$300種出阿愁 DIY沙畫盆景 【觀塘有乜玩】

香港好去處

廣告

一諗起暑假就快完,相信好多學生哥都會好愁,所以更加要趁開學前玩盡佢!但係大熱天時唔想出街玩到身水身汗,呢個沙畫盆景 工作坊 就啱晒你喇!以沙畫畫出唔同嘅情緒專員,再用佢哋嚟種盆栽,任性起上嚟,仲可以根據當日嘅心情嚟決定淋邊盆添!(講笑咋,植物都係生命嚟㗎!)

雖然記者唔係學生,但係對於日日要返工都表示好愁,所以今次決定整隻阿愁返公司放喺枱面,等佢陪我一齊愁。唔好見佢咁靚以為好難整喎,其實掌握咗技巧之後,大概2個鐘就已經可以完成!
揀好要畫嘅圖案之後,就要將紙樣貼喺玻璃杯邊,方便之後可以對住嚟畫。

之後就可以根據紙樣上嘅線條搽膠水,膠水搽多好過搽少,因為上咗色之後可以用筆推返啱沙畫嘅形狀,不過如果太少膠水,沙就會黐唔實玻璃杯㗎喇!

另外,導師建議由杯底開始畫起,同埋畫咗深色嘅線條先,咁就可以避免淺色嘅沙被染色。

頭髮部份可以分開幾次上色,不過要小心控制膠水份量,如果唔係出嚟就會變到一撻撻咁!

畫完之後就可以揀選鐘意嘅植物。

喺玻璃杯入面放一個錫紙兜,咁就可以將泥土同埋沙分隔開,外層用沙填滿底色,內層就放入植物同泥土。

最後,用泥土填滿整個玻璃杯,咁就完成喇!

記者今次都只係第一次整沙畫,本來都擔心整出嚟會變到好似翻版公仔咁樣,眼耳口鼻走晒位,不過好彩,原來都唔係好難,用咗兩個鐘頭多d就完成,整完之後真係好有成功感!以後有阿愁喺公司陪住我,心情都好d!好想整埋另外4隻腦朋友,帶埋佢哋返公司呀!

除咗幾位情緒專員, 工作坊 仲可以整其他公仔,好似近期大熱嘅Minions同蛋黃哥咁。如果想man d行型格路線,整Star Wars亦得!再唔係,可以預先將想整嘅圖案send畀設計師,佢就會話畀你知到底整唔整到。

沙畫盆景以大小收費,除咗阿驚之外,其餘4位腦朋友都係屬於大size。

沙畫盆景
工作坊 現貨
7-8cm(小) $300 $350
9-12cm(大) $400 $450
*自定款式另外+$100

新假期食玩報料:[email protected]
歡迎Instagram / facebook 使用#weekendhk 報料,資料一經選中會為你公告天下!
想最快接收第一手的旅遊飲食資訊?Easy!
1. 先分別讚好「新假期周刊」及「新假期Jetso 」兩個Facebook專頁
2. 在「讚好」按扭下揀選「搶先看」,搞掂!