銅鑼灣免費展覽！本地設計師重新發掘香港 仲可以免費體驗Metaverse
8位唔同專長嘅藝術家 重新發掘香港嘅美
今次嘅展覽雲集8名本地設計師，以獨特嘅藝術視角重新演繹香港。
當中有香港紙雕藝術家Benson Walker Chen，以白紙捲出一隻隻勁立體嘅舞獅、蜂鳥，仲有蜘蛛俠嘅勁敵八爪魚博士，超勁呀！
紙雕之外，仲有「香港遺美 Hong Kong Reminiscence」林曉敏，以相片記錄嘅香港；法國攝影師Romain Jacquet-Lagrèze就用攝影記錄咗香港唔同嘅角落，影低咗招牌上唔同嘅中文字，再拼湊成有意思嘅詞語組合。
仲有以插畫記錄雜貨舖、冰室、花牌紮作嘅插畫及平面設計師黃寶基，同埋以懷舊風格電影海報記錄港式生活嘅細節同潮流嘅無紙用工作室。
除咗以上嘅作品之外，仲有好多我哋習以為常嘅街頭事物，其實都係好獨特嘅香港文化。例如李漢港楷字體霓虹光管招牌同埋道路研究社嘅監獄體，正正就係以數碼化方式記錄香港文化嘅好例子。
免費試戴VR眼鏡 走入元宇宙展覽空間
上面提及嘅藝術家，每件作品都夠哂香港特色，勁打卡able！打完卡，仲可以玩埋VR先走！今次DesignInspire同咗Mirum合作，一齊打造元宇宙展覽空間，展出嚟自4個非牟利機構的展能藝術家作品！
DesignInspire「藝與城」設計展詳情
日期：11月21日 – 12月4日
時間：10am – 10pm
地點：銅鑼灣時代廣場地下有蓋廣場
快啲約埋朋友，銅鑼灣望下啦！大家亦可以按此了解更多展覽嘅詳情！
仲有好多本地設計師 等緊大家去認識
大家除咗去銅鑼灣睇展覽之餘，仲可以去「DesignInspire – 香港創意力量」網上展，認識下更多本地設計師！下文會重點介紹其中3個主題，即刻睇吓啦！
前往展館主題一：「數碼藝術」——超越紙筆，以AR技術帶大家重新認識香港！
隨住科技進步，數碼藝術成為咗藝術界嘅新一股風潮。
富有香港特色嘅地標建築彩虹邨，七彩繽紛嘅外牆顏色唔單止吸引到唔少本地人嚟打卡，甚至外國官員都曾經到訪。大家又有冇諗過一格格嘅彩虹邨，可以搖身一變成為《俄羅斯方塊》？特效影片創作者Ben Mok，仲將流行文化嘅元素結合街道，以香港唔同嘅地方製作成SuperMario、Marvel電影嘅場景！
版畫藝術家倫裕智 (Eugene Lun)，亦都用科技，將定格嘅板畫，變成有如動畫嘅作品，希望通過創作幽默嘅作品與觀眾一起逃離沉悶現實。 以香港街道做背景嘅不幸小劇場系列《今天的倒楣鬼是你？》，記錄咗一連串意外事件，探討「幸運」同「不幸」嘅本質同界線。
主題二：「香港故事」——為老香港舊照上色
講起香港故事，有班本地藝術家一直默默耕耘，以富個人風格嘅作品記錄香港嘅不同面貌2019年創立嘅Old HK in Colour，就由唔同地方收集老香港嘅黑白相，再以人工智能 (AI) 同後製技術為昔日嘅香港上色，將大約150年前嘅香港重新展現喺大家眼前。
主題三：「藝」想天開——不同風格的香港藝術家
香港插畫及文創展，就展出咗7位本地年輕插畫師嘅作品。佢哋嘅畫風各有特色，好似畫家ArYu，就擅長透過自身經歷及觀察，畫出自己鍾意同關心嘅事物，抒發個人同埋內在情感。Hohohola就希望佢嘅作品可以安撫自己、陪伴他人，治癒大家嘅心靈。
想了解DesignInspire及「香港創意力量」更多精彩內容？請瀏覽DesignInspire網站
「DesignInspire 2022 – 香港創意力量展館」獲香港特別行政區政府「創意香港」贊助。
免責聲明：香港特別行政區政府僅為本項目提供資助，除此之外並無參與項目。在本刊物／活動內（或由項目小組成員）表達的任何意見、研究成果、結論或建議，均不代表香港特別行政區政府、文化體育及旅遊局、創意香港、創意智優計劃秘書處或創意智優計劃審核委員會的觀點。
（Presented by HKTDC）
