31歲謝芷倫透視裝狂操身型 《法證IV》扮真空死屍出位

撰文、圖片：東方新地

謝芷倫《法證IV》扮真空死屍出位

無綫重頭劇《法證先鋒IV》，首集跨平台平均收視高達 37.1點，破盡八年來紀錄，收視勢如破竹，令TVB一夜間回到巔峰，一班參與拍攝的演員全部升呢，不過，講到最出位，並唔係一班劇中主角，而係近日在新單元中扮演情 婦，被殺後放入膠袋真空密封的新晉小花謝芷倫，首次扮演死屍角色的她，接到劇本二話不說親身上陣。

同劇演員大讚謝芷倫專業

據知情者透露：「監製梅小青出名要求高，今輯《法證》比起之前三輯更嚴謹，做足晒資料搜集，一班演員嘅服飾裝備都一絲不 苟，就連扮演死屍都唔求其，平時一啲死屍，通常都係搵道具或者臨時演員做，但今次為求逼真，演員自己親身上陣，仲要真係被密封入膠袋然後真空，睇到觀眾嘩然，最難得係扮死屍嘅Jan（謝芷倫），知道要攝入個膠袋再抽真空，都冇扭擰話要搵替身，一口答應親身上陣，雖然有專業人員試晒位，但如果被真空嗰陣反應驚青亂咁郁，隨時會發生意外，好彩Jan冇怯場，一路聽工作人員指示，唔單止監製，就連同劇演員好似施嬅、煒哥、阿Shaun（譚俊彥）都大讚佢夠專業！」

雖然做足安全措施，不過當真正要被抽走空氣密封難免緊張，Jan拍攝前亦有過一刻不安。她說：「喺膠袋入面係要開住眼嘅，真空膠袋係貼住成個人，連眼球都貼住膠袋受壓好逼真，開頭都好驚，唔知會唔會抖唔到氣窒息，好彩公司搵專人試過晒，自己亦喺工作人員監管下綵排咗好多次，只要我閉氣幾秒，跟住佢哋會開番個袋，畀我有啲氣抖，佢哋亦有指示如果我喺裡面有咩感覺唔妥點同外邊溝通，絕對安全嘅，但觀眾千祈唔好學！」

周身刀張張利！謝芷倫透視裝操足兩粒鐘

16歲已經是公開田徑跨欄比賽冠軍人馬的謝芷倫，入行前已是田徑、羽毛球、芭蕾舞、鋼琴及瑜伽高手，但相比她奮鬥工作的拼搏精神，更不能小覷！入行後，謝芷倫雖然未見立即彈起，但平時一直保持鍛練，以保持體態及鬥志，日前謝芷倫如常到公園及運動場拉筋、壓腿一字馬、sit-up、跑圈，操足兩粒鐘，幾時都話機會是留給有準備的人。