我最頂唔順的空中電影@杜遊珍
我最頂唔順的空中電影@杜遊珍

我最頂唔順的空中電影@杜遊珍

每逢搭長途機,阿珍都好關心椅背嘅電視機仔有咩戲睇,通常個零鐘完場嘅賤嘴愛情Chick Flick已經好能夠滿足到膚淺嘅我!(估到結局更好,最怕死唔斷氣、臨落機先嚟結局扭橋,好Hurt!)
呢幾年機上娛樂系統容量大升級,百幾套電影劇集任揀、不知幾咁閒,航空影片發行更加係接近30億美金嘅大生意!不過唔同Airline都對機艙片目有唔同程度審查,任職發行公司嘅買家T就最熟行情:「星馬航班最忌同志片、中東航空不但性感免問而且連煎豬扒劇情都要剪走、歐陸客頂得住裸露但對血腥暴力就接受唔到……」發行商經常要喺後期「做手腳」,血腥場面變黑白、捽走對家航空公司Logo、粗口對白字幕打格,務求做到百貨應百客咁話!


冰雪奇緣

主題曲勁洗腦(連中秋電子燈籠都係播佢!),分別列入英航同United今年「點選Top 10」榜首;但如果喺機艙、遇上公主病童高歌無限loop,真係人都癲!

《哥斯拉》

今期機上熱播!睇住500呎嘅大怪獸縮入椅背小屏幕,變咗條坎坷檐蛇,霸氣盡洩!好唔忍心睇落去……

魔戒 / 哈比人系列

真係sorry,阿珍每次都以為可以喺長途航班啃完一集,結果都係頂唔住吟吟噚噚昏睡,醒返又係吟吟噚噚,好似困住喺個結界咁,催眠認真一流!

By the way…

自從可以攬住iPad搭飛機之後,好多朋友都唔再關心機上有咩戲睇,自己撈劇自己煲,不過有次遇上一對父母同個仔睇《喜羊羊》,開大喇叭唱歌念力打敗大灰狼,機艙變家庭影院,都幾無公德心囉!

 

最新吃喝玩樂資訊