【叱咤903余迪偉逐間逛】5百棵棉花球漫天飛雪撐本地小店渡聖誕 @南豐紗廠

荃灣南豐紗廠活化後改構成多元化創意藝術空間後，成為文青新聚腳熱點。今個聖誕更加與眾不同，漫天佈滿一個個軟棉棉雪球，打造成超浪漫白色聖誕。場內多個角落以人手造嘅棉冷球佈置成充滿暖意聖誕裝飾，再逛逛限定展覽，遊走每間原創商店，為自己或者身邊嗰位揀一份獨特又有意思禮物，中場選擇自家創甜點或手沖茶及咖啡充充電，最後食埋聖誕大餐做總結，超級完滿啊！等叱咤903品味王余迪偉，帶大家逐間逛盡充滿本地情懷小店，做定功課先！

手造暖笠笠棉冷球　漫天飛雪超浪漫

南豐紗廠繼續貫徹舊工廠人情味，今次同社區設計師合作以POM POM棉冷球，將整個場地幻化成漫天飛雪嘅白色聖誕。部份軟棉棉冷球由學生、社福機構學員等，逐個用人手量度編製而成，每一個都係獨一無二！而且所有棉冷球其後仲會沿用G2G 舊衣新裳循環系統升級再造成新衣物，為POM POM棉冷球延續生命！望望迪偉喺漫天雪球中幾矚目就知一定係打卡熱點啦！

推介買物：國際設計小品　手作心思禮物

身置完漫天雪球嘅白色聖誕盡情打卡後，步入場內一定畀掛喺空中80多條由布料製成嘅鯉魚旗吸引眼球！呢個為國際知名日本紡織設計師須藤玲子，首個香港大型展覽－「須藤玲子︰『布』之作業」，然後再去CHAT六廠展廳，睇埋傳統日本工藝同創新技術結合嘅獨特紡織展，其後就一定忍不住手，將相關作品帶返屋企！睇吓迪偉對色彩繽紛嘅設計細緻研究就知幾吸引啦！

手縫書套裝仲可以體驗親手訂裝書滋味，送俾對書本製作有興趣朋友仔做聖誕禮物最適合不過！

CHAT Shop　地下Shop G01A

推介買物：森系雜貨小店天然環保有機產品

行入店內就感受到充滿大自然氣息，森系味道濃厚，唔怪得迪偉都話係 Pimary 常客。店主以環保天然角度出發，專門引入不同種類有機天然產品。今個聖誕節，一於嘗試加入減廢一族，將環保、零廢棄成為生活一部分，無論係隨行環保餐具，還是環保隨行杯，由自己做起，影響身邊嗰位、家人或者朋友又得，直接送俾朋友又得，得咗！

紐西蘭Azurlis一系列全天然無公害的護膚品，以環保、天然、科學角度研製出保護肌膚最切合配方，聖誕套裝更有不同配搭優惠。

每一件擁有獨一無二天然紋理同色調嘅橄欖木木製用具，用來做聖誕節Party嘅廚具，更添暖意。

相信見到Muskhane嘅羊毛小聖誕樹一定心動，仲有天然去角質蒟蒻海綿幫你增添洗澡樂趣。

Pimary　一樓Shop 105

推介買物：綠色原創設計聖誕送極罕暖笠笠氂牛絨圍巾

店內節日氣氛濃厚，因為引入咗不少來自世界各地獨特聖誕精品，包括來自瑞典、芬蘭等北歐小擺設，簡約而不失可愛聖誕主題。難怪迪偉對各樣小物同精選禮盒都愛不釋手。重點必推係SHOKAY喜馬拉雅高原氂牛絨圍巾，極柔軟質地又保溫，愛護地球同動物嘅你不用擔心，藏民把自然脫落的氂牛絨從氂牛身上梳理下來，一年只採集一次，每隻氂牛大約只得100g而製成的圍巾，極為罕有，送俾摯愛一定夠晒窩心。

SHOKAY喜馬拉雅高原氂牛絨圍巾嘅牛隻生活喺海拔3300米高原，毛質柔軟而且保暖度比羊毛溫暖30%，透氣度比Cashmere舒適1倍。

THE LAB 一樓Shop 112A

聖誕美食：自家製無添加小品　細膩甜蜜聖誕

連接了書店的Kitchen Meal Meal以自家製無添加做賣點，讓人感受慢活細嚐時刻。每道食品及飲品都係落足原創自家製心思，迪偉對「聖誕荷蘭梨子薑香料熱雞尾酒」讚不絕口，更跟店主互相交流製法心得！於聖誕節期間店主更推出「自家乳酪班戟聖誕樹（焦糖蘋果口味）」及「全素自家無糖奇亞籽樹莓醬黑朱古力撻」，全是來自少糖無添加嘅自創食譜，俾大家過一個甜蜜聖誕。

中西合壁嘅「聖誕荷蘭梨子薑香料熱雞尾酒」用咗傳統燉雪梨方法燉足2小時，當中加埋老薑、梅香子等香料，最後用Rum酒帶出香氣，飲完夠晒溫暖，仲滋潤十足！

自家製班戟特別加咗希臘乳酪，口感實在更香滑；焦糖蘋果口味天然而且唔會過甜，健康又夠創意。

Kitchen Meal Meal 一樓Shop 111

聖誕大餐：以花主題Fusion菜　優雅高質聖誕餐

餐廳用花做主題，以高質自創為本，主廚精心設計充滿藝術感嘅聖誕大餐。頭盤前菜有「澳洲生蠔配紅油醋珍珠」或者「澳洲帶子配藜麥煙茄子甜椒醬」，主菜就有「香煎甘鯛魚」及「紅酒燴牛面肉」，最後當然唔少得店中招牌「特色綠茶冷球蛋糕」或「經典朱古力布朗尼蛋糕」做總結，豐富又滿足！喺12月24至26期間仲有6位同12位用聖誕派對餐單，同親朋摯友想埋首相聚都無問題！