湯洛雯馬國明甜蜜香閨留宿 「宅男」融入女友生活圈子勁social

原文刊於《東方新地》

馬國明帶大容量旅行袋 去湯洛雯香閨留宿

既然認定公開認愛，下一步梗係盡情享受熱戀期，光明正大肆無忌憚見多幾面啦！話口未完，呢日就見到馬明車住靚湯返女方紅磡香閨，唔使講，梗係出邊拍夠拖，再返屋企短聚一陣 sweet sweet 先！撻著四個月、公開一個月，都已經足夠馬明摸熟靚湯地頭，驅車直駛殺入停車場，連管理員都見慣晒問都唔會問多句。到埗後靚湯先行落車笑笑口等候，馬明就兜個圈去後座攞齊嘢先……嘩，踩上香閨要帶個大容量旅行袋，目測應該唔止短聚，行裝起碼夠住多幾日喎！

「宅男」融入女友生活圈子勁social

其實馬明自與靚湯拍拖後，有巨大轉變，除咗近日 IG 頭像同時換埋「 定情公仔 」獨角獸同小馬頭像外，馬明更愛到融入女友嘅朋友及生活圈子㖭！一向「 宅 」到爆唔多鍾意應酬嘅馬明，竟然同女友拍拖出席朋友飯局，日前罕有出席樂易玲生日 party 後，同日又孖咇同楊茹庭 ( 前名：楊如芯 ) 飯敍，突然變得活躍社交圈子，叫得郁佢嘅當然只有女友靚湯先做得到，馬明果然就晒女友聽教聽話！