大澳文物酒店開放日2026｜深入探索大澳歷史文化！必睇藝術展覽/DIY工作坊/AR導賞體驗

May 15 2026

大澳呢個地方相信大家都唔陌生，但你又有冇試過真正深入了解佢嘅歷史同文化呢？每次去大澳可能都係睇棚屋影吓相、品嚐完小食就走，但其實呢個地方仲有好多故事等緊你去發掘！「大澳文物酒店開放日」將於5月22日至5月25日一連4日舉行，唔單止可以了解大澳歷史文化嘅故事，仲有得近距離欣賞大澳廟宇屋脊上珍貴保存的石灣瓦脊！更多活動等你一一發掘，即刻開展你嘅歷史探索之旅，用全新角度認識大澳啦～

大澳文物酒店開放日2026 （圖片來源：大澳文物酒店） — （圖片來源：大澳文物酒店）

開始探索大澳之前，記得唔好錯過開放日限定優惠呀！由5月22日至5月25日入住之賓客，都可於Tai O Lookout 免費享用迎賓飲品及小食乙份！

「活現大澳屋脊上的戲台」全方位了解大澳歷史

了解更多關於非物質文化遺產嘅歷史！「活現大澳屋脊上的戲台」提供4大活動等大家可以參與其中，活現石灣陶塑承載嘅國家級非物質文化遺產「石灣陶塑技藝」，深入了解呢項古建築裝飾背後嘅悠長故事

必睇展覽

由5月22日至6月22日，酒店將展出專研古建築裝飾嘅馬素梅博士陶塑藝術作品《身在福中》，開放日期間更設有大澳本土藝術家黃志泉先生所描繪嘅關帝古廟屋脊戲台藝術裝置，全部作品都獨一無二，十分值得觀賞！

多元化工作坊

除咗欣賞藝術展覽之外，大家亦有機會「落手落腳」DIY㗎！

模壓工作坊：以黏土用特製模具倒模，打造象徵祥瑞的蝙蝠

拓印及絲網印刷工作坊：「印」出專屬自己嘅屋脊人物及大澳文物酒店圖案

早前酒店亦率先帶領大澳本地幼稚園學生進行「尋福記」工作坊，一同參觀關帝古廟，透過繪畫蝙蝠、觀察廟宇環境等，仔細認識大澳關帝古廟歷史文化，同時明白保育嘅重要性。

特別藝術裝置

打卡+觀賞價值兼備！由大澳本土藝術家黃志泉所創作嘅藝術裝置，將擺放於荷花池展出，到時記得合照一張！

紀念品

想將呢份珍貴嘅歷史文化帶埋返屋企？酒店設置印章體驗，圖案內容都係以大澳文物酒店及大澳關帝古廟屋脊為主題，一齊創作專屬於你嘅小作品！而且，關帝廟印章卡亦附有二維碼，掃描後就會見到屋脊戲台嘅AR動畫，生動畫面呈現於眼前～

創新科技結合歷史建築沉浸式AR體驗

今年嘅大澳文物酒店開放日注入豐富嘅創新科技元素！活動期間，酒店範圍將設有多項擴增實境（AR）體驗，當中包括自助導覽體驗，只需透過用智能手機掃描二維碼即可周圍「尋寶」。無論走到邊個角落都可以同時深入了解文物及建築～另外，酒店更引入先進嘅「Temi機械人」作為迎接大家嘅導賞員，可以帶訪客穿梭酒店，提供詳盡有趣嘅講解，充分展現傳統文物與現代科技嘅結合！

延伸文化之旅大澳關帝古廟AR互動

精彩活動並非單單侷限於酒店範圍內。為令大家都可以進一步了解大澳社區文化，就連重要歷史地標大澳關帝古廟都有AR體驗！大澳關帝古廟的瓦脊以有關宋太祖趙匡胤故事的《飛龍全傳》及《宋太祖三下南唐》為題材，喺參觀呢座歷史悠久嘅廟宇時，同樣可透過擴增實境技術。只要掃描位於簡介展板上嘅二維碼，就可以以互動形式了解關帝古廟的建築特色，了解更多背後嘅角色和故事，用更有趣味性嘅方式探索大澳歷史底蘊。一邊聽住故事，一邊親眼欣賞廟宇內嘅建築，體驗level up！