阿愁 陪返學!瘋搶《 玩轉腦朋友 》開學文具!

熱話

廣告

下個禮拜就開學啦!踏入校園之前,除咗要做晒暑期作業之外,最重要係⋯⋯買新文具!有新文具,上堂都開心啲,寫多兩隻字啦係咪?我哋今次就搜羅咗今期大熱《玩轉腦朋友》嘅得意文具俾你睇!有 阿愁 、阿樂、阿燥等多位腦朋友你返學!就唔會愁爆喇!

腦朋友文具 文具套裝最抵買

《玩轉腦朋友》上畫後感動一班大朋友同小朋友,5位情緒專員各有特色,其中以日日愁爆嘅阿愁就最受歡迎!食住個勢,市面湧現好多腦朋友產品,今次記者親身巡場視察,其中以阿愁單頭嘅文具同玩具都經已被掃得七七八八,但其實成班專員一齊出沒咪仲夠Colourful!下圖中幾個產品的設計算係幾靚,其中文具套裝更係算係抵買,$32就有一個筆袋,內有兩支鉛筆、一個鉛牛刨及一把短間尺,而筆袋size放多幾支筆都無問題。

Secret Garden效應! 腦朋友填色冊!

Secret Garden令各位大人小朋友都中晒填色毒!返學返得悶,放學又有排山倒海的功課,中間break下、玩下油顏色都唔錯!呢本顏色冊其實係電影故事書,可以一邊油,一邊重溫故事內容,仲送一本遊戲冊同4色筆,雖然4隻色真係少咗啲,但$45有兩本書睇下油下都ok!

溫馨小提示啱晒大頭蝦

哎吔!又唔記得溫到邊頁書!哎吔!又唔記得聽日要測驗!如果你成日都出現呢啲情況,咁就真係要考慮下貼下Memo紙提醒下自己啦!但如果貼埋都仲係無記性,咁就真係幫你唔到啦!今次值得推介的Memo紙真係可愛到暈,貼喺書入面凸個頭出嚟,以不同角色記低標示重點,溫書就更加得心應手啦!

寫封信俾老朋友!

依家搵朋友仔傾心事,通常都係經WhatsApp、Facebook,又或者直接傾電話,信封信紙都好少用,多數都係買嚟儲。不過,當寫完信俾好朋友,再收到佢親筆寫嘅信,係好窩心嘅。今次搵到嘅腦朋友信紙有兩款(圖上及圖下各一款),每套內裡有20張信紙及10個信封仔,仲包多6張貼紙仔俾你貼信封,而且信紙設計都有兩款,每款10張。用嚟同隔離位同學仔溝通傳情,真係一流!

新假期食玩報料:[email protected]
歡迎Instagram / facebook使用#weekendhk報料,資料一經選中會為你公告天下!
想最快接收第一手的旅遊飲食資訊?Easy!
1. 先分別讚好「新假期周刊」及「新假期Jetso」兩個Facebook專頁
2. 在「讚好」按扭下揀選「搶先看」,搞掂!