macau_澳門_掃街王
macau_澳門_掃街王

【掃街王】狂食海鮮+甜品!澳門10大暴食行程

旅遊

廣告

去澳門,最正都係掃街喪食,即場問問出發過大海的遊客,每位都以食勻美食做目標,例牌蟹粥、豬扒包和葡撻等!我們由朝早十點沙梨頭,食到落議事亭周邊,順道去新橋區睇本地文創小店,夜晚直落下環食8斤重海鮮鍋。短短12個鐘,實行以最短路程、最快時間一次過食勻玩盡地道澳門!

1.晨早歎新鮮蟹粥!

沙梨頭臨時街市的海鮮出名又平又多款,但只開早市,一於襯早嚟食個蟹粥!三樓熟食市場的「中國名粥」專賣各款靚粥,如果想指定要花蟹粥,建議提前一日落單,老闆娘會在開店前選購,保證夠新鮮!粥底用大地魚、豬骨和江瑤柱熬製,老闆每日凌晨三四點就會返店,熬足3小時,粥身軟綿,加埋蟹黃香,味道相當濃郁!

花膏蟹粥 MOP228 花蟹粥一窩用上兩隻蟹,粥底份量起碼夠4人食!
花膏蟹粥 MOP228
花蟹粥一窩用上兩隻蟹,粥底份量起碼夠4人食!
好在老闆娘一大早幫我買好奄仔蟹,否則到我早上十點幫襯,全街市都已經斷貨!
好在老闆娘一大早幫我買好奄仔蟹,否則到我早上十點幫襯,全街市都已經斷貨!
清蒸奄仔蟹 MOP208 收費按海鮮食材費和每道加工費$58計算,價錢都算抵!
清蒸奄仔蟹 MOP208
收費按海鮮食材費和每道加工費$58計算,價錢都算抵!
爆蟹膏!
爆蟹膏!

中國名粥
地址: 澳門沙梨頭區海邊大馬路沙梨頭臨時街市1樓熟食中心(顯示地圖
電話:+853-6638-8569
營業時間:6am-3pm(每月逢1、2號休息)
前往方法: 由路氹威尼斯人乘巴士26A號,到紅街市下車;乘的士約80元

2.直落食埋蟹黃麵!

食完蟹粥仲未夠喉?可以去埋相距10分鐘路程的「新龍記」,網友推介他們的蟹黃墨魚餅撈麵,張張相蟹黃滿瀉好吸引。不過撈麵上枱嗰刻,大佬,圖文不符嘅!細問之下,原來要另加蟹黃$20,先有「影相呃like 」的效果!好似我淨單點,無另加麵底和蟹黃,賣相唔夠出色,蟹黃乾爭爭。但勝在味道搭夠,拌勻麵底後,每一啖都可以食到蟹香,墨魚餅亦是店家每日新鮮手打,都值得一試!

蟹黃墨魚餅撈麵 MOP$48
蟹黃墨魚餅撈麵MOP$48

澳門新龍記
地址:澳門沙梨頭區沙梨頭南街29號地下E舖(顯示地圖
電話:+853-2825-2517
營業時間:7am-10pm
前往方法:由沙梨頭臨時街市沿沙梨頭南街行1分鐘

3.人氣紫薯克戟

這間「樂點咖啡」今年三月先開業,在當地擁有超高人氣!每道甜品賣相精緻,最適合少女相機食先,而且按時令推出限定甜品,等客人每次幫襯都有驚喜!好似11、12月就有紫薯流心和鐵鑊厚燒野莓醬克戟,每日限量供應,店長透露每日準備約二十份,平日賣到四點左右就無晒。加上Café不設訂位,假日高峰時段都要排隊,所以一開門幫襯就最著數!

紫薯流心厚燒克戟 MOP70 自家製的紫薯雪糕,配上口感鬆軟的厚燒克戟,一切開就溢出滿滿的紫薯漿。
紫薯流心厚燒克戟 MOP70
自家製的紫薯雪糕,配上口感鬆軟的厚燒克戟,一切開就溢出滿滿的紫薯漿。
鐵鑊厚燒野莓醬克戟 MOP70 燒熱的鐵鑊保持餅身溫度,加上微酸的野莓醬,非常開胃。
鐵鑊厚燒野莓醬克戟 MOP70
燒熱的鐵鑊保持餅身溫度,加上微酸的野莓醬,非常開胃。
宇治抹茶Latte MOP45 採用正宗京都抹茶老店「丸久小山園」的茶粉,凍飲的茶味都夠濃!
宇治抹茶Latte MOP45
採用正宗京都抹茶老店「丸久小山園」的茶粉,凍飲的茶味都夠濃!

樂點咖啡
地址: 澳門花地瑪堂區鏡湖馬路72號臻華大廈地下A舖(顯示地圖
電話:+853-6361-2723
營業時間:12nn-8pm(逢星期一休息)
前往方法:離開新龍記,沿罅些喇提督大馬路轉入鏡湖馬路,路程8分鐘

4.齋食復古情懷

擁有70年歷史的「禮記雪糕」早就被旅遊書介紹到爛,雖則他們出產的雪糕大部分工序亦已由機器取替,但店內保留傳統冰室裝潢,雪糕款式和口味不玩花巧新潮,有最傳統的雲呢嗱、士多啤梨、朱古力、椰子味;雪糕三文治仍然採用傳統紙盒包裝,加上價錢唔貴,支持老店,齋食個懷舊feel 都抵!

雪糕三文治 MOP16 每件有三種不同雪糕口味,老闆娘指每批的配搭不同,多數是按她心情做!
雪糕三文治 MOP16
每件有三種不同雪糕口味,老闆娘指每批的配搭不同,多數是按她心情做!
紅豆雪條 MOP8 紅豆與水的比例2:1,所 以咬落粒粒紅豆,外賣食 仲要平2蚊!
紅豆雪條 MOP8
紅豆與水的比例2:1,所以咬落粒粒紅豆,外賣食仲要平2蚊!

禮記雪糕
地址:澳門望德堂區荷蘭園大馬路12號地下(顯示地圖
電話:+853-2837-5781
營業時間:12nn-7pm
前往方法:由鏡湖馬路轉入瘋堂斜巷,路程10分鐘

5.必食!滋味厚蛋豬扒包

「世記咖啡」以炭燒瓦煲咖啡打響名堂,不過老店近明愛醫院,位置唔太方便。三年前世記在議事亭附近開設外賣店,賣埋豬扒包、方塊磚,擺明做遊客和年輕人生意。不過外賣店的食物毫不馬虎,同樣堅持以瓦煲煮咖啡,最驚喜的仲有厚蛋豬扒包!採用即炸豬扒,再加2隻雞蛋燒出的2CM厚蛋,新鮮熱辣辣,口感又唔會太乾,這一點最抵讚!不過等食物的時間稍長,採訪當日是平日的下午一點時段,人龍排到出店門口,等即製的豬扒包要成10分鐘。

澳門_macau_掃街王
厚蛋豬扒包 MOP35
厚蛋足足有2CM!
雖然是外賣店,但店內都設有小量位置讓客人堂食,經常人頭湧湧。
雖然是外賣店,但店內都設有小量位置讓客人堂食,經常人頭湧湧。

世記咖啡外賣店
地址:澳門大堂區新馬路賣草地里7-15號長信大廈地下(顯示地圖
電話:+853- 6377-9664
營業時間:11am-7pm(逢星期二休息)
前往方法:沿水井斜巷、醫院後街及大炮台街行,路程8分鐘

6.撐街市!歎瓦煲奶茶

議事亭的人流拍得住旺角、尖咀,仲要經常被逼聽普通話,但營地街市綜合大樓主打街坊生意。一、二樓賣新鮮蔬菜肉類,三樓則是價錢便宜的平民熟食市場,假日 幫襯的多數是本地人和識貨的香港人。市場內有不少馳名老店,好似超過60年歷史的「強記咖啡」,第二代的衛老闆依然堅持用瓦煲煲奶茶咖啡,每日只賣二百 杯,完全唔憂做。旁邊50年老字號「梓記牛什」,散發出濃濃腩汁香氣,行過已經口水直流!

即沖瓦煲熱奶茶 MOP12 今年65歲的衛老闆笑言只多做幾年就不再做,叫大家把握機會幫襯!
即沖瓦煲熱奶茶 MOP12
今年65歲的衛老闆笑言只多做幾年就不再做,叫大家把握機會幫襯!
淨牛什 MOP48 梓記老闆透露每日至少 用十斤牛骨、牛肉熬製 腩汁, 牛什燜煮四小 時,入口軟腍入味。
淨牛什 MOP48
梓記老闆透露每日至少用十斤牛骨、牛肉熬製腩汁, 牛什燜煮四小時,入口軟腍入味。

強記咖啡、梓記牛什
地址:澳門大堂區新馬路營地街市綜合大樓3樓(顯示地圖
營業時間:7:30am-6:00pm
前往方法:由大街轉入米糙巷,路程2分鐘

7.鬼馬意式雪條

意大利Gelato 雪糕品牌Stick house 在各地都設有分店,今年5月亦正式進駐澳門,甚至搶先香港一步。品牌標榜全手工製造,採用天然食材和配方,澳門分店甚至設有獨立廠房,請埋意大利的師傅和機器,保證每日新鮮製作。店內出售超過三十款不同口味雪芭、雪糕,又可以柯打店員加添不同程度的脆皮和杏仁粒,自由配搭自己口味。

Pizza雪糕連菠蘿「薯條」 MOP48 用自家烘焙蛋糕配搭牛奶雪糕和士多啤梨果醬,Pizza外形滿分!套餐 包埋的「茄汁薯條」其實是士多啤梨果醬配新鮮菠蘿果肉,好像真!
Pizza雪糕連菠蘿「薯條」 MOP48
用自家烘焙蛋糕配搭牛奶雪糕和士多啤梨果醬,Pizza外形滿分!套餐包埋的「茄汁薯條」其實是士多啤梨果醬配新鮮菠蘿果肉,好像真!

 

Stick house
地址:澳門大堂區大堂巷10號B-C和翠台地下B(顯示地圖
營業時間:10:30am-10pm
前往方法:由米糙巷轉入板樟堂巷,路程2分鐘

8.大過塊面雞髀快餐!

「大堂街炸雞」店內的水牌、桌椅,甚至是收銀模式都大有KFC 影子,雖然是土炮炸雞店,不過開業十幾年,搞得有聲有色,不少本地人排住隊幫襯。招牌炸雞使用獨門秘方醃漬, 每次即叫即炸, 每件炸雞熱騰騰。入口炸粉不厚身,但味道略鹹,要飲多幾啖可樂先得。如果嫌太熱氣,店內仲有賣涼茶,實在好有個人Style!行過兩條街,仲可以食埋超有 名的瑪嘉烈葡撻!

炸雞髀 MOP30 大堂街炸雞髀出名大件,你睇,仲大過記者塊面啊!
炸雞髀 MOP30
大堂街炸雞髀出名大件,你睇,仲大過記者塊面啊!
KFC有白髮老伯, 大堂街炸雞都有老闆的嘜頭公仔!
KFC有白髮老伯, 大堂街炸雞都有老闆的嘜頭公仔!

大堂街炸雞
地址:澳門大堂區大堂街14號A、B舖地下(顯示地圖
電話:+853-2833-8112
營業時間:11:30am-9pm
前往方法:由板樟堂巷到大堂街,路程2分鐘

9.文青寶地 -平買Pro級文具+輕食

食到飽飽地,可以專誠行一趟去高地烏街,睇吓今年5月開業的文具café「空間叄拾」。店內主力銷售世界各地品牌的精緻文具和本土文創,最正是特別平和有質素。因為80後創辦人Pat 和Thomas 身兼設計公司的老闆,出售的文具親身用過才入貨推介。在開店之初,就積極洽談他們最愛的美國鉛筆品牌Blackwing,成為港澳區唯一代理。所有貨品更以官方定價或貼近來貨價出售,唔吊高嚟賣,自然吸引不少文青捧場客。

觀乎佔地逾千呎的店內僅有5、6個座位提供輕食,丟空的空間與文具專櫃各佔一半,會不定期舉行藝術展覽,似乎「唔休做」!假日地下更會鋪野餐布,讓客人體驗室內野餐,認真有性格。對於活在寸金尺土的香港人,這個空間布置實在太過奢侈。創辦人Pat 講明不會以利字行頭,而是希望為在狹窄的澳門土地,營造空間感十足的良心小店,加上承諾捐出30% 盈利做善事,做生意都做得好有心!

黑色竹炭窩夫 MOP32 採用食用竹炭粉炮製的夫酥香,配上甜甜的朱古力醬和軟滑忌廉,口感一流。
黑色竹炭窩夫 MOP32
採用食用竹炭粉炮製的夫酥香,配上甜甜的朱古力醬和軟滑忌廉,口感一流。
蛋白泡泡套餐 MOP38 炸至金黃色的脆多士配上焗熱的企身蛋白和芝士,泡泡口感軟綿綿似棉花糖。
蛋白泡泡套餐 MOP38
炸至金黃色的脆多士配上焗熱的企身蛋白和芝士,泡泡口感軟綿綿似棉花糖。
周六日有室內野餐!
周六日有室內野餐!
店內放置一部80年歷史古董級全金屬的收銀機非常矚目,可惜是非賣品!
店內放置一部80年歷史古董級全金屬的收銀機非常矚目,可惜是非賣品!
本土Design木頭袋 MOP660(左,注目!)、MOP890(右) 由澳門人親自設計的網店品牌「雜事多」 推出以泰國環保木材配搭人造皮的小木 袋,輕身方便,又夠型!店主話在十二月前購買木頭袋,仲有8折!
本土Design木頭袋MOP660(左,注目!)、MOP890(右)
由澳門人親自設計的網店品牌「雜事多」推出以泰國環保木材配搭人造皮的小木袋,輕身方便,又夠型!店主話在十二月前購買木頭袋,仲有8折!
除了專業繪圖用家和文愛好者,少女都可以買到心水本土創作的手工飾品。
除了專業繪圖用家和文愛好者,少女都可以買到心水本土創作的手工飾品。
左:店長 Mary;中:創辦人 Pat;右:創辦人 Thomas :我們支持公平貿易,所以貨品都以最平定價出售!
左:店長 Mary;中:創辦人 Pat;右:創辦人 Thomas
:我們支持公平貿易,所以貨品都以最平定價出售!

Roomage 30空間叄拾
地址:澳門高士德區高地烏街 64號 東方花園商場地庫(顯示地圖
營業時間:12:30pm-7:30pm(逢星期一休息)
前往方法: 由瑪嘉烈沿水坑尾街行20分鐘;或由馬統領街車站乘12號巴士到俾利喇站下車
FB專頁:Roomage 30空間叄拾

10.每人$100 勁食8斤重海鮮鍋

次次來澳門都以葡國晚餐作結,今次決定深入平民住宅區,品嘗他們日常至愛的海鮮鍋!在下環街的「表嫂美食」是街坊小店,店內無特別裝潢,只有十五、六個位置,不過澳門網友都一致好評!這店的海鮮鍋出名夠抵又足料,以中型海鮮鍋為例,8斤重,夠晒4至6人摸住肚腩離開,每人計勻都唔使$100 !提前預訂,店主會到附近的下環街市買入新鮮本地海鮮,每盤以蘿蔔、洋葱和3斤重的大頭魚墊底,上面鋪上蜆、蟶子、青口、帶子、八爪魚、蝦和3隻花蟹,以秘製黑椒醬料調味,不加薑絲亦完全沒有腥味。

海鮮鍋「大盤魚」 (小)MOP288、 (中)MOP488、 (大)MOP688 圖為中型大小足夠4-6人食 用,小盤適合2-3人,大盤 可供7-8人食用。
海鮮鍋「大盤魚」(小)MOP288、(中)MOP488、(大)MOP688
圖為中型大小足夠4-6人食用,小盤適合2-3人,大盤可供7-8人食用。
卜卜蜆蝦子粥 MOP32 店內仲有街坊價卜卜蜆蝦子粥,三十幾蚊足料有十幾隻蜆和三隻蝦!而且蝦身爽口,食得出並非雪藏貨。
卜卜蜆蝦子粥 MOP32
店內仲有街坊價卜卜蜆蝦子粥,三十幾蚊足料有十幾隻蜆和三隻蝦!而且蝦身爽口,食得出並非雪藏貨。
廚師一邊把食材放入盤中,一邊塗上秘製醬料,整個過程需時約20分鐘。
廚師一邊把食材放入盤中,一邊塗上秘製醬料,整個過程需時約20分鐘。
老闆娘 黎小姐:客人預約時說出個人要求,可以畀錢加碼升級做龍蝦、鮑魚和扇貝等。
老闆娘 黎小姐:客人預約時說出個人要求,可以畀錢加碼升級做龍蝦、鮑魚和扇貝等。
街坊熟客 陳生陳太:我們三個人食細盤足兩個 鐘都食唔完!蟹肉多膏,又夠鮮甜。墊底的魚肉吸晒醬汁和海鮮的精華,入味又鮮嫩。但一滾起,要先食蟶子,否則好快就變韌。
街坊熟客 陳生陳太:我們三個人食細盤足兩個鐘都食唔完!蟹肉多膏,又夠鮮甜。墊底的魚肉吸晒醬汁和海鮮的精華,入味又鮮嫩。但一滾起,要先食蟶子,否則好快就變韌。

表嫂美食
地址:澳門下環區下環街鹽里文英大廈地下B鋪(顯示地圖
電話:+853-6527-3599
營業時間:5pm-2am(逢星期日休息)
前往方法: 由新馬路金碧文娛中心站乘2、5、10、11號巴士到河邊新街/下環站下車
備註:建議提前一日預訂

延伸閱讀:
【掃街王】瘋狂芝士四重奏熱狗!元朗5大美食
【掃街王】$1甜蝦刺身 油塘糧尾美食天堂
新假期周刊 電子書:
ios:https://itunes.apple.com/hk/app/xin-jia-qi-zhou-kan/id722179449?mt=8
Android:https://play.google.com/store/apps/details?id=com.weekendhk.newsstand2&hl=zh_HK

新假期食玩報料:[email protected]
歡迎Instagram / facebook 使用#weekendhk 報料,資料一經選中會為你公告天下!
想最快接收第一手的旅遊飲食資訊?Easy!
1. 先分別讚好「新假期周刊」及「新假期Jetso 」兩個Facebook專頁
2. 在「讚好」按鈕下揀選「搶先看」,搞掂!
see first template