開放嘅機動遊戲唔算多，一入場嘅時候其實都有少少失望，不過好彩玩落都算刺激，總算滿足到我熱愛機動遊戲嘅心。建議大家都係等多一排先嚟會比較穩陣，因為除咗機動遊戲之外，攤位、食物等等都未預備好晒，有唔少今日入場嘅市民都表示失望，所以都係等多一段時間，run順咗再嚟玩啦！
提提你：今次嘉年華對機動遊戲嘅安全要求頗高，長頭髮記得要扎起，而拍攝器材亦都要固定喺雙手，唔可以就咁拎住。
東華慈善嘉年華2015
地址：前啟德機場跑道（顯示地圖）
日期：23/12/2015 – 28/3/2016
門票：$180 (包機動遊戲面值 $120 及 攤位遊戲面值$40 )
開放時間：23/12/2015 – 3/1/2016: 11am – 11pm ;
4/1/2016開始: 3pm – 11pm(星期一至四)、11am – 11pm (星期五六日及公眾假期)
2015 AIA歐陸嘉年華試玩報告！10大必玩機動遊戲全攻略！【中環好去處】
新假期周刊 電子書：
ios：https://itunes.apple.com/hk/app/xin-jia-qi-zhou-kan/id722179449?mt=8
Android：https://play.google.com/store/apps/details?id=com.weekendhk.newsstand2&hl=zh_HK
新假期食玩報料：[email protected]
歡迎Instagram / facebook 使用#weekendhk 報料，資料一經選中會為你公告天下！
