41歲楊思琦為囝囡產後急撲水  虛擬老公offline為錢返內地出騷唔驚!
41歲楊思琦為囝囡產後急撲水  虛擬老公offline為錢返內地出騷唔驚!

41歲楊思琦為囝囡產後急撲水 虛擬老公offline為錢返內地出騷唔驚!

楊思琦當年與吳帥珠胎暗結,點知投資錯誤男方走佬,她咬緊牙關誕下女
兒楊卓穎成為單親媽媽。八年後楊思琦離奇懷上第二胎,兒子Kody今年2月出世,生父成謎BB都係跟阿媽姓楊,雖然楊思琦屢以老公是圈外人希望保持低調為由解釋,但孕婦寫真老公冇參與,囝囝初生寫真都係得三母子,思琦口中的Mr.Right如同網上遊戲的虛擬人物一樣,offline咗就煙消雲散。

原文刊於《東方新地》

楊思琦為囝囡產後急撲水

產前陀住巨肚依然搏命搵錢的楊思琦,產後極速修身為細仔的奶粉錢努
力,未坐滿月已周圍𢱑job,即使肺炎疫情對娛樂圈影響甚大,楊思琦依然大無畏唔介意接洽內地登台騷,看來唔容許手停口停。思琦講到虛擬老公錫到佢燶,但產後即復出撲水養家,真係講唔通囉!

楊思琦絕對是圈中奇女子,當年因飛甩拍拖多年感情穩定的李泳豪,搭上空心吳帥錯晒,在美國生埋大女楊卓穎後,她返港重過新生活,辛苦養家又要供五個物業,搵少啲都唔掂,所以楊思琦14年離開無綫後,密集式中港兩地走,拍劇、拍電影、代言、登台與酒吧騷來者不拒,生活上自己慳得就慳,甚至為工作捱到病都要供囡囡讀國際學校,培育女兒多方面發展。

楊思琦12年誕下大女楊卓穎,八年後再迎來兒子Kody,冇爸爸的全家福,楊思琦似乎已經習慣了。
楊思琦12年誕下大女楊卓穎,八年後再迎來兒子Kody,冇爸爸的全家福,楊思琦似乎已經習慣了。
單身多年一直話感情冇著落的楊思琦,去年10月驚爆又大肚,臨盆前與囡囡卓穎去影孕婦寫真,老公未見影。
今年2月中兒子出世,楊思琦只透露囝囝英文名叫 Kody,暱稱「豬豬」,她更與囝囝去影初生寫真,雖然細仔出世前她聲稱與老公在外地已婚,但Kody也跟媽咪姓楊。
為湊B冇覺好瞓的楊思琦,笑指大女卓穎懂事聽話,是照顧弟弟的好幫手,而兩個月大的「豬豬」能吃能睡,生長線超晒標,現在已變成「大豬豬」。

虛擬老公從未online 為錢返內地出騷唔驚

去年10月楊思琦突然被驚爆大肚,近年冇承認過有拍拖,第二胎經手人自然備受關注,每次被追問老公身份,她都避重就輕遊花園,只表示在對的時間遇上對的人,對方是圈外人卻十分支持她的工作,對於被質疑老公在懷孕期間冇影,她又解釋老公要低調,到兒子出世被發現都是與大女一樣跟楊思琦姓楊,外界對其老公是否真的存在更加成疑。據知情者透露:「真係從來冇人見過思琦老公,佢喺香港生,冇理由一次都未見過佢有男人陪佢產檢,就算影孕前同產後寫真,爸爸都係冇出現,搞到思琦好似一直喺度虛擬緊自己個老公咁,成件事真係好奇怪,所以大家都猜測 BB生父唔見得光嘅種種原因。最離奇就係生前同生後思琦都繼續搏命搵錢,佢講到個虛擬老公對佢咁好,又點解會忍心佢未坐完月已經急住復出做嘢?」

得天獨厚的楊思琦,懷孕期間都是肥胎唔肥人,產後她即搵專人紮肚,唔使一個月已回復美好身材。
上年推出單曲〈愛的森林〉正式進軍樂壇的楊思琦,產後一個月現身公開活動接下《 2019年 AEG音樂排行榜頒獎典禮》「鑽石新人獎」及「鑽石全方位歌手」獎。

今年2月兒子 Kody出世後,楊思琦即急不及待搵專人幫她紮肚修身,很快小蠻腰已經歸位,而她亦四出放風準備好產後復出,可惜香港受新冠肺炎影響,九成九的演藝工作都叫停,據知楊思琦非常心急,不斷聯絡國內的中介單位,知情者說:「原來內地好多夜場都繼續經營,思琦話唔驚,佢會做好抗疫措施,總之有登台同騷佢都照接,可以繼續安排。」楊思琦博成咁,全因有對年幼仔女要養又要孭起頭家,而佢口中嘅好老公究竟身在何方呢?

思琦妹年過四十女人當自強,雖然口口聲聲說有個非常關心和照顧她的老公在身邊,但老公形同虛擬,生完囝囝遇上疫情亦冇有怕,狀態已回勇的她希望疫情過去可以繼續正常搵錢養家。
楊思琦在情路上極盡坎坷,幸有母親做最強後盾,年初被影到陀住巨肚湊大女放學,而囝囝出世後,楊母亦幫忙湊孫,分擔楊思琦的辛勞。
去年9月,陀住四個月琦瞞住全世界,為ViuTV節目《香港親善小姐》擔任主持,為做節目搵命博,與首爾一班美魔女大跳 K-Pop舞,返港後才被踢爆有喜,諗起都牙煙。
關鍵詞
楊思琦

最新吃喝玩樂資訊