伍姑娘逼供爆性事 高海寧性趣睇心情 Ali同男友欠激情 江美儀爆廁所造愛

原文刊於《東方新地》

伍姑娘同林盛斌主持的《Tiger’s Talk》，上親嚟節目的嘉賓都在兩位主持軟硬兼施之下自動爆料，而伍姑娘不吝嗇自己在演藝圈的親身經歷，在節目中一齊爆﹗最新一集請來《殺手》四條Queen李佳芯、高海寧、龔嘉欣及江美儀，今次唔係爆娛樂圈的血淚史咁簡單，而係大爆性事，在伍姑娘施威、阿Bob純熟主持技巧之下，四女首次在鏡頭前大談性，有啲紅都臉晒，青筋都現埋，絕對不容錯過。

龔嘉欣談性事：會不斷學習去配合另一半

最初伍詠薇以傾感情事入題，再講到馭夫術，後來轉化成感情同性事不可分割，仲話自己唔係鹹濕，而係男女關係重要的一環，然後開始自爆自身經驗，指自己不同年紀會有不同招式，又話只要一個眼神大家有默契就可以去造愛，仲豪言場地不會只局限在床上，伍姑娘話：「床係要嚟瞓㗎咋﹗」以爆料做引子，然後開始向嘉賓們套料，問會否配合另一半去增加性趣？龔嘉欣答：「男人都係愛新鮮、刺激，會配合另一半，都會聽多啲朋友經歷，會去學習，作為一個女人就算結婚一段時間又要學﹗」阿Bob即問高Ling係咪會盡全力去配合？高Ling不太情願回答就話：「我冇咁講，只係話嘉欣咁講。」被兩位主持逼供下，高Ling避無可避就答：「睇心情啦﹗睇吓嗰日拍完劇攰唔攰啦﹗」被伍姑娘一再追問後，高Ling一度大叫：「律師律師﹗」又向鏡頭後的高層樂易玲求救，伍姑娘就話中國人女性講性都仲係咁忌諱，高Ling 即和應：「你講得啱，私下講乜都得，開大咪（鏡頭前）就唔好喇。」

被問最佳性愛場所 美儀代Ali答：佢梗係圖書館啦

之後兩位主持加埋江美儀一起夾供 Ali BB，Ali話自己未婚唔識馭夫術，江美儀直接問：「咁你同男朋友依家仲有冇激情㗎？」伍姑娘再問拍拖到依家有冇激情過，Ali臉紅紅答冇，阿 Bob驚訝反問：「同男朋友由開始到依家有冇激情過先？」Ali如食了誠實豆沙包回答「冇﹗」，李佳芯即解釋：「因為我想同另一半嘅關係似朋友，可以入到對方嘅心入面。」即被伍姑娘同阿Bob笑乜咁深奧，二人繼而下一個話題，問到性愛場面，伍姑娘又係先自爆指喺床度造愛太悶，然後問大家試過喺邊個造愛場地覺得好正？並即問李佳芯，在旁的江美儀搶答：「佢梗係圖書館啦﹗」伍姑娘同阿Bob即自行FF又做埋動作，Ali笑到臉都紅，又尷尬都坐喺度傻笑。

高Ling被騙做小三 伍姑娘：睇你嗰樣都知專搶人嘢

節目中又講到出軌呢個話題，高Ling自揭曾被男友呃做咗小三都唔知，仲呃足半年，高Ling：「我試過被分手被背叛，之前變咗小三，仲呃咗我半年，最後佢選擇咗個女仔。」伍詠薇一臉不信任仲兇高Ling：「你似係搶開人嘢喎﹗」高Ling話：「我知我個樣似好有殺傷力，不過其實我好易信人﹗」伍姑娘不肯罷休：「你似搶人嘢 ，成個葉繼歡咁拎住支AK47咁掃。」受過情傷的高Ling指從失敗中成長：「我覺得係成長經歷，我會祝福佢哋。」