打卡必去！草間彌生嘅招牌南瓜 以裸眼3D技術 現身滙豐尖沙咀巨型廣告位

無錯，大家最近去開尖沙咀嘅話，就千祈唔好錯過喺尖沙咀碼頭旗桿附近嘅巨型LED廣告。最近，草間彌生喺M+嘅展覽開幕，而滙豐作為展覽嘅首席贊助，最近就將藝術帶入大家嘅日常之中，將草間彌生嘅招牌南瓜，勁立體咁呈現出嚟。

而今次，滙豐亦同咗數碼互動作品創作者Henry Chu合作，喺同一位置帶咗佢嘅作品畀大家；呢個作品仲利用咗科技，可以同觀賞嘅行人實時互動。

今次亦係首次有品牌喺呢個廣告屏幕同時利用裸眼3D技術同埋互動元素。快啲睇晒呢篇文嘅介紹，跟住約埋朋友一齊去打卡啦！

展示一：草間彌生巨型3D南瓜活現眼前

大家都應該知，草間彌生嘅展覽最近登陸M+，而滙豐就係M+首個特別展覽「草間彌生：一九四五年至今」 嘅首席贊助；最近，滙豐為咗將藝術帶畀大家，將草間彌生嘅招牌南瓜，融入於戶外廣告之中，並以裸眼3D技術呈現，希望藉此拉近藝術同大眾嘅距離，打破藝術遙不可及嘅印象。

呢個廣告，可以話係近期最Hit嘅打卡位之一。廣告屏幕以裸眼3D技術呈現南瓜，佢哋有大有細，仲有唔同形狀，最尾仲會變大，同埋郁動。好震撼！保證大家睇到嗰陣會懷疑自己眼花，要嚟打卡、影Reels一流！夜晚睇嘅話，仲有另一個Feel～ 碌落去睇下有咩打卡貼士啦！

展示二：互動的花瓣 跟住途人郁 人多愈多花

與此同時，滙豐亦同數碼互動作品創作者Henry Chu合作，喺同一個位置帶咗個會同街上行人實時互動嘅作品畀大家。

呢個作品結合咗藝術同埋科技，將街上嘅行人都變成作品嘅一部份。當有人喺廣告板面前經過，螢幕上嘅花就會實時跟隨行人嘅方向移動；當廣告板面前嘅人愈來愈多，螢幕上嘅花亦會實時增加。呢個作品想做到嘅，就係讓藝術走入大眾嘅日常之中；日常中隨處可見嘅面貌，其實都可以係藝術——所有人，都參與到，都可以成為藝術嘅一部份。

尖沙咀巨型藝術廣告位詳情

日期：由即日起至2022年12月8日
地點：尖沙咀天星碼頭旗桿附近的九巴總站廣告屏

咁特別嘅戶外廣告，大家快啲約埋朋友一齊去啦！而滙豐嚟緊仲會將藝術由戶外延伸到元宇宙，記得密切留意喇！

資料來源：HSBC