5樣去馬哥孛羅德國啤酒節前要知嘅事

Aug 12 2015

(Presented by Standard Chartered Bank)

各位觀眾，全亞洲最大型，屬於香港一年一度嘅盛事，第24屆嘅2015 馬哥孛羅德國啤酒節又「差唔多」開始啦！由今日開始計，距離開幕仲有2個幾月，真係時間無多啦～

咩話？你話依家先8月中，使唔使咁快就介紹？其實唔早架啦，去過嘅都知馬哥孛羅德國啤酒節晚晚都逼滿人，遲少少去都無位坐要企足全晚！因為嗰度唔單止有飲唔完嘅德國啤酒同德國特色美食，仲有馬拉松式嘅表演同飲啤酒比賽，包你飲到飽跳到飽！不過，原來仲有唔少朋友24年嚟都無去過，所以今次會簡單介紹吓馬哥孛羅德國啤酒節究竟有咩特別，順便講吓去玩有啲咩要留意／準備！

第一件事：
今年有免費入場券，唔使買飛！

去馬哥孛羅德國啤酒節最緊要嘅事一定係趁早買飛啦，因為年年啲入場券都好搶手。不過今年就特別啲，因為你有機會拎走免費入場券，唔使同人爭餐飽～想知點樣拎免費飛就記得睇到最底啦！

第二件事：
Call齊成班朋友去是常識吧

喺馬哥孛羅德國啤酒節現場有種好神奇嘅化學作用，就係唔知點解愈多人愈開心，愈夜愈熱鬧！所以去之前記得約埋一大班friend去玩。不過如果本身份人比較宅或者無咩朋友，可以選擇帶屋企人去…總之唔好自己去啦～

第三件事：
盡早入場　衣著盡量輕便

嗱唔係教大家要射波去飲啤酒呀，係因為夜少少去真係一枱／位難求。啤酒節現場基本上分成帳蓬同露天兩個area，帳蓬下近舞台嘅長枱多數預先俾人訂晒，所以要將目標放喺最近帳蓬嘅露天長枱，仲可以一邊飲一邊欣賞香港獨有嘅維港夜景（就算德國正宗啤酒節都無咁靚嘅景）。

另外因為現場真係會好熱，加上人飲多幾杯就會忍唔住走咗入帳蓬度睇show同跳舞，所以放工唔換衫著住西裝去就一定好大獲！

第四件事：
識得揀嚟食　個肚要留畀最好嘅食物

由於馬哥孛羅德國啤酒節現場太多食物選擇，淨係傳統德國食物已經有十幾款咁多，而且份量大價錢又係好平，加上你又會不停飲啤酒，所以真係會好快飽，所以介紹返以下幾款必試嘅食物，等你唔會錯失最好味嘅食物（記得留返啲位食甜品）。

「燒豬膝配燴紅椰菜及芝士焗薯片」

「香煎紐倫堡式肉腸配酸椰菜及薯蓉」

「士多啤梨撻配雪糕」