Slide The City 率先試玩!4大「中伏位」揭盅

香港好去處

廣告

聽日(8月22號)就會正式開幕嘅香港 Slide the City ,記者今日就去咗率先試玩!仲有唔夠12個鐘就開幕,各位Slider係咪好興奮呢?不過,1000呎嘅滑水梯,竟然用咗30秒就瀡完?!點解會快成咁?即刻同你解構中伏位!

1. 1000呎變300呎?

聽到條滑水梯成1000呎咁長,聽到都興奮!當然要即刻動物衝去玩啦!點知去到現場,滑水梯長就長喇,不過唔夠斜,目測去到300呎左右就已經係平地,要靠旁邊嘅工作人員幫手推先瀡得郁,去到後段甚至要起身行!話就話1000呎,但係唔夠斜,30秒就瀡完斜道,之後嘅600呎就已經唔算得係 Slide the City ,極其量都只係Walk the City咋!

不過咁,一開始嘅斜道雖然唔算斜,但係都算幾好玩,而且一路Silde可以一路望住維港景色,都算係咁啦。

2. 清水變污水無難度

由於安全問題,係唔可以著住鞋Slide,所以瀡完就要赤腳行返去起點再排過隊,可想而知雙腳有幾污糟!再濕水瀡落去,幾乾淨嘅水都變成洗腳水啦!記者今日試玩,淨係得唔夠10個人,都已經將起點位踩到黑晒,聽日咁多人真係唔敢想像呀!

不過咁,上星期深圳場嘅 Slide the City 會喺場邊舖上防滑墊,咁就可以避免污糟嘅問題,希望聽日會安排得好d啦,實在唔想見到連深圳都場舉辦得好過香港呀!

 

3. 睇住夜景Slide!真係咁正?

一聽到 Slide the City 會開夜場,記者即刻想像到可以望住維港夜景咁Slide,拍出嚟嘅片仲唔係靚絕全場?點知!起點位置竟然冇set燈!黑到乜都影唔到!可惡!希望我哋講完,正式開幕後會有人set燈啦。雖然夜晚冇咁熱,不過濕身吹風實在太凍喇,凍到等緊嘅時候都忍唔住要縮埋一舊保暖呀!大家記得帶多條保暖毛巾呀~

不過咁,現場有Sony Action Cam租借,拍出嚟嘅片又比想像中光喎。各位Slider要check定你嘅攝影設備嘅感光有幾勁喇!

4. 無限Slide即係可以玩到幾多次?

頭先講過,瀡落嚟只係30秒,行去終點要1分鐘,由終點行返去起點又要差唔多3分鐘,淨係玩一次,未計排隊,都要接近5分鐘。今日得唔夠10人試玩,半個鐘可以Slide到3次。各位Slider,聽日咁多人,好自為之喇!

不過咁,由於場地真係太大,記者來來回回咁行都已經行到有d攰,玩幾次都已經開始想抖吓。既然冇限時,無限次嘅Slider玩吓停吓可能都好嘅。(好似係)

雖然今日試玩有好多甩漏,不過始終一切都係以聽日為準!唯有希望明天會更好啦!但係無論點都好,飛就已經買咗,各位Slide,盡情瀡啦!