名古屋四季花海任你睇

講到去日本賞花，好多香港人都可以話係專家。唔單止要做research睇返近幾年邊月邊日開始開花，又要睇吓今年嘅溫度同天氣嚟評估吓啲花會唔會早開或者遲開，都真係幾煩架。所以好似我呢啲咁懶嘅人，最啱都係去以下幾個位於名古屋市，差唔多任何時候都有花睇嘅地方賞花啦！

「一年四季3D花海」名花之里

名花之里基本上係分成溫室內同溫室外兩個花花世界。首先介紹言個溫室，喺呢個10萬呎，暫時係全日本最大型嘅溫室裡面，種咗12000棵唔同品種嘅秋海棠，沿住條花路兩邊仲有一盆盆好似人頭咁多嘅巨型秋海棠，唔單止咁，就連頭頂都有另一種花身比較細嘅秋海棠從天而降，真係360度都畀唔同顏色嘅秋海棠圍到實！

當你好唔容易咁喺溫室同花海Selfie完，正想走返出室外抖返啖氣嘅時候，你眼前會即刻出現一個有成43000平方米嘅花田，就算你望向邊個方向都只會見到一望無際嘅花海。春天呢度會有鬰金香、夏天有繡球同菖蒲、秋天有大波斯菊、冬天仲會同場加映埋燈飾添！

掛喺溫室天花嘅秋海棠，棵棵都好似人咁高！

室外同室內完全係兩個感覺，小心Selfie到相機無電！

之前仲搞過麵包超人主題添！

冬天夜晚仲有埋燈飾，不過一樣睇到嘩嘩聲！

なばなの里

地址：三重県桑名市長島町駒江漆畑270

「公園嘅鬰金香海」國營木曾三川公園

喺日本，除咗櫻花最受歡迎之外，鬰金香一樣都有唔少fans。而喺每年春天，當地大大小小嘅公園都會舉辦鬰金香祭，去睇花嘅人數絕對唔比賞櫻嘅少。喺名古屋市附近就有個全國最大，橫跨三個縣嘅國營公園，喺裡面賞花唔再係大人嘅專利，因為呢度有一位超受小朋友歡迎嘅巨星坐陣，佢就係超級Kawaii嘅Miffy啦！

Miffy喺呢度唔單止受歡迎，就連官方都非常重視呢位大人物，每年都會專登為佢做一個有成2個籃球場咁大嘅Miffy花壇，每次都會動用到幾萬棵唔同品種嘅鬰金香去砌出多個Miffy圖案，如果想一眼睇晒所有Miffy圖案嘅話，最好就要上旁邊高65米嘅展望台慢慢欣賞。另外仲有一個由116個品種，總共有13萬棵鬰金香而砌成嘅無敵大花海，又要大把新相要upload上IG / fb啦！

第一眼睇呢張相以為係油畫，但其實係實景嚟。

全個公園最高就係得呢個展望台，要從高而下欣賞花海就只有佢，所以成日都排長龍。

呢度有好多好罕見嘅鬰金香品種，包括呢種淡紫色嘅鬰金香。

國營木曾三川公園
地址：岐阜県海津市海津町油島255-3

想瘋狂喺花海Selfie？依家只要喺網上成功申請指定渣打信用卡，即有機會贏取HK$5,000旅遊禮券，畀你免費飛去名古屋旅行兼賞花影相呃Like啦！
立即申請

圖片來源：番新聞、絕景日本、痞客邦@onoda0705