築地市場海膽多到瀉嘅「こぼれうに丼」
喺上個月，東京爆出咗一單震驚全球（特別係香港人）嘅新聞。就係東京築地漁市場終於喺要2016年搬啦（喊出嚟）！但原來日本政府早喺1980年已經開始制訂築地市場嘅搬遷計劃，仲打算喺2012年就會搬到「豐洲新市場」，不過因為種種原因拖下拖下先至遲咗咁多。據講好多店鋪因為錢同時間嘅問題，講明唔會搬去新址。所以喺未知有邊間會搬邊間會消失嘅情況下，真係要食得幾多次得幾多次。
其實築地啲壽司店唔使多介紹啦，隨時你哋仲熟過我。其實除咗個啲一星期排足七日隊嘅人氣壽司店之外，如果你有走過入築地外市場，你會發現嗰邊有好多隱世小店。特別係超鍾意食海膽飯嘅朋友，就一定要去試呢幾間啦！
「海膽多過飯」北海番屋
喺香港食海膽真係貴到飛起。普通兩件海膽軍艦起碼50蚊起跳，想豪啲成板海膽食閒閒地都幾百蚊。但係每次嚟到日本我都覺得好幸福，雖然唔係話日本啲海膽特別平，不過肯定比香港個啲新鮮一萬倍！北海番屋最出名就係大大碗海膽飯，再喺中間加幾片又肥又多油嘅拖羅，一碗咁巨型嘅魚生飯都只不過盛惠2900 yen！抵到爛呀！
又話海膽飯？邊度有飯？我淨係見到一大碗海膽咋喎！
除咗招牌海膽飯，仲有自助餐式嘅海鮮BBQ，即夾即燒（自己落手），但絕對唔會食到成身油煙味。
北海番屋
交通：都営地下鉄大江戸線 築地市場駅 徒歩5分／東京Metro日比谷線 築地駅 徒歩5分
「只見海膽 見唔到白飯」鮨國
如果你係超級海膽控，睇完北海番屋嗰碗海膽飯，再睇埋呢間鮨國，包你今晚唔食返板海膽一定訓唔著！鮨國開正喺北海番屋隔離，不過唔同之處係佢除咗會serve魚生飯，仲要做傳統日式壽司同刺身，仲有即叫即開生蠔食添！價錢同北海番屋差唔多，海膽一樣都係咁鮮甜，建議想靜靜地嘆傳統日式壽司可以揀鮨國，一大班朋友熱鬧嘅就可以去北海番屋。
鮨國又係咁，成碗海膽飯淨係得海膽！我想食白飯呀～
除咗海膽飯，呢度仲會serve傳統壽司set，絕對唔會差過築地內市場嗰啲人氣壽司店。
鮨國
交通：都営地下鉄大江戸線 築地市場駅 徒歩5分／東京Metro日比谷線 築地駅 徒歩5分
「一味三食」虎杖 魚河岸千兩
睇完張圖你可能會問，明明主題係海膽多過飯，但係呢間啲海膽得咁少嘅！首先我認我自私，因為呢間「虎杖 魚河岸千兩」啲魚生飯唔單止混合咗三文魚子、海膽、帶子、墨魚等十幾種新鮮魚生，最特別嘅係佢嘅食法，所以我真係忍唔住要介紹！
2100yen嘅招牌「元祖海鮮ひつまぶし」，係店內人氣第一！一盤基本上夠兩個人食，而且食法主要分成三個步驟。
第一碗：先當佢係普通魚生飯，可以原味或者淋少少wasabi同豉油去食，建議將份海膽擺埋一邊留返之後先食。
第二碗：店家會準備三種配料俾你加入啲飯度，呢個時候可以將配料同海膽一齊同魚生飯撈埋一齊，令成碗飯充滿海膽嘅金黃色。
第三碗：用日文”O da shi o，ku da sa i”向店員示意要上湯用嚟整泡飯，然後將海膽飯同上湯撈埋，加少少wasabi仲會好味啲添。
虎杖 魚河岸千兩
交通：都営地下鉄大江戸線 築地市場駅 徒歩5分／東京Metro日比谷線 築地駅 徒歩5分
旅遊旺季去東京淨係機票都貴咗幾千蚊，搞到訂酒店budget又少咗？唔怕！依家憑指定渣打信用卡喺Hotels.com訂購東京精選嘅酒店，即刻有高達5折嘅優惠！訂滿HK$2,000仲可以再享額外9折添！
即刻click入嚟睇吓有咩酒店啦：
http://zh.hotels.com/hotel-deals/japan-hkscbzh/?rffrid=mdp.HCOM.HK.240.000.11
網上成功申請指定渣打信用卡，即有機會贏取HK$5,000旅遊禮券，請你飛去東京同築地市場farewell！
