【自助餐放蛇起底組】$128 中環茶記放題 雞髀什扒任食
超過30款任食選擇
餐牌數埋數埋，唔計飲品，總共有超過30款，西式有齊意粉、焗飯、鐵板 扒、沙律；中式則有點心、盅飯等。但係餐牌上仲有少少規則須要留意，例如每位客人一次只可柯打三款食物，飲品則不限，另外為了避免浪費，客人需要吃完一輪食物，才可柯打第二輪。所以限時90分鐘，其實不算太多，要好好把握！
前菜小食！首選點心
食放題冇理由，一開波就食粉麵飯，好在餐廳小食選擇頗多，有雞翼、牛腩、點心、油菜，甚至西多士。筆者食過之後，覺得最有水準都是點心，每一款都是新鮮蒸製，用料和味道都拍得住大酒樓和市面上的某些點心連鎖店，茶記有此質素，好難得！
燒賣、蝦餃、牛肉、叉燒包等基本款式都齊。筆者試了山竹牛肉和鵪鶉蛋燒賣；牛肉形狀唔會圓碌碌似牛丸，應該是廚房自己造，食落肉質軟嫩，亦加了芫荽、馬蹄，不錯！至於，唔係周圍有得食的鵪鶉蛋燒賣，就有蝦、有肥豬肉，加埋原粒鵪鶉蛋，雖然膽固醇超標，不過食落確係甘香豐腴，讓人食不停口！
好食還好食 主菜太大份
食完小食，輪到主菜，餐廳上主菜大部份都是粉麵飯為主，由一般西式焗飯意粉，到中式盅飯、海南雞飯都應有盡有，其中最吸引人的莫過於鐵板扒餐，每份都是用熱辣辣，吱吱聲的鐵板上，回本必試！
哇！真係好豐富！估唔到任食什扒都咁足料，有齊廚師腸、薄牛扒、豬扒、雞扒、薯菜，雖然都是大路茶餐廳貨色，但是件件都好大塊，雞扒連皮、豬扒有骨，配著黑椒汁食，亦冇雪味，過得去啦！
餐牌上面有大路野，亦都有特別的懷舊菜，好似這個 雞髀 頭抽撈丁，餐廳不惜工本用本地九龍醬園出品，比市面上同類出品貴同靚，連陸羽此等高級酒樓都用，手掌咁大，又厚肉的 雞髀 ，醃得全隻黑漆漆，有光澤，食落又甜甜地，唔會太鹹；丁麵除咗用頭抽撈，食得出仲落咗蔥油，加上又煮得夠爽，可以Encore!
除咗港式西餐之外，主菜都有盅飯等中式選擇。飯盅設計亦相當貼心，有上下兩層，上層是係餸，下層係飯。蒸煮時上層的肉汁精華會從特製的小氣孔滴落到下層的 蒸飯中。比起傳統的盅飯更為整潔，唔會令飯粒過鹹。另外，餸菜其實都幾靚，好似臘腸用的是元朗自設大工場的榮華臘腸，食落甘香，寧舍不同！
不過，主菜略嫌真係太大份，而且唔可以減份量，我同攝記食左三個主菜，真係唔洗再食其他嘢！好彩筆者試食當天冇食晏，仲可以食返個甜品翻本！
甜品選擇偏少
老實講，甜品就選擇唔多，得雙球雪糕及是日中式糖水。不過，你去茶記都唔會期望將甜品當飯食吧?
總結：
筆者本來對茶記放題，冇咩期望，點知感覺其實幾OK!每人$128，兼無加一，其實今時今日去咩翠Ｘ、太Ｘ要食餐飽飯，要有齊前菜、主菜、甜品，埋單都唔止呢個價，加上餐廳仲要任食任飲。食物質素亦好唔錯，尤其是頭抽 雞髀 撈丁、點心、蒸飯等中式出品，都算係平實好味的心機作。唯一問題是主菜實在太過大份，每人叫一份都已經半飽，好似想盡快塞飽你咁，試唔到太多款！不過整體而言，其實都值７分，行開行埋可以一試啦！
總分: 7/10分
香江冰室
地址: 中環 荷李活道15號地下 (顯示地圖)
營業時間: 星期一至日8am–12mn
放題時段:6pm-7:30pm; 7:45pm-9:15pm;9:30pm-11pm
放題收費: 成人$128/位 8歲以下小童: $68/位
查詢: 2806 0220
備註: 收信用卡，不收加一
