【自助餐放蛇起底組】貴價金目鯛任食 $318狂掃頂級海鮮甜品

飲食

廣告

放題 邊間好?當你以為 放題 唔會有好嘢食,尖沙咀最近就有間新開嘅 放題 為半自助餐形式,有得任食貴價魚如 金目鯛 、池魚王,仲有薄燒和牛同多款精緻甜品!到底係咪真係咁正呢?即睇試食報告!

一入到嚟就已經呆咗,皆因呢度個環境一啲都唔似食 放題 的地方,反而似高級中菜館,裝飾同佈置有種奢華嘅感覺。卡位非常闊落,驟眼望落去其他位都幾舒適,一啲都唔迫,坐得幾舒服。

自助餐區有得攞壽司如金目鯛、池魚王、日本鮫魚等,及海鮮如長腳蟹、翡翠螺等。必食回本 金目鯛 、池魚王!日本直送的金目鯛 和池魚王,喺日本餐廳閒閒哋都要幾百蚊先得幾片,但呢度可以任食,真係超抵!師傅將前者製成火炙壽司,後者配薑蔥,食落新鮮!

除咗手握壽司之外,都有金目鯛同池魚王刺身!一定要食夠本!!!

極大赤蝦真係極大,食落爽口彈牙,蝦味慢慢滲出,唔錯!

帆立貝同鮑魚都係大大隻同好鮮甜,必食!

 

新出的「殿壽司」好巨大!足足有五層材料:海膽、木魚金箔啫喱、三文魚、甜蝦同拖羅,賣相好有霸氣!一啖食落去其實係… 無咩味嘅,飯味最出,始終都係gimmick嘢,值得一試嘅!

 

鵝肝同和牛的味道幾出,而且平均,鵝肝食落唔肥膩,推介!

 

呢到啲料理賣相好精緻,絕對唔求其!虎蝦大隻得嚟夠爽口,而且入晒蒜蓉同麵豉味,好好味啊!

 

一客三件,材料分別有秋葵、煙肉、芝士、蠔同多士。蠔夠哂Juicy彈牙,煙肉不會過肥,秋葵令整體無咁油膩,多士夠脆,唔錯!

 

炸物當中最特別係榴槤炸彈!一咬開就聞到超香榴槤味,好creamy,炸得嚟唔係好油膩,榴槤迷必試!

 

一客三件,紫蘇葉味非常重,羊肉不是太羶,肉質鮮嫩。

 

芝士黑豚鍋非常熱辣辣,芝士味勁香,同埋都幾多芝士,麵唔係好入味,黑豚肉肥瘦適中,幾爽口。

 

薄燒澳洲M9和牛,即叫即燒,一分鐘都唔洗就有得食!有四款醬汁可選,如蘋果芝麻汁、洋蔥汁等。聞落幾香,食落肉質偏韌,可能因為捲咗幾下,要咬落耐啲,牛肉味慢慢滲出。

 

飲品方面有超過十五款,汽水、啤酒咩都有,最健康都係鮮榨果汁,啖啖果肉,不太甜,好天然啊!

甜品有超過二十款,最特別係「願望球」!你有啲咩願望或者祝福嘅說話都可以叫師傅寫落隻碟到,最啱幫朋友慶祝生日!除咗寫字,師傅仲會加啲圖案或隻公仔,成品係成幅畫咁靚!當日見無咩人,就叫師傅畫個蛋黃哥,師傅手勢好好,三兩下就畫完!個願望球係要用鎚仔揼爛佢嘅,入面原來係綠茶Tiramisu! 附有綠茶汁俾你自己加落個Tiramisu,食落鬆軟,綠茶味清香。

 

除咗「願望球」,其他甜品的質素都好高,賣相同味道都唔錯,一定要留返啲位食甜品啊!

 

雪糕有Milk Top同Haagen-Dazs兩個牌子,Milk Top有紫薯味同海鹽味,Haagen-Dazs有士多啤梨味、藍莓味同朱古力味。供應好充足,唔洗搶!

總分:9/10

三百幾任食貴價魚刺身同壽司真係超值,甜品夠多款又高質素,仲有得叫師傅喺甜品畫畫同寫字,超細心!環境夠晒舒適又有氣派,坐得好舒服,服務又唔錯,無漏單情況出現,而且啲嘢食好快就熱辣辣送到。 放題 原來可以咁正,仲抵過去酒店食自助餐!

殿 大喜屋日本料理

地址:尖沙咀金巴利道26號1樓 (顯示地圖)
電話:3622 3000;3622 3009
營業時間:12nn-3pm;6pm-11:15pm
午市收費:星期一至日及公眾假期成人$298;小童$198
晚市收費:

星期一至三(不包括公眾假期前夕及當日)6pm-8:30pm或8:45pm-11:15pm 成人$318;小童$198

星期四至日、公眾假期前夕及當日6pm-8:30pm或8:45pm-11:15pm 成人$348;小童$198

(需加一服務費)

 

延伸閱讀:
【掃街王】荃灣夜市好去處 試食報告
【養生食療】拆解椰子油!外敷內服~食譜配方

香港18區美食有甚麼推介?

新假期編輯已經為你整合了香港18區美食指,其中包括尖沙咀、旺角、銅鑼灣等……即睇更多詳情。

香港有甚麼週末好去處推介?

香港18區都非常值得花時間好好探索,一家大細去暢玩的親子好去處、拍拖推介32大情侶好去處、落雨必去的室內好去處、慶生推薦20大生日好去處、新手必備19大靚景行山好去處、秋天戶外露營好去處…..