海港城亮燈! 鬧市中的迪士尼聖誕大街!【尖沙咀好去處】

海港城 聖誕 2015

下個月就係聖誕節,香港出名靚嘅燈飾都係時候出場喇~ 海港城每年嘅聖誕佈置都好有保證,一年靚過一年,今年仲同迪士尼合作添!不過可能期望太高,記者不禁有少少失望。

海港城 聖誕 2015

今年海港城以「Happily Ever After」聖誕大街為主題,將海運大廈露天廣場幻化成一條大街,左右兩旁全部都係一間間屋仔佈景,窗口仲有唔同卡通人物嘅剪影添。不過正因為兩邊都係佈景,令到海景完全被遮掩住,浪費咗呢個咁好嘅地理位置。加上改造成為一條大街之後,本來露天嘅環境竟然變得有少少擠逼,感覺唔係咁好。

海港城 聖誕 2015

不過咁,喺呢條聖誕大街入面,的確有置身於迪士尼嘅感覺,好夢幻。

今次大街入面嘅佈景,主要得Frozen、Tsum Tsum同埋米奇,而且公眾唔能夠行埋去近距離接觸,Elsa同Anna仲竟然只係紙板公仔,咁就真係有少少失望喇。

最新吃喝玩樂資訊