史上最強穿越劇《九五至尊》江華撼贏古天樂伍詠薇鬧爆某男藝人言行難頂

Jul 15 2020

一波未平一波又起，講緊嘅喺反反覆覆半年都未斷尾嘅肺炎疫情，新一波疫情又殺到，為己為人，都係出少啲街留喺屋企煲劇最穩陣！好彩無綫幾線劇集都有啲睇頭，尤其深夜時分重播時段。神級卡士電影級數神劇《天涯俠醫》播完後，由穿越劇《九五至尊》接棒。

史上最強穿越劇《九五至尊》

一講無綫穿越劇，人人以為最經典、最受歡迎係《尋秦記》，其實01年首播嘅《尋秦記》雖然大受歡迎歷久不衰，不過論收視，原來不如《九五至尊》。收視爆冷跑出，平均收視34點，大結局最高收視更達到46點。年頭播完套劇，熱潮到年尾都未退，男主角江華成為當年台慶頒獎禮「我最喜愛的電視角色」，而張可頤就同年撼贏宣萱、佘詩曼，成為雙料視后，絕對係師奶殺手江華同當家花旦張可頤嘅事業巔峰。

點解爆大冷跑出變全年收視冠軍？男女主角出色演繹居功至偉，故事講述張可頤飾演嘅呂四娘喺行刺江華飾演嘅雍正皇帝之際，兩人遇上水龍捲，意外地由清朝穿越時空到21世紀嘅香港。故事圍繞兩位古代人喺現代展開新生活，江華文謅謅又咬文嚼字搞到笑料百出，而張可頤就剛烈又硬倔，同江華處處作對到漸生好感過程極具喜感，笑點絕對唔比項少龍去秦朝鬧嘅笑話少！

轉行賣保險之前，師奶殺手江華最耍家係扮劉華同埋扮皇帝，03年喺穿越劇《九五至尊》中就係飾演由清朝飛到落現代香港嘅雍正皇帝。

《九五至尊》當年放喺過年後炮灰檔播出，點知爆冷成為最高收視劇集，張可頤做咗雙料視后，江華得最喜愛男角色獎，之唔係因為同年仲有另一個收視經典《戇夫成龍》囉。

雍正陰差陽錯袋住李大蝦證件被表叔收留，為生存又要洗廁所又要送外賣。而呂四娘，就因為出口成文身手不凡，成為富商身邊貼身保鑣。 — 雍正陰差陽錯袋住李大蝦證件被表叔收留，為生存又要洗廁所又要送外賣。而呂四
娘，就因為出口成文身手不凡，成為富商身邊貼身保鑣。

無綫多年來拍過唔少穿越劇，而且收視亦屢創新高，證明呢條橋使得，難怪長拍長有。

2012年首播、由馬國明、林峯同楊怡等主演嘅《回到三國》，收視高達30點，亦對得住強勁卡士，而馬明喺劇中所創嘅「港男十八式」，抵死又搞鬼！

16年由王浩信、朱千雪孭飛嘅《EU超時任務》劇情波瀾曲折，當年吸引大批觀眾晚晚追睇，大結局更加喊死人，30點最高收視以近年嚟講，成績相當驕人。

13年播出、最高收視達37點嘅《情逆三世緣》，最吸引當然係金牌拍檔歐陽震華同關詠荷拍住上，亦係佢哋相隔十二年後再度合作嘅劇集。

伍詠薇鬧爆某男藝人言行難頂

同場順手又爆番個秘聞先，話說伍詠薇近日就爆大鑊，鬧爆曾經合作過嘅當家小生級男藝人言行難頂，三宗罪包括恰新人、遲到早退、同埋開工 no show 扮大牌。至於呢位難頂男藝人冇開名，不過就畀咗幾個 tips，姓名得兩個字、亞視出身、好鍾意學五虎其中一位，大家有興趣不如煲劇之餘又玩吓猜謎語啦，反正抗疫大把時間！