再見了，我的寵愛@DINING娜
雖然周圍去發掘好嘢食係好開心，但每個人心目中，都始終會有最愛嘅comfort food，即係食完即刻慰藉心靈嗰啲呀。我就鍾情於讚岐手打烏冬。有時放咗工攰到成隻積咁，行屍走肉咁行去食晚餐，始終都係想食烏冬。呷啖湯底，食啖烏冬，靈魂歸位，發現自己仲生存緊。
新都會甘味就係令我愛上呢個comfort food嘅地方，而作為一個忠實嘅食客，喺呢個老地方最後一日營業嘅時候，當然要返去捧下場。照舊一坐低就order一碗牛柳番茄湯烏冬，仲同老細有哥傾咗幾句。
有哥話其實呢間甘味陪住佢一齊成長，由一開始「甘味茶屋」做到「甘味讚岐手打烏冬」，都係由佢同埋班夥計一手一腳湊大；邊學邊做汲取嘅經驗，成就之後更進步嘅甘味。
等緊嘢食嘅時候，遇到個舊街坊，selfie完寒暄兩句，佢問我有冇留comments落個wall到，仲以為佢講facebook個wall，原來係甘味個wall，見到好多熟客都留言，話好唔捨得甘味，伴佢成長，係老土但係warm嘅。
終於都有嘢食，my favorite牛柳粒番茄湯烏冬。甘味啲烏冬係當年有哥特登由日本四國香川縣直接引入，全部都係用小麥粉手打製成，配合perfect嘅烹調時間，入口彈牙煙韌，同即食烏冬根本冇得比。
舊街坊就食燒牛肉二十穀米釜飯，呢個先係佢嘅comfort food，點都要返嚟支持下。入面有紅米、糙米、莧菜米等20種唔同嘅穀米，補充食物纖維之餘，亦改善消化同排泄系統，健康到不得了。
見有friend陪我就追加多兩個小食一齊開心share，嗌咗八爪魚餅沙律配泡菜千島汁，鍾意呢款醬汁夠特別，加埋八爪魚餅啖啖肉，開胃得嚟唔算好辣。而梅子燒原條魷魚，酸酸地仲好大條，我敢擔保普通兩個人食，一定食唔哂，但dining娜我有3個胃就另計。
其實大熱天時喺戶外位食碗熱辣辣嘅烏冬都幾係嘢，一到lunch時間多人到焗住要坐外面都爆晒場，好唔好食？受唔受歡迎？唔洗我多講啦。所以啲人話，回憶永遠係最好嘅調味料。
