【日韓掃貨】想慳少少！2016日韓新退稅措施
日本 – 2016年調低免稅門檻 買夠5,001円就退得！
喺今年10月1日開始，只需要買化妝品、食品、飲品、藥物等消耗品，超過¥5,000（約HK$320）；或家用電器、服飾、手袋等一般商品，超過¥10000（約HK$640），就可以即時退稅。好多人都知道喺日本買消耗品並退稅後，店員都會將消耗品放入密封膠袋，而且要簽「購買者誓約書」，切記唔好喺日本境內打開密封膠袋，否則海關會收番有關稅項。
好消息又嚟啦，日本政府打算調低一般商品嘅免稅門檻，由¥10000以上調低至¥5000以上，同消耗品睇齊。日本有關當局已經將呢個建議加入2016年嘅「稅制大綱」，相信下年將會實行。咁樣以後去日本Shopping，都更加容易可以退到稅，買一兩件衫都合符退稅條件，愈買愈開心呀～
(注意：最新消息為預計於2016年5月1日起實施新的免稅措施。)
韓國 – 2016年起20000間免稅小店可即時退稅！
依家韓國Shopping，消費滿3萬韓圜（約HK$200）都有得申請退稅，但得少數大型舖頭可以即時退稅，一諗起最後要喺機場退稅，要同所有旅客一齊排隊等Counter同自助退稅機，由Scan Passport同每張單據、畀海關Check單同貨品，再到自助退稅機拎番錢，每一個程序都要排一次隊，所以一定要預番咁上下時間前去到機場，才有足夠時間搞退稅，真係有啲麻煩。最弊係入到禁區先攞得番退稅金顛，淨番少少錢又唔知喺機場買咩好⋯⋯
有見及此，南韓企劃財政部決定由2016年1月1日開始，將即時退稅店舖範圍擴大，旅客喺市內20,000間標有「免稅」（Tax Free）或「退稅」（Tax Refund）嘅舖頭Shopping，畀錢時出示護照，店員就會即刻傳送有關資料到關稅廳，稅項即時扣除，情況就好似喺日本Shopping退稅一樣，超級方便。
要留意嘅係，企劃財政部有規定即時退稅金額上限。旅客喺舖頭只能夠買每件價格不多於20萬韓圜（約HK$1300），先可以即時退稅，每人即時退稅嘅購物總金額同時不可超出100萬韓圜（約HK$6600）。如果買咗超過20萬韓圜嘅一項貨品，或者總金額超過100萬韓圜嘅單據，都唔能夠享有即時退稅，仍然都係要喺機場先可進行退稅。
