梳乎蛋 + Tsum Tsum 文具晒冷!Hea住碌返學

熱話

廣告

上次介紹《玩轉腦朋友》文具,挑起咗一班文具控內心深處無盡嘅欲望!所以我哋今次一次過講埋 梳乎蛋 蛋黃哥 同 Tsum Tsum 兩大風頭躉嘅開學文具,上新假期Facebook玩遊戲仲有機會帶埋佢哋返屋企!嘩!巧邪惡呀XP

Hea爆梳乎蛋 唔想返學文具系列

唔想返學呀~!放學未~?可能,每個人心入面都有一隻hea到爆嘅梳乎蛋 。佢懶懶行嘅性格又真係好易激嬲人,不過個樣懶得嚟都幾萌,所以仍然儲落一班fans,唔知用佢嘅文具會唔會都hea埋一份呢?下圖嘅單行簿就有hea到出汁嘅梳乎蛋 做封面,睇佢俾人夾起咗都仲無力地吊喺度,唔肯郁,真係好好笑,仲有一套兩款嘅memo紙,雖然要$40一套(好貴!)但就可以幫梳乎蛋 加下抵死旁白,留言俾同學仔,仲有黃色鉛芯筆同啡色原子筆,原子筆係黑色墨水,可以用嚟畫下嘢,抄下Note。

假如讓我hea下去

暑假完咗,返學就無得再hea啦…咁就俾梳乎蛋 hea埋你嗰份啦!單行簿封面成個黃色,非常醒神,但 蛋黃哥 一句「做咩啫…?」,串串貢咁,真係好抵死XD 鐵筆盒亦有大大隻 蛋黃哥 趴喺度,入面嗰層內格就有俾蛋殼笠住嘅傻豬樣,藍色原子筆上面有細細粒立體梳乎蛋 ,攤喺透明蛋白上面,個樣好懶呀~另一支原子筆就將梳乎蛋 嘅手仔變成按制,右手係紅色,左手係黑色,十分趣緻,不過要$55一支又真係好肉赤!

揹埋梳乎蛋 返學!

蛋黃哥 咁懶,成日都要人推先郁,大家既然咁愛佢,不如索性揹埋佢上身啦!呢個Tote bag 有大大個蛋黃哥嘅萌樣,拎出街好shape!袋入面放到A4 size file ,放4-5本書都得,亦有梳乎蛋 無聊語錄file,上面印有「走得未啫!?」好代表到(懶)學生哥等放學嘅心情。

同Tsum Tsum一齊碌返學!

講完懶到出汁嘅蛋黃哥,就到活潑醒目、非常Colourful嘅Tsum Tsum啦!呢班迪士尼朋友變到圓碌碌,冧暈大小朋友,有佢哋一齊返學,真係人都開心啲!

呢支原子筆有大大個公仔頭,裡面其實內有乾坤!一按後面個制就會彈出小伙伴,好似Elsa係配小白、大眼仔係配毛毛、巴期光年係配三眼仔、史迪仔係配小金、美妮係配米奇,隻隻都好卡嘩依!不過都幾貴,要$50一枝,買咗就真係要噤多幾下,好似抵玩啲!

Tsum Tsum 小小日曆記事簿

返到學校會遇到好多deadline,所以要整齊地寫低每個重要時間!下圖嘅日程手帳細細本,版版都印有彩色Tsum Tsum公仔嘅萌樣,每月有一個月程表再加日程表,可以寫詳細少少,可以由依家用到2016年12月,$35都幾抵。而文件夾就有Tsum Tsum全員大包圍款式(下圖右),可以隻隻見齊晒,仲有女角大集合(下圖左),有美妮、Marie等,非常Girly!

望住Tsum Tsum提神!

我哋都知一上晏晝堂就好容易飯氣攻心,會瞌眼瞓!所以專登介紹埋兩款筆記簿,等大家抄緊筆記時望下啲圓碌碌嘅Tsum Tsum,醒下神!同文件夾一樣都係有全員大包圍款(下圖右)同埋單獨系列款(下圖左),大包圍款頁頁都好Colourful!有胡迪、巴斯,仲有小熊維尼等!而單獨系列款就有Frozen,內頁有齊Elsa、Anna、小白等要員,亦有彩色內頁,不過論價錢,大包圍款抵少少,平$3。

Tsum Tsum筆盒套裝 文具齊全

做學生,點可以無筆?最基本要有鉛筆同原子筆,下圖嘅HB鉛筆同原子筆都印有一大埋迪士尼朋友,夠盡搶鏡,原子筆一套有3支,借埋俾隔離同學仔用都得,不過就得藍色墨水!擦膠筆唔過$10,都算抵買,而雙面膠帶就細細圈,一碌就碌出雙面膠紙,俾帶膠水返學更企理。鐵筆盒又係全體大包圍款,夠搶眼,但就無內隔,啲文具放得無咁整齊。

疊埋一齊 memo紙

呢款memo紙,喺寫完嘢之後,可以將張紙摺好、卷埋,咁就成為圓碌碌嘅迪士尼朋友啦,仲可以將佢地疊埋一齊,有得寫又有得玩,送俾朋友仔都唔錯!一包入面有4款朋友仔,包括唐老鴨、小熊維尼、跳跳虎、同小白。價錢方面,$55一包真係比較貴,如果一包可以多幾款迪士尼朋友就好啦!

 

銷售點

(a)Gudetama Pop-up Store (即日至2015年9月6日)
地址:朗豪坊7樓(顯示地圖)

(b) Honey House Shop
地址:銅鑼灣記利佐治街2-10號銅鑼灣地帶2樓245號鋪 (顯示地圖)

(c) 中南廣場有限公司
地址:油麻地彌敦道503號(顯示地圖)

(d) LOGON
地址:觀塘apm一樓21號舖(顯示地圖)

(e)PIAGO
地址:九龍灣偉業街33號德福廣場二期(顯示地圖)

 

延伸閱讀
阿愁 陪返學!瘋搶《 玩轉腦朋友 》開學文具!

歡迎Instagram / facebook使用#weekendhk報料,資料一經選中會為你公告天下!
想最快接收第一手的旅遊飲食資訊?Easy!
1. 先分別讚好「新假期周刊」及「新假期Jetso」兩個Facebook專頁
2. 在「讚好」按鈕下揀選「搶先看」,搞掂!