【掃街王】Q彈珍珠奶茶味星星Pizza!大埔6大美食!
【掃街王】Q彈珍珠奶茶味星星Pizza!大埔6大美食!

【掃街王】Q彈珍珠奶茶味星星Pizza!大埔6大美食!

大埔美食林立,今次掃街王同大家介紹返一間來自台灣的Pizza店,入面有Q彈(一定要用呢個terms)的珍珠奶茶味星星Pizza,仲有幾款甜味Pizza都好有噱頭。另外,再介紹埋大埔人都撐的食店,等大家都可以試新派菜式之餘,都能感受到大埔墟的人情風味。

第一站:台灣人氣Pizza店來港!Q彈珍奶甜星Pizza!

講起台灣美食,當然不少得珍珠奶茶。不過,今次我口哋唔係想介紹飲得嘅珍珠奶茶,而係食得嘅珍珠奶茶Pizza!台灣人氣Pizza店 Tino’s Pizza Cafe,喺台灣已經有7間分店,今次來港開店,就有招牌星星Pizza坐鎮,賣相特別;味道方面,有珍珠奶茶、雜莓配檸檬慕絲和香蕉Oreo Pizza,聽落就幾有噱頭,實際又係咩味?即刻來帶試食報告!

Pizza方面:

可選拿坡里Pizza或者羅馬Pizza。
拿坡里Pizza特點:來自意大利南部,會較厚身,邊位煙韌,Pizza中間會較脆身。
羅馬Pizza特點:來自意大利北部,會較薄身,邊位會較脆。

1. 出奇地唔甜之選-珍珠奶茶味Pizza

珍珠奶茶味Pizza,以台灣黑糖珍珠做配料,配上4款水果,蘋果、水蜜桃、小紅莓和奇異果,再於面層淋上奶茶慕絲和煉奶。

大埔_Pizza_珍珠奶茶Pizza
TW珍奶甜星 $68。

試食報告:
-珍珠煙韌
-水果烘焗後會無咁甜
-奶茶慕絲和煉奶無想像中咁甜
總評:味道有點像飲珍珠奶茶,不過又無想像中咁死甜,帶有微微奶香和黑糖的微甜味。
推介度:★★★★☆

2. 開胃清新之選-雜莓醬配檸檬慕絲Pizza

大埔_Pizza_雜莓Pizza
綜合莓果甜星 $68。

試食報告:
總評:雜莓醬配上檸檬慕絲,這組合非常夾,酸甜開胃,檸檬慕絲令整份Pizza變得清新不油膩。
推介度:★★★★★(記者最愛!)

3. 勁鍾意食甜嘢之選-香蕉Oreo Pizza

大埔_Pizza_香蕉朱古力Pizza
香蕉Oreo甜星 $68。

試食報告:
總評:以新鮮香蕉配上Oreo朱古力粉,對於記者來說味道偏甜。不過,小朋友或者勁愛甜食人士,一定會鍾意!
推介度:★★★☆☆

除了甜味Pizza,店內都有具有台灣特色的Pizza-美麗海島Pizza。以台灣烏魚子、櫻花蝦、龍蝦魚卵醬、飛魚卵、芝士、高麗菜等食材做配料,烏魚子和櫻花蝦的鹹香味濃,配上蔬菜,清新不油膩。而且,此Pizza拿下了Caputo盃主廚得獎作品,係咪要去試下先~

大埔_Pizza_美麗海島Pizza
美麗海島Focaccia $85。

同場加映:爐烤紙包魚

爐魚在台灣來貨,會先去骨,放在烘焗紙上和鐵穫上,再以烘焗形式製作。爐魚味道鮮甜,肉質嫩滑,完全沒有魚腥味!配上蜆肉和蔬菜,絕對是唔想食肥膩食物的健康之選。

大埔_Pizza_魚
爐烤紙包魚 $88。

Tino’s Pizza Cafe
地址:大埔八號花園地下20號舖(顯示地圖
營業時間:星期一至日:11:30-22:00
電話:2666 9840

第二站:相機食先!原隻軟殼蟹爬意粉

這間Cafe最吸睛又創新的,就是軟殼蟹卡邦尼蛋汁意粉,將成隻軟殼蟹放在意粉上面,絕對能夠餵飽你部相機。別以為「好睇唔好食」,意粉賣相雖不甚特別,但一食就知道有水準!意粉以芝士和忌廉煮,芝士味非常濃郁,Creamy且帶有蒜香,食到停唔到口。原隻軟殼蟹來自印尼,約重100g,炸得外脆內觧嫰,唔錯!

大埔_Pizza_蟹
軟殼蟹卡邦尼蛋汁意粉 $88。
原隻軟殼蟹爬在意粉上很威威,卡邦尼意粉濃郁好味!
大埔_Pizza_waffles
愛心窩夫 $78。
成個甜品有8、9吋高,足夠四個人食,雪糕可選Oreo、咖啡、朱古力等,窩夫熱辣辣有蛋香。
大埔_Pizza_coffee
鮮奶咖啡 $33(中/ 200ml);$36(大/ 300ml)。
咖啡有超過五款口味,如岩鹽焦糖鮮奶咖啡和玫瑰鮮奶咖啡都是Hot Picks!拉花拉得靚!

大埔_Pizza_環境

大埔_Pizza_門口

咖啡灣
地址: 大埔太和路15號太和中心9號舖(顯示地圖
營業時間:星期一至五:12nn-5pm; 6pm-10pm;星期六、日:12nn-10pm
電話:2387 2008

第三站:金莎朱古力醬格仔餅+懷舊冷糕

距離大埔墟港鐵站約10分鐘車程的昌運中心,有間小食店專賣雞蛋仔和夾餅。格仔餅底($13)可選原味、朱古力味和士多啤梨味。加$3可配朱古力醬、芒果醬、士多啤梨醬或芝麻花生碎,加$5可選金莎朱古力醬。所有雞蛋仔和格仔餅可即叫即製,需等3-4分鐘。

大埔_冷糕_格仔餅
迷你花生夾餅(潮州冷糕) $13。
除格仔餅外,這裡還賣非常罕見的潮州冷糕!之前一間位於油麻地的隱世冷糕店被逼停業,要吃便可能要到澳門!現在想懷舊一下,到大埔就掂。夾餅內有牛油、砂糖、花生碎和椰絲,食落味道似糖蔥餅。

大埔_冷糕_格仔餅

大埔_Pizza_格仔餅
金莎朱古力醬格仔餅 $18。
即叫即製,自然熱辣辣!餅底鬆軟,金莎朱古力醬很濃厚,搽滿了整個格仔餅,仲食到同花生粒!

大埔_格仔餅_冷糕

大埔_冷糕_珍珠奶茶
珍珠奶茶 (360ml) $11。
所有餅類加飲品,套餐價為$22。珍珠細細粒,份量算多,奶茶香滑,甜度適中,抵飲!

大埔_雞蛋仔_冷糕

雞蛋仔專門店
地址: 大埔安慈路4號昌運中心地下14A舖(顯示地圖
營業時間:11am-10pm

第四站:冬菇亭發現!鹽焗雞飯炒底

位於廣福邨冬菇亭的這間茶檔,除了馳名的咖喱外,鹽焗雞飯都好正!加$8可轉炒飯底,秘製的鹽焗雞,雞肉嫩滑不肥,鹹香有致,驟眼睇都有十幾件雞!炒飯同樣份量十足,兩個人食都得,都只售$39一碟,認真好味又抵食!不過鹽焗雞飯通常午市就會沽清,想食就要早啲!

大埔_冬菇亭_鹽焗雞飯
鹽焗雞飯 $31/碟(炒底加$8)。
大埔_冬菇亭_星洲炒米
星洲炒米 $35。
一般的星洲炒米是以咖喱粉炒,這裡卻用上自家製咖喱膽炒成,份外入味和惹味,米粉充滿鑊氣而且彈牙,推介!
大埔_冬菇亭_雞髀
生炸雞髀 $20。
雞髀生炸,皮脆肉香,非常Juicy!
大埔_冬菇亭_奶茶
熱奶茶 $14。
混了4-5款茶葉,飲落香滑,茶味濃郁,讚!

kawaenv

kawa5

嘉華咖啡小食
地址: 大埔廣福邨廣崇樓側熟食亭5號(顯示地圖
電話:2653 1380

第五站:大埔名物三多雞髀

大埔名物三多炸髀平時入夜先有得食, 小店最近開了分店,每日2pm就有得食喇!新店坐得舒舒服服,而且較少人等。馳名炸雞髀即叫即製,需時約10分鐘,皮脆不太油膩,配埋自家製辣粉,很邪惡!

大埔_三多_雞髀
三多炸雞髀 $26。
大埔_三多_腸粉
豉油肉碎炒腸粉 $32。
即叫即製,熱度十足,豉油味香,配埋肉碎同芽菜,又係咁邪惡。
大埔_三多_朱古力
忌廉朱古力 $32。
朱古力味超濃郁,要飲!

大埔_三多_環境

大埔_三多_門口

三多小食
地址: 大埔翠樂街8號美豐花園B座地下(顯示地圖
營業時間:2pm-12am

第六站:街市食竹昇麵

大埔墟街市一向多好嘢食,這間舖的竹昇麵,要每天壓兩至三小時而成,而且只放很少鹼水,麵食落有很香蛋味,而且特別彈牙。每天只營業至下午三四點,適合踩單車前來食個午餐。

大埔_雲吞_撈麵
蝦籽雲吞撈麵 $38。
蝦籽鋪滿成隻碟,雲吞傳統,較為細粒,一啖一粒都幾滋味爽口。湯用左口魚熬製,味道清甜。
大埔_豬油_撈麵
豬油撈麵 $23。
豬油食落不太肥膩,有淡淡豉油香,與蛋味香濃的竹昇麵很夾。

pingkei6

新假期食玩報料:[email protected]
歡迎Instagram / facebook 使用#weekendhk 報料,資料一經選中會為你公告天下!
想最快接收第一手的旅遊飲食資訊?Easy!
1. 先分別讚好「新假期周刊」及「新假期Jetso 」兩個Facebook專頁
2. 在「讚好」按鈕下揀選「搶先看」,搞掂!
see first template

最新吃喝玩樂資訊