涮涮放題
涮涮放題

【自助餐放蛇起底組】$188涮涮鍋放題 加$50任食生蠔超巨型赤蝦

熱話

廣告

天寒地凍,食shabu shabu真係王道,不過呢間放題就行多一步,提供埋現場即製的爐端燒、天婦羅同壽司,將幾種香港人最愛的日本菜炒埋一碟,再加五十蚊仲可以任食生蠔、廣島蠔、帶子、赤蝦等海鮮刺身。到底邊間舖咁巴閉?即刻去片!

 

食涮涮鍋從來都係豐儉由人,呢度有四款牛肉種類可以揀,由美國進口牛、澳洲和牛到日本霜降黑毛和牛都有,晚市成人價錢由$188至$398不等。聽落同一般任食涮涮鍋無分別?非也!精彩在於一個價錢,除了包牛肉和湯底,仲包埋任食現場即製爐端燒、天婦羅、壽司刺身,這樣的四合一放題,基本上是圍骰通殺,以後再無麻煩友話唔啱食喇!

 

一坐低就點了牛肉和湯底,就把握時間覓食去。餐廳內的開放式廚房三為一體,壽司刺身、天婦羅和爐端燒三大分部並列,想食乜就同師傅講,全部即場製造,夠晒新鮮。因為製作需時,建議先點天婦羅和爐端燒,然後去拎壽司刺身,回頭就有熱辣辣的燒物同炸物等緊你,邊食邊等主菜上,既方便又快捷。

爐端燒以海蝦同雞翼最受歡迎,另外還有牛舌、雞肉、翠玉瓜等,種類算多。

 

燒海蝦用粗鹽調味,十分香口,蝦肉彈牙,不過略賺偏鹹。雞翼係絕品,燒得透,面夠香脆,咬落去直頭聽到脆皮聲,入面肉質仍然嫩滑,仲好多汁,真心推!

 

當日所見,天婦羅部有海蝦、茄子、蕃薯和菇可選,款式大路。

 

天婦羅炸漿不厚,而且緊附在食材上,冇離罩,抵讚。厚切茄子表面以刀割開,讓滾油滲入內部,所以炸得透徹,食落不會外熟內生。

 

8款壽司放在一起,款式和份量儼如一個小小的壽司便當盒,三文魚壽司全部選用腩位,係小驚喜位。不過壽司飯不夠醋味,而且較硬,待改善。

 

刺身有三文魚、馬刀貝、八爪魚等,最開心係連象拔蚌都有,係坊間放題比較少見,食落都算鮮味,口感軟綿,絕對唔會韌到吞唔到。

溫馨提示:其實我們是來吃牛肉涮涮鍋的。小記在4款牛肉當中,選了最底價那款$188美國進口牛,湯底則有8款之多,我們就點了聲稱是用大豬骨熬製的骨膠原豬骨湯底。主菜齊集,開餐!

牛肉上枱,外觀就麻麻,雪花分佈不平均,但份量很大,兩個人竟有三份牛,不用瘋狂追加。

 

雖然外表扣了分,不過味道反而唔錯,牛味重,肉質滑,無筋,又不像劣質牛肉韌到咬唔開,唯獨缺了點油脂香,不過以它是全場最平的種類來說,已經非常理想,性價比OK!

 

千喚萬喚還未出來,說好的海鮮大盛呢?原來是要每人加$50才可追加指定海鮮刺身的。放蛇當日,桌上沒有放著升級海鮮的菜單,幸好事前有做功課,才向侍應取得點餐紙,一般顧客很可能錯過這優惠,店主應該要細心點呀!

升級後可以任食海鮮火鍋配料:鯛魚片、廣島蠔、帶子、蝦和蜆。當中最滿意帶有海水味的蜆和滑溜完整的廣島蠔,帶子則因為肉身細、裙邊韌而被扣了點分。

 

刺身方面,有生蠔、赤蝦和帶子,小記沒想到在涮涮鍋放題店吃到的刺身,竟有如此水準!赤蝦有手掌般長,鮮甜厚肉;生蠔食落creamy,雖有少許調味,但霸道的蠔味和海水味更勝一籌,要瘋狂encore!而且食幾隻真係回晒本!而帶子又一次輸了,肉厚但毫無鮮味,反而有像鹽水的奇怪鹹味,不吃也罷。

平日食涮涮鍋,最多有雪糕、乳酪,加幾件凍餅就算是飯後甜品,想不到這裡連甜品都很出色。餐廳請來半島酒店前餅廚製作甜品,真心有誠意。

在云云甜品中,亮點是這個山梨縣特產,有「夢幻和菓子」之稱的櫻花水信玄餅,水漾欲滴的球體內,封存著一片粉櫻花瓣,外面加了點黑糖漿,吃起來清甜解膩。

 

水信玄餅天生易溶,如在室溫下,只有三十分鐘壽命,所以它只可被放在雪櫃內,夾甜品的時候,記得去雪櫃搵佢喇!

 

其他甜品都是一口size,可以全部試勻,可惜全部款式都沒有名牌告示,到底吃了甚麼都不太清楚,這點必須改善!

 

至於飲品,林林總總有20多款,其中不乏特色飲品,有選擇困難症都唔知點算。

這裡有幾款坊間少見的飲料,如最左邊的香檳味黑松汽水、康師傅出品的冰糖雪梨,以及右邊的韓國啤酒,跟得上韓風又有聖誕氣氛,有趣。

 

唔止連好少見的思樂冰都有,仲要有兩隻味,選擇也太多了吧?

 

總括來說,雖然呢間放題價錢貴咗少少,但物有所值。除了海鮮質素好,燒物、刺身、甜品都在水準之上,加上refill和上菜也快,服務很好,整體性價比高,絕對可以encore!

總分: 9/10

 

八幡屋涮涮鍋

地址:旺角彌敦道628號瓊華中心12樓全層(顯示地圖
電話:2151 9918
營業時間:星期一至日12nn-12mn
放題時段:12nn-4pm;5pm-12mn (限時90分鐘)
放題收費:午市 成人$138-$238,小童/長者$108-188;晚市 成人$188-$398,小童/長者$148-348