【免費好去處】年度設計盛會DesignInspire 2025 參加創新對話、入手世界級設計精品

聆聽大師級講座激發靈感

如果想為腦袋叉足電，場內將會舉辦14場InnoTalks創新對話，邀請多位著名設計師同業界專家，圍繞潮玩文創、IP開發、AI應用及設計共融等前沿議題分享佢哋嘅獨特見解！各位唔單止可以獲得實用知識同靈感，仲有機會同其他志同道合嘅朋友互相交流心得。

InnoTalks 推介1｜”以人爲本 – 為感官而設計”

試想像下一幅可以掂嘅世界名畫？呢場InnoTalk邀請左共融藝術機構代表同埋光影藝術家，爲大家一一解構我地點樣可以透過多感官藝術設計一齊塑造一個更共融嘅未來空間。

InnoTalks 推介2｜”時間扭曲 – 當回憶遇上未來”

懷舊就一定悶？相信你聽完講者分享就會有另一番體會！主辦方邀請左視覺藝術家 moon.noon、有 nopaperstudio嘅創辦人、仲有品牌 hoopla 嘅首席設計師，同大家分享下點樣將香港復古文化元素融入現代設計入面；主持人更會用哲學角度解構懷舊文化興起嘅背後原因，帶大家穿梭於記憶與潮流之間。

InnoTalks 推介3｜HKDI – “跨界協同，探索設計教育”

將會與同大家探討國際協作喺推動設計教育發展上重要嘅作用，主要講述多元創意視角如何提升學習成效、促進文化交流等，並深入分析香港知專設計學院喺合作嘅時候所面臨嘅種種機遇及挑戰。

SHOP展區Up！精選全球設計師限量作品+特色工藝

行展覽最開心嘅，莫過於可以將心頭好帶走！今年嘅SHOP展區面積比以往更大，匯聚咗來自世界各地設計師嘅精選限量設計同手作精品；大家可以喺度搵到獨一無二嘅藝術品同設計產品，直接帶返屋企收藏。

除此之外，大家都可以去到捷克館，探索來自捷克嘅著名波希米亞玻璃工藝品，將捷克獨特嘅藝術性同創意帶翻屋企！以下係小編精心推薦，鍾意設計嘅你千祈唔好錯過啦！

• Escura Camera: 深受喜愛嘅InstantSnap 數位相機，用Y2K風格將生活點滴記錄低！

• Mososisi: 專注於水泥微型建築上，透過水泥嘅溫度，將過往出現喺香港嘅回憶及風景重現眼前，守護大家嘅共同回憶！。

• Pong Company Limited: 深信外型及功能都可以兼備！利用聰明嘅設計，將大家嘅平凡日常瞬間點亮，令你每日都從中享受到一點點特別又溫暖嘅儀式感！

• 捷克館：由室内建築、到珠寶設計、服裝飾物，多個捷克品牌將波希米亞美學融入到現今設計當中，喺香港都感受到捷克異國氣氛！

參加多元化工作坊 將藝術品帶返屋企！

平時睇得多展覽，今次不如試下親身參與！DesignInspire現場將會舉辦一系列創意工作坊，主題包羅萬有，涵蓋非遺技藝、多感官創作同藝術手作等等。喺經驗豐富嘅導師指導下，親手體驗創作，以藝術方式表達自己；更加可以將自己創作嘅作品攞返屋企好好收藏㗎！有部分工作坊已經爆滿，想玩就快D用呢條link報名啦 https://www.art-mate.net/designinspire2025！

沉浸式藝術盛宴 焦點展區逐個睇！

今年DesignInspire 2025嘅展覽內容依然非常豐富，由法國Maison&Objet Intérieurs Hong Kong 2025*載譽歸來，到本地設計大師嘅精心策劃，保證令你大開眼界。

展區推介1｜Maison & Objet 載譽歸來！

承接上年登場嘅熱烈迴響，Maison&Objet今年再度帶來「Maison&Objet Intérieurs Hong Kong 2025」*，規模仲比上年大近一倍！展館以「Crossroads」為主題，設立兩大主題區域：Design Factory及Design Showcase，由16位全球知名嘅設計巨星精心打造，一共囊括超過200個品牌。Design Factory橫跨900平方米，展出來自全球約80個品牌、超過200件創作，包括：由比利時設計師Lionel Jadot策展嘅實驗性酒店套房、泰國竹藝大師Korakot Aromdee嘅天然素材作品，以及法國潮流觀察家，場景設計師 Elizabeth Leriche帶嚟嘅沉浸式設計體驗，令大家對室內設計有更深刻嘅體會！

而Design Showcase更會帶你遊走巴黎、米蘭、杜拜、香港等七個設計之都，欣賞由Hubert Le Gall、梁志天、吳濱等星級設計師，以獨特嘅個人視角詮釋生活場景嘅多功能需求！

展區推介2｜意大利 X 香港風格！BOTTETA HONG KONG

由國際設計大師陳幼堅策劃，聯手UNVEIL同蘇暢設計研究室嘅「BOTTEGA HONG KONG」都係另一焦點！展館靈感源自意大利嘅「alimentari」選物店及香港地道士多，以打開紙盒為靈感，揉合義式美學及港式人情味，中西合璧，創作出與別不同又有港式情懷嘅展館，展示由兩地品牌打造嘅限量版生活設計精品、藝術創作同時尚家品，體現一場精彩嘅中西文化創意對話！

展區推介3｜ TINY STUDIO 融合不同設計風格

當然唔少得藝術新星嘅參與！由跨媒體創作人Chilai Howard (鄭智禮)策展嘅「TINY STUDIO」就聚焦設計、藝術同科技嘅交匯。展館匯集12組嚟自香港同意大利嘅設計師，以各自嘅媒介詮釋兩地文化，展出包括數碼藝術、音樂、雕塑、氣味設計等跨感官體驗，現場仲會有刺青繪畫、音樂製作同即場編織示範。到時觀衆可以同設計師同作品互動，透過直接對話同埋參與，啟發觀眾重新思考創意同空間嘅關係。展覽亮點包括著名音樂監製Edward Chan與MV及視覺影像製作團隊 (Re)的Kelly Cheuk和Kwokin合作，呈現音樂與影像交融的視聽作品；知名插畫師Pen So展出《條條大路通羅馬》、《月下之城》及《聖安東尼諾與鯨魚》等精選作品。

DesignInspire 2025

日期：2025年12月3日至6日(*12月4日起免費公眾開放）

地點：香港會議展覽中心 Hall 3C‑E

免費登記入場

官方網站：https://designinspire.hktdc.com/tc

Landing Page: http://bit.ly/49nrqKo

*DesignInspire及Maison&Objet Intérieurs Hong Kong 2025由文創產業發展處（文創處）資助

（Presented by HKTDC)