聖誕裝飾2021｜深水埗玩具街激平掃聖誕裝飾 低至$3！$20買聖誕樹＋過百款頭飾服裝＋透明波波球
撰文：Icy｜圖片來源：新假期編輯部
聖誕裝飾2021
深水埗「玩具街」激平掃聖誕裝飾 入手低至$3！
上年疫情大爆發，大家都無機會好好過聖誕，所以今年聖誕大家都興致勃勃，要彌補返上年失去嘅節日氣氛！距離正日仲有幾星期，「玩具街」已經吸引大批市民到場狂掃聖誕裝飾，全條街都水洩不通，記者平日到訪，都見到唔少一家大細嚟掃貨。左右兩旁街道嘅玩具店都搖身一變，成為聖誕裝飾店舖，唔少檔口更加延伸至中間行車路，長期都有車駛入，大家掃貨之餘都一定要注意交通安全啊！
老闆透露多年最低價 $20激抵入手聖誕樹
聖誕節最重要有咩呀？梗係聖誕樹啦！玩具街聖誕樹應有盡有，細至一隻手掌size，大至成個人咁大，無論住細屋定大屋都總有一棵啱你！鐘意自己DIY嘅朋友仔可以買全無裝飾品嘅樹，想點樣組合都得，而唔想麻煩嘅朋友仔就可以選擇本身已經有些少聖誕裝飾嘅樹，顏色眾多。唔少聖誕樹本身連閃燈，簡簡單單已經聖誕氣氛十足！不過記者覺得既然嚟得掃貨，不妨挑戰吓自己，買棵聖誕樹再額外買其他聖誕裝飾物自己DIY，落手砌更有滿足感！
3大全場必買 $3閃爆彩帶＋波波球＋頭飾
場內產品種類多到數唔晒，記者在場完全目不瑕及，價錢最平$3起！而每間價店舖嘅零售價都會有些微分別，同樣尺寸嘅聖誕樹都會相差成幾十蚊。想做個精明嘅消費者，就要花多啲時間格價喇！記者嚴選3大全場必買貨品，包括有閃爆彩帶、透明波波球及聖誕頭飾。對於選擇困難症嘅記者，彩帶類型多到眼花繚亂，價錢最平$10任揀3條，除返開$3條！
產品類型過百款 價錢豐儉由人
其他產品包括有飄雪座枱擺設、聖誕服裝、花環及七彩LED掛燈等，價錢由幾十蚊至幾百蚊不等，買到滿手購物袋都唔洗過千，真係難怪成為聖誕必去勝地！雖然數間店舖都表示會開到聖誕正日，比大家臨急抱佛腳，但記者認為最好提早去，早買早享受嘛！
店舖資料
常見問題
問：聖誕節正日店舖會照常營業嗎？
答：大部份店舖在聖誕正日依然會營業，詳情請向個別店舖致電查詢。
問：聖誕樹價錢約多少？
答：2尺最平約$20，8尺約$588。
聖誕節正日店舖會照常營業嗎？
大部份店舖在聖誕正日依然會營業，詳情請向個別店舖致電查詢。
聖誕樹價錢約多少？
2尺最平約$20，8尺約$588。
