【掃街王x杜如科】荔枝角蜜桃糯米糍 ‧ 1尺巨熱狗

熱話

新假期編輯部

Aug 21 2015

掃街王出現了！嘩等陣，原來我哋有特別嘉賓亂入 – 杜如科！杜如科介紹完東京美食重返香港之後，同我哋報料話荔枝角有好多美食，有水蜜桃糯米糍，又有1尺長熱狗，又有勁勁勁辣汁燒賣！證明荔枝角唔單止係工業區同長者住宅區，更加係掃街必去之處，去片！

第一站：喪吞1尺長熱狗

知道杜如科食得，所以第一站就食一個勁量級美食，1尺長巨熱狗！食物最主要當然是以體積作賣點，但同時店舖使用了自家即日製的的巨型麵包，所以麵包食落有咬勁。大家可以call幾個大食仔女叫一份一齊share食。

21212121 — 一尺長巨型熱狗 $99，正常一個人應該食唔哂，但杜如科就ok

Hero Sandwich
地址：荔枝角長義街9號D2 Place 3樓306號舖（顯示地圖）
電話：2880 9260
營業時間：星期一至日: 12:00-21:00

第二站：大熱$11手掌咁大綠茶糯米糍店全新水蜜桃糯米糍

小店將長洲芒果糯米糍玩進化，成為綠茶芒果糯米糍同益力多芒果糯米糍。咁得意杜如科當然要試下，點知去到我哋再發現全新水蜜桃糯米糍，味道好夾之餘，皮又薄果肉餡又大件，呂宋芒果肉有2cm厚，水蜜桃果肉有3cm厚。最重點就係價錢只係$12(水蜜桃糯米糍)同$11(綠茶芒果糯米糍)。

Tips: 記得記得，糯米糍的出貨時間是一日的12:00，15:00，18:00。

王孖記菓子
地址：荔枝角青山道475A號地下A舖（顯示地圖）
電話：5592 9088
營業時間：
星期一至五: 08:30-20:00
星期六: 08:30-15:00
星期日及公眾假期休息

第三站工廠隱世漢堡包

行行下荔枝角，發現原來連工廈小店都一樣有美食！這間位於後巷的小店，主要賣炒粉炒飯，但就有提供其他麵包類食物。今次杜如科就試咗一個日式芥末漢堡包，熱辣辣即時製作的漢堡包，所使用的芥末汁相當有味，令整個漢堡相當入口，下午茶少少餓可以諗一諗。

永泰小食
地址：荔枝角青山道558號永盛工業大廈25號（顯示地圖）
電話：2744 4466
營業時間：
星期一至六: 09:00-19:00
星期日: 休息

第四站地膽推介勁辣燒賣

杜如科事前千叮萬囑，去荔枝角掃街，一定要食昌華街燒賣，燒賣太普通？錯啦！佢嘅特色超級勁勁勁辣汁真係相當可怕，點少少已經好辣，燒賣都蒸得剛剛好，行過歡迎大家放低$5挑機。

金華美食
地址：長沙灣昌華街20號金華閣（顯示地圖）
營業時間：星期一至日: 07:00-21:00

第五站：工廈進口食物特賣場扮嘢巨峰提子啫喱

荔枝角一大特色就是有很多工業大廈，而這些工廈又收收埋埋很多特別小店。今次介紹一間樓上店，特色就是賣很多特色進口食物飲品。杜如科就試咗一個外型似足提子的巨峰提子啫喱，大大粒圓型啫喱有個特別的食法，詳情記得睇片睇佢示範食。另一個介紹的就是日本芝士蟹蓋通心粉，一個個包好蟹芝士與通粉的蓋，份量唔大一叮就食得，係宵夜之選，食法詳情按我。

Oyster Gozatu
地址：荔枝角長沙灣道883號億利工業中心 2 樓 17B 室（顯示地圖）
電話：9855 4640
營業時間：
星期一至六: 13:00–19:00
星期日: 13:00–18:00

第六站：泡菜中西混合點心泡菜豚肉燒賣

最後一站所食的就是一間Fusion餐廳，杜如科就試咗幾個看似特別的點心，包括：泡菜豚肉燒賣，番茄牛肉窩貼，龍蝦湯小籠包。三個點心有韓色，有中式，又有西式特色，幾有gimmark。但食落就覺得和普通的小籠包與燒賣分別不大。唯獨番茄牛肉窩貼，番茄味重，窩貼的製作更加令皮與肉混合得剛剛好，所以佢就係杜如科之選啦！