被傳向樂易玲𢱑撈 28歲麥明詩IG派福利兼回認傳聞

原文刊於《東方新地》

現年28歲的麥明詩，15年挾住劍橋大學法律系「十優狀元」參選港姐奪冠，以高學歷女神姿態備受網民追捧，更一度與另一冠軍港姐馮盈盈鬥到你死我活；不過，去年麥明詩突然宣布放棄做無綫親生女，改簽一年一騷「綠葉約」，選擇學以致用做回老本行，在商業顧問公司做顧問工作，不過，成為OL上班族後，早前Louisa上《後生仔傾吓偈》節目，就呻爆話現時收入大幅下降，每朝要七點起身，做了這份工作先知打工仔辛苦。

呻到出晒面，近日就傳出麥明詩在三月的葉念琛生日會上，向無綫高層樂易玲𢱑撈，指她想再返無綫拍劇。不過傳聞好快就被麥明詩否認，更在IG Story留言話：「冇回巢想法！勤力返工冇乜邊個唔辛苦，但係有付出先有收穫，現時工作充實有意義！」更寸爆話：「想繼續現時嘅專業事業！」

堅決否認回巢係一回事，不過麥明詩仲係好鍾意向網民派福利，日前她就做影後，po出三點式泳衣照晒滑溜玉背，搞到班宅男起哄求睇正面！其實前排佢先有po性感舊相大行動，話係14日舊照challenge ，似乎仲係好留戀昔日工作美好回憶呢！