【2025暑假好去處】賽馬會探索科學嘉年華
「賽馬會探索科學嘉年華」將會透過探究式學習，令小朋友可以親身體驗科學嘅奧妙，激發佢哋嘅好奇心！探究式學習係以科學實踐為基礎嘅學習過程，透過俾小朋友主動探究同建構對世界嘅知識與理解，從而激發佢哋嘅好奇心、鼓勵提問同親自探究，以及將所學嘅科學知識應用喺日常生活或者學習，深化小朋友對科學嘅認知！所以今次呢個「玩轉科學」嘉年華唔單止培養STEM技能咁簡單，仲可以俾小朋友體驗唔同學習嘅方式，激勵佢哋對學習嘅興趣，為未來發展打好基礎！
精彩活動預告 – 8大科學問題！「動手做」拆解科學奧秘！
賽馬會探索科學嘉年華8個「動手做」科學攤位歡迎參加者walk-in！俾大家輕鬆邊玩邊學過暑假！
1.「氣」車爭霸戰：
你知唔知車嘅動力來源嚟自邊度？你哋將會製作自己嘅專屬車仔，嘗試利用空氣同氣壓驅動佢！探索牛頓第三運動定律以及彈性同動能原理！
2.一飛衝天：
我們點先可以令火箭飛得更快？你哋將會製作同測試唔同形狀嘅火箭，學習空氣動力學同氣壓嘅知識。
3.狂野噴射：
嘗試測試用空氣推動嘅火箭，調整火箭設計同繩子蹦緊度，到底可唔可以令火箭飛得更順利？
4.天降神兵：
點解物體下落嘅速度唔同？DIY設計同測試降落傘，探索空氣阻力同動力嘅完美對決！
5.極速摩打手：
電線形狀的變化點樣影響摩打嘅穩定性？親手製作簡易電動摩打，輕易掌握電磁學嘅奧秘！
6.漩渦重炮手：
利用空氣嘅力量製造漩渦炮，再嘗試射擊目標，到底空氣嘅力量有幾大，竟然可以擊落一件物件！？
7.神秘漂浮船：
透過飯後清洗油膩的碗碟和推動船隻的關係，喺水中釋放出隱藏能量，推動小船運作搵出肥皂同表面張力嘅關係！
8.閃爆電路：
東拼西湊將唔同嘅部件連接，竟然可以通電？你哋將會設計並製作閃閃發光嘅電路藝術品，學習當中嘅電子學基礎知識！
精彩活動預告 – 2大矚目科學表演
玩完一輪遊戲之後仲有精彩表演睇！英國頂尖科學家團隊The Royal Institution會親身演出2大科學表演， 包括「科學發射站」同「能量大爆發 」。「科學發射站」會帶你一齊探索火箭發射嘅神奇原理；由煙花到太空任務，背後都有好多爆炸性嘅科學知識，不但令你近距離見識到火係點樣形成，仲會展示摩擦力嘅驚人力量，喺現場見證埋火箭發射，超期待！
而喺「能量大爆發 」演出中，就會同大家發掘探索能量嘅來源及去向。透過一系列刺激嘅爆破示範，深入了解能量如何儲存及轉移。想欣賞刺激又有趣表演嘅你，快啲準備迎接氣球爆破、火花四濺同火焰躍動嘅震撼場面啦！
科學劇場表演將預留少量位置給予即時排隊的公眾人士。
精彩活動預告 – 親子科學工作坊
活動仲有4個親子科學工作坊，一齊探索科學概念，通過實踐體驗將知識於現實應用，大幅提升小朋友嘅解難能力！
1.玩轉摩打
二百幾年前，科學家Michael Faraday用一個磁鐵實驗就改變咗世界！透過呢個工作坊，參加者可以探索磁場同電流之間嘅聯繫；之後再用三個部件組裝出自己嘅電動摩打！
2.撞擊砰砰啪
點解賽車、太空船都要進行撞擊測試？當然為咗安全啦！各位可以親手製作交通工具，然後進行撞擊測試；從中研究交通工具碰撞時所產生嘅驚人力量，並掌握結構同力學原理。
3.奔跑吧機械獸
「科學家」們將會運用摩打同簡單材料，設計出能自行郁動、跳躍甚至賽跑嘅趣怪機械生物！透過有趣嘅實驗，更深入探索「振動」嘅原理，仲可以帶你嘅作品上擂台比試一番！
4.風起了的奇妙冒險
點樣用一陣微風點亮燈泡？一次過試晒設計、製作同測試迷你風力發電機，睇吓邊種形狀嘅扇葉轉得最快、邊個發電機最夠力；仲可以親眼見證風力變成電力嘅過程㗎！
想燃點小朋友對科學嘅熱愛，等佢哋嘅好奇心都一飛沖天？咁就千祈唔好錯過「賽馬會探索科學嘉年華」喇！
賽馬會探索科學嘉年華——玩轉科學
📅日期及時間：2025年7月4日下午2點至6點半；7月5日至6日上午11點至下午6點半
地點：香港科學館
📌官網： https://carnival.jccoolscience.org/2025/home?language=tc
費用：全免
簡介：賽馬會探索科學嘉年華2025由香港賽馬會慈善信託基金轄下「賽馬會探索科學」計劃策劃及捐助， 並與香港科學館聯合主辦，活動包括9場精彩科學劇場表演 、14場親子科學工作坊以及8個特色「動手做」的互動攤位遊戲。
賽馬會探索科學
為期四年六個月的「賽馬會探索科學」計劃自2024年起動，由香港賽馬會慈善信託基金主導策劃及捐助，香港教育大學為策略夥伴。計劃致力提升小學科學教師推行探究式學習（Inquiry-based Learning）的專業教學能力，同時通過貫通課堂內外的體驗式學習，激發學生對科學的熱誠，培育具備科學素養的新一代。
計劃採用全方位模式，涵蓋以下四大核心範疇：
- 提供以探究式學習法設計的教學資源
- 為科學教師提供有系統的專業發展及培訓機會
- 舉辦「全民科學參與」活動，讓學生及大衆能夠於課堂外接觸科學
- 優化科學教育中心的設施，營造融入自然、以場所為本的體驗式學習環境
計劃預計將惠及30,000名學生，遍及120所小學。同時，計劃將透過專業發展課程、先鋒教師培訓（Advanced Teacher Fellowship）及共學社群活動（Community of Practice activities）支援500位教師，協助他們做好準備，踐行高質素的探究式小學科學教育。
了解更多詳情，請瀏覽：https://www.jccoolscience.org
