5間東京超好味星級鰻魚飯

每次去日本旅行，都有好多好多好多嘢食係一定要食，拉麵、壽司、天婦羅、燒肉乜乜乜。不過感覺好似漏咗一樣好代表到日本飲食文化嘅食物無提到…無錯啦，就係鰻魚飯！其實喺日本周圍都有鰻魚飯食，但偏偏人在日本要揀食啲咩嘅時候，唔知點解永遠都會諗拉麵同壽司先，鰻魚飯真係好少第一時間無諗得起佢。所以今日一於同你溫故知新下，介紹返幾間去東京唔可以唔試嘅老字號鰻魚飯店！

「超過260年嘅鰻魚專家」上野伊豆榮

要數最有歷史嘅鰻魚飯專家，上野伊豆榮一定有份。呢間位於上野嘅本店創始於日本江戶時代中期，計返已經超過260年歷史，由好耐以前一間小小嘅鰻魚飯店，變成依家7層高又有氣派嘅鰻魚大樓，就知佢有幾多fans啦！

蒲燒鰻魚Set，有燒鰻魚、醃菜、鰻魚肝湯同白飯。

第一次食鰻魚肝，原來都幾彈牙，而且個湯又清又甜。

服務員話呢度嘅鰻魚燒之前都會先蒸一蒸，然後用嚟自和歌山嘅備長炭再慢慢燒。

伊豆榮 鰻割烹 (上野池の端 本店)
地址：台東區上野2丁目12-22

「南千住之寶」尾花

另一間唔可以唔提嘅超好味鰻魚飯就係呢間位於南千住嘅尾花。南千住雖然比較遠離市區，不過每日都有好多日本人專登坐JR入嚟排隊食尾花嘅鰻魚飯，聽講佢開鋪前兩個鐘已經有人開始排，真係好誇張。

招牌鰻魚飯，老套啲都要講句，啲鰻魚真係入口即溶架！

另一樣強烈推介，鰻蛋玉子捲！

尾花
地址：東京都荒川區南千住 5-33-1

「淺草鰻魚王」前川

去淺草除咗指定要去雷門寺兜個圈之外，記得一定要去坐落喺淺草地標駒形橋旁邊一條小路入面嘅老字號鰻魚飯前川坐低食鰻魚打個卡啦！喺呢度唔單止有好好味嘅鰻魚飯食，仲可以望住個淺草同Skytree景食飯，真係消化都好啲。

坐喺呢個景前食鰻魚飯，又好似好味啲喎！

雖然間間啲鰻魚飯賣相都差唔多，但食落你就知啲分別（包括多唔多骨，入口會唔會即溶etc）

全部鰻魚都係由資深老師傅操刀，包保燒得啱啱好！

駒形 前川 うなぎ
地址：東京都台東區駒形2-1-29

「百年鰻魚老店」宮川本廛

提起去築地食嘢，好多人都會第一時間諗到壽司同魚生飯。其實喺築地外圍有一間隱世鰻魚飯，平時經過你好大機會以為佢係一間唔起眼嘅普通民宿，但當你打開門入到去，就會發現自己即刻入咗一個只有你同鰻魚飯嘅美好世界。

一睇就知呢條鰻魚有幾鬆化啦。

同樣有鰻魚玉子捲提供，不過呢度連玉子都做到入口即溶。

宮川本廛
地址：東京都中央区築地1-4-6 宮川本店ビル

鰻魚 赤坂 勢きね

鰻魚 赤坂 勢きね喺東京非常出名，成日都有名人嚟幫襯，因為呢度有一種其他店鋪無又好特別嘅鰻魚飯食法，日文叫「ひつまぶし」Hitsumabushi ，即係類似茶泡嘅食法。

呢set就係「ひつまぶし」，仲有其他配料畀你自製茶泡飯。

連杜如風都有介紹過，就知道係必試啦。

鰻魚 赤坂 勢きね
地址：日本東京都涉谷區千駄ヶ谷5-24-2 タイムズスクエアビル14F

以後去日本搵嘢食嗰陣記得唔好忘記鰻魚飯呢種國寶級美食啦！依家網上成功申請指定渣打信用卡，即有機會贏取HK$5,000旅遊禮券，俾你免費飛轉日本食好嘢！
立即申請

圖片來源：隨意窩@wigwang、痞客邦@Abo Tsai、 林氏璧和美狐團三狐的小天地